Chhut-ai-ki̍p-kì 26

Chhut-ai-ki̍p-kì 26 - 現代台語譯本羅馬字版(TTVR)-闽南语

Hōe-bō͘(Chhut 36.8-38)

1“Lí tio̍h ēng cha̍p pak pò͘ chòe hōe-bō͘; chiah-ê pò͘ sī ēng so--kè ê iù-môa, kap nâ-sek, chí-sek, chu-âng-sek ê se chit--ê, téng-bīn tio̍h ēng chin-iù ê chhiú-lō͘ siù ki-lō͘-pek.

2Múi-pak pò͘ tn̂g tio̍h cha̍p-jī kong-chhioh, khoah nn̄g kong-chhioh; ta̍k-pak ê chhùn-chhioh lóng siâng-khoán.

3Tio̍h chiong gō͘ pak pò͘ chiap chòe chi̍t cho͘; lēng-gōa gō͘ pak mā tio̍h án-ni.

4Koh tī ta̍k-cho͘ saⁿ-chiap ê pò͘, lō͘-bé hit-pak ê piⁿ--á tio̍h chòe nâ-sek ê liú-khoân.

5Tio̍h tī chit-cho͘ pò͘ chòe gō͘-cha̍p ê liú-khoân; tī tē-jī cho͘ pò͘ lō͘-bé hit-pak ê piⁿ--á, mā chòe gō͘-cha̍p ê liú-khoân; nn̄g cho͘ ê liú-khoân lóng tio̍h nn̄g-ê nn̄g-ê sio-tùi.

6Koh tio̍h chòe gō͘-cha̍p ê kim kau-á, ēng kau-á chiong nn̄g cho͘ pò͘ liân chòe-hé, chiâⁿ-chòe chi̍t ê hōe-bō͘.”

7“Lí tio̍h ēng soaⁿ-iûⁿ-mn̂g chit cha̍p-it pak tiùⁿ, chòe khàm hōe-bō͘ ê pò͘-phâng;

8múi-pak tiùⁿ tn̂g cha̍p-saⁿ kong-chhioh, khoah nn̄g kong-chhioh; cha̍p-it pak ê chhùn-chhioh lóng siâng-khoán.

9Tio̍h chiong gō͘ pak tiùⁿ liân-chòe chi̍t cho͘, lēng-gōa la̍k pak mā liân-chòe chi̍t cho͘; hit-ê tē-la̍k pak ê chi̍t-pòaⁿ tio̍h sûi-lo̍h tī pò͘-phâng ê thâu-chêng.

10Tī ta̍k-cho͘ sio-chiap ê tiùⁿ, lō͘-bé hit-pak ê piⁿ--á tio̍h chòe gō͘-cha̍p ê liú-khoân.

11Koh tio̍h chòe gō͘-cha̍p ê tâng ê kau-á, kau tī liú-khoân, hō͘ pò͘-phâng liân-chòe chi̍t ê.

12Pò͘-phâng ê tiùⁿ ke--chhut-lâi hit pòaⁿ-pak, tio̍h sûi tī hōe-bō͘ ê āu-bīn.

13Khàm hōe-bō͘ ê pò͘-phâng nn̄g pêng ke--chhut-lâi ê gō͘-cha̍p kong-hun, tio̍h sûi tī hōe-bō͘ ê siang-pêng.

14“Lí tio̍h ēng ní-chòe âng-sek ê iûⁿ-káng ê phê khàm pò͘-phâng, koh ēng siōng-hó ê phê khàm tī siōng téng-bīn.

15“Lí tio̍h ēng kim-ha̍p-hoan-bo̍k chòe hōe-bō͘ ê piah-pang.

16Piah-pang tio̍h tn̂g sì kong-chhioh, khoah la̍k-cha̍p-la̍k kong-hun.

17Ta̍k-tè pang tio̍h ū nn̄g ê sún thang saⁿ-chiap; hōe-bō͘ só͘-ū ê pang lóng tio̍h chiàu án-ni chòe.

18Lâm-pêng ê piah-pang tio̍h chòe jī-cha̍p tè.

19Chit jī-cha̍p tè pang ê ē-bīn, tio̍h chòe sì-cha̍p ê gûn ê chō; ta̍k-tè pang ê ē-bīn ū nn̄g ê khang thang tàu in ê sún.

20Hōe-bō͘ ê tē-jī bīn, chiū-sī pak-pêng, mā tio̍h chòe jī-cha̍p tè piah-pang,

21kap sì-cha̍p ê gûn ê chō; ta̍k-tè pang ê ē-bīn ū nn̄g ê khang.

22Hōe-bō͘ ê āu-bīn, chiū-sī sai-pêng, tio̍h chòe la̍k tè pang.

23Hōe-bō͘ āu-bīn ê kak-thâu, tio̍h chòe nn̄g tè pang,

24ē-bīn thí-khui, téng-bīn saⁿ-liân ti̍t-kàu téng-bīn tē-it ê khoân; nn̄g pêng lóng sī án-ni, beh chòe kak-thâu ê lō͘-ēng.

25Tio̍h ū poeh tè pang, kap cha̍p-la̍k ê gûn ê chō; ta̍k-tè pang ê ē-bīn ū nn̄g ê sún-khang.

26-27“Lí tio̍h ēng kim-ha̍p-hoan-bo̍k chòe hoâiⁿ-kông; lâm-pêng kap pak-pêng kok gō͘ ki, hōe-bō͘ ê āu-bīn, chiū-sī sai-pêng, mā gō͘ ki.

28Piah-pang tùi-tiong hit-ki hoâiⁿ-kông, tio̍h tùi chit-thâu thàng kàu hit-thâu.

29Piah-pang tio̍h ēng kim pau--teh, koh chòe kim-khoân thang thò hoâiⁿ-kông; hoâiⁿ-kông mā tio̍h ēng kim pau.

30Lí tio̍h chiàu góa tī soaⁿ-téng chí-sī lí ê khoán-sit kā hōe-bō͘ tah--khí-lâi.

31“Lí tio̍h ēng nâ-sek, chí-sek, chu-âng-sek ê se, kap so--kè ê iù-môa chit tiùⁿ-lî; chit-ê tiùⁿ-lî tio̍h ēng chin-iù ê chhiú-lō͘ siù ki-lō͘-pek.

32Lí tio̍h ēng kim-ha̍p-hoan-bo̍k chòe sì ki thiāu, ēng kim pau--teh, koh ū kim-kau-á; thiāu tàu tī sì ê ū sún-khang ê gûn ê chō téng-bīn;

33tiùⁿ-lî tio̍h tiàu tī kim-kau-á. Lí tio̍h chiong iok-kūi kng-ji̍p tiùⁿ-lî lāi; chit-ê tiùⁿ-lî sī ūi-tio̍h lín, chiong sèng-só͘ kap Chì-sèng-só͘ keh-khui.

34Koh tio̍h chiong si-un-chō an tī Chì-sèng-só͘ lāi-bīn ê iok-kūi téng-bīn.

35Lí tio̍h chiong pâi hiàn-chè ê piáⁿ ê toh hē tī tiùⁿ-lî gōa-bīn ê pak-pêng; teng-tâi hē tī lâm-pêng, kap toh sio-tùi.

36“Lí tio̍h ēng nâ-sek, chí-sek, chu-âng-sek ê se, kap so--kè ê iù-môa, ēng chhiah-siù ê chhiú-lō͘ chòe hōe-bō͘ ê mn̂g-lî.

37Tio̍h ēng kim-ha̍p-hoan-bo̍k chòe gō͘ ki thiāu tiàu mn̂g-lî; thiāu tio̍h ēng kim pau--teh; thiāu ê kau-á tio̍h ēng sûn-kim chòe. Koh tio̍h ūi thiāu chù gō͘ ê ū sún-khang ê tâng ê chō.”

Chhut-ai-ki̍p-kì 26 - 現代台語譯本羅馬字版(TTVR)-闽南语

Learn More About Us