Sin-bēng-kì 29

Sin-bēng-kì 29 - 現代台語譯本羅馬字版(TTVR)-闽南语

Tī Mô͘-ap Têng-sin Li̍p-iok

1Siōng Chú tī Hô-lia̍t-soaⁿ kap Í-sek-lia̍t-lâng li̍p-iok í-āu, koh tī Mô͘-ap-tōe bēng-lēng Mô͘-se kap Í-sek-lia̍t-lâng li̍p-iok. Ē-bīn sī li̍p-iok ê lōe-iông.

2 Mô͘-se tiàu Í-sek-lia̍t chèng-lâng lâi, tùi in kóng: Siōng Chú tī Ai-ki̍p-tōe, tùi Hoat-ló kap i ê chèng jîn-sîn, í-ki̍p in choân-kok só͘ chòe it-chhè ê sū, lín lóng chhin-ba̍k khòaⁿ--tio̍h,

3chiū-sī lín só͘ khòaⁿ--tio̍h ê tōa chai-lān, sîn-jiah, kap tōa kî-sū.

4M̄-kú kàu kin-á-ji̍t, Siōng Chú iáu-bē hō͘ lín ōe bêng-pe̍k ê sim, ōe khòaⁿ--kìⁿ ê ba̍k-chiu, ōe thiaⁿ--kìⁿ ê hī-á.

5Góa chhōa lín tī khòng-iá sì-cha̍p nî, lín ê saⁿ-á-khò͘ bô phòa, ôe mā bô pháiⁿ--khì;

6lín bô piáⁿ thang chia̍h, bô po̍h-chiú, kāu-chiú thang lim, m̄-kú Siōng Chú kiong-kip lín só͘ su-iàu ê it-chhè, hō͘ lín chai I chiū-sī Siōng Chú — lín ê Siōng-tè.

7Lín lâi kàu chit só͘-chāi, Hi-si̍t-pún-ông Se-hông, Pa-san-ông Go̍k chhut-lâi kap lán kau-chiàn;

8lán kā in phah-pāi, kong-chhú in ê tōe, chiong hit-ê tōe pun hō͘ Lū-piān kap Ka-tek nn̄g ê chi-cho̍k, í-ki̍p Má-ná-se pòaⁿ chi-cho̍k chòe sán-gia̍p;

9só͘-í lín tio̍h chhiat-si̍t chun-hêng chit-ê iok ê ōe, thang hō͘ lín sū-sū heng-thong.

10-11Kin-á-ji̍t lín ta̍k chi-cho̍k ê cho̍k-tiúⁿ, tiúⁿ-ló, koaⁿ-tiúⁿ, Í-sek-lia̍t ê lâm-hū-ló-iù, í-ki̍p tòa tī lín tiong-kan kā lín phòa-chhâ, chhiūⁿ-chúi ê gōa-cho̍k-lâng, lóng khiā tī Siōng Chú — lín ê Siōng-tè bīn-chêng,

12lín tio̍h chiap-siū Siōng Chú — lín ê Siōng-tè li̍p-sè kap lín li̍p ê iok,

13hō͘ I chiàu I tùi lín ê èng-ún, mā chiàu I tùi lín ê lia̍t-chó͘ A-pek-la-hán, Í-sat, Ngá-kok li̍p-sè--ê, kin-á-ji̍t siat-li̍p lín chòe I ê chú-bîn, I chòe lín ê Siōng-tè.

14Siōng Chú m̄-sī kan-ta kap lín li̍p-sè li̍p chit-ê iok,

15sī kap kin-á-ji̍t kap lán chòe-hé khiā tī Siōng Chú — lán ê Siōng-tè bīn-chêng ê lâng, í-ki̍p iáu-bē chhut-sì ê kiáⁿ-kiáⁿ-sun-sun li̍p-iok.

16Lín chai, lán bat tòa tī Ai-ki̍p, mā ū tùi lia̍t-kok keng-kè;

17lín koh ū khòaⁿ-tio̍h in tiong-kan hiah-ê ēng chhâ, chio̍h, kim, gûn chè-chō, thang iàm-ò͘ⁿ ê ngó͘-siōng;

18tio̍h kín-sīn, lín kin-á-ji̍t khiā tī chia ê lâng, bô-lūn ta-po͘-lâng, cha-bó͘-lâng, ka-cho̍k, chi-cho̍k, m̄-thang ûi-pōe Siōng Chú — lán ê Siōng-tè, khì ho̍k-sāi hiah-ê bîn-cho̍k ê sîn-bêng, chhin-chhiūⁿ tùi pháiⁿ ê kun siⁿ-chhut to̍k-chhài kap khó͘-chháu;

19chit-khoán lâng thiaⁿ-tio̍h chiah-ê chiù-chó͘ ê ōe, sim-lāi iáu-kú ka-kī an-ùi, kóng, “Góa sui-jiân kò͘-chip chòe chit-khoán tāi-chì, liân-lūi só͘-ū ê lâng, góa iû-goân ū pêng-an.”

20Siōng Chú bōe sià-bián chit-khoán lâng; Siōng Chú ê tōa siū-khì ōe kā i sio-bia̍t, chiong kì-chài tī chit-pún chheh ê chiù-chó͘, lóng kàng-lo̍h tī i sin-chiūⁿ; Siōng Chú koh ōe tùi thiⁿ-ē chhat-siau i ê miâ;

21Siōng Chú mā ōe chiàu chit-ê lu̍t-hoat ê chheh só͘ kì-chài ê iok lāi-bīn ê chiù-chó͘, tùi Í-sek-lia̍t chèng chi-cho̍k ê tiong-kan kā i hun-pia̍t--chhut-lâi, hō͘ i siū chai-hō.

22Í-āu, lín ê kiáⁿ-kiáⁿ-sun-sun kap tùi chin hn̄g ê só͘-chāi lâi ê gōa-cho̍k-lâng, khòaⁿ-tio̍h Siōng Chú hō͘ chit-ê tōe tú--tio̍h ê chai-lān kap pīⁿ-chèng,

23chiū-sī chit-ê tōe ta̍k só͘-chāi ū liû-hông, ū iâm, hō͘ hé sio--kè, bōe-tàng chèng-choh, bô chhut-sán, bōe hoat-chháu, chhin-chhiūⁿ Siōng Chú tī tōa siū-khì tiong húi-hoāi Só͘-to-má, Gô-mô͘-la, Ap-má, Sé-pián án-ni;

24in lóng ōe mn̄g, “Siōng Chú ná ōe tùi chit-ê tōe án-ni chòe? I ê siū-khì ná ōe hiah béng-lia̍t?”

25Lâng ōe tùi in kóng, “Sī in-ūi chit só͘-chāi ê lâng khì-sak Siōng Chú — in lia̍t-chó͘ ê Siōng-tè chhōa in chhut Ai-ki̍p ê sî kap in li̍p ê iok;

26in khì pài in m̄ bat, mā-sī Siōng Chú kìm-chí in pài ê sîn-bêng;

27só͘-í Siōng Chú hoat tōa siū-khì, chiong chit-pún chheh só͘ kì-chài it-chhè ê chiù-chó͘, lóng kàng-lo̍h tī chit-ê tōe.

28Siōng Chú hui-siông siū-khì, tī tōa siū-khì tiong chiong in tùi chit-ê tōe pu̍ih-chhut, kā in hiat tī gōa-pang, kàu kin-á-ji̍t.”

29Ū chi̍t-kóa tāi-chì Siōng Chú — lán ê Siōng-tè bô kā lán khé-sī; m̄-kú I ū khé-sī chit-ê lu̍t-hoat, hō͘ lán kap lán ê kiáⁿ-sun éng-oán chun-hêng.

Sin-bēng-kì 29 - 現代台語譯本羅馬字版(TTVR)-闽南语

Learn More About Us