Í-se-kiat-su 23

Í-se-kiat-su 23 - 現代台語譯本羅馬字版(TTVR)-闽南语

Nn̄g Ê Hoān-chōe ê Chí-bē

1Siōng Chú tùi góa kóng,

2“Jîn-chú ah, í-chêng ū chi̍t tùi chí-bē, sī kâng lāu-bú siⁿ--ê.

3In tòa tī Ai-ki̍p, siàu-liân ê sî chiū chòe ki-lú; chāi-sek-lú ê sî chiū hō͘ lâng bong in ê lin, sńg in ê seng-khu.

4Tōa-chí kiò-chòe A-hô-la, chiū-sī Sat-má-lī-a; sió-bē kiò-chòe A-hô-lī-pa, chiū-sī Iâ-lō͘-sat-léng. Góa chhōa in nn̄g chí-bē; in lóng thòe góa siⁿ gín-á.

5“A-hô-la kè góa liáu-āu kè-sio̍k chòe ki-lú. I bê-loân i ê ài-jîn A-su̍t.

6In sī chhēng nâ-sek ê saⁿ ê léng-siù kap kun-koaⁿ, lóng sī khiâ-bé ê chiàn-sū, eng-chùn ê siàu-liân-lâng.

7I kap chiah-ê A-su̍t-lâng tiong-kan phiau-phiat ê siàu-liân-lâng kiâⁿ-îm, pài in ê ngó͘-siōng lâi phah lâ-sâm ka-kī.

8I bô lī-khui tùi Ai-ki̍p ê sî chiū ū ê îm-loān. I tī siàu-liân ê sî, chiū hō͘ lâng kap i khùn; tī chāi-sek-lú ê sî, chiū hō͘ lâng bong i ê lin. Lâng kā i tòng-chòe hòng-chhiòng chêng-io̍k ê tùi-siōng.

9Só͘-í, góa chiong i kau tī i loân-bō͘ ê ài-jîn A-su̍t ê chhiú-tiong.

10In kā i thǹg-kng-kng, lia̍h i ê kiáⁿ-jî, koh ēng to kā i thâi-sí. I siū ê hêng-hoa̍t, hō͘ i tī hū-jîn-lâng ê tiong-kan lâu chhàu-miâ.”

Sió-bē A-hô-lī-pa ê Chōe

11“I ê sió-bē A-hô-lī-pa sui-jiân ū khòaⁿ-tio̍h chiah-ê tāi-chì, khiok pí i ê tōa-chí A-hô-la koh-khah tūi-lo̍h, koh-khah îm-loān.

12I mā bê-loân A-su̍t-lâng; in sī chhēng choân-hù-kun-chong ê léng-siù kap kun-koaⁿ, lóng sī khiâ-bé ê chiàn-sū, eng-chùn ê siàu-liân-lâng.

13Góa khòaⁿ-kìⁿ i tūi-lo̍h phah lâ-sâm ka-kī; in chí-bē-á kiâⁿ kâng tiâu lō͘.

14“A-hô-lī-pa pí i ê tōa-chí koh-khah îm-loān. I khòaⁿ-kìⁿ khek tī piah--ni̍h hiah-ê chhat chu-âng-sek ê Pa-pí-lûn-lâng ê siōng;

15in hâ io-tòa, thâu-khak pau ê thâu-kun sûi hong phiau-iông, khòaⁿ--khí-lâi chhin-chhiūⁿ tī Ka-le̍k-tí chhut-sì ê Pa-pí-lûn chí-hui-koaⁿ.

16A-hô-lī-pa chi̍t-ē khòaⁿ--kìⁿ chiū loân-bō͘ in, phài sù-chiá khì Pa-pí-lûn kìⁿ in.

17Pa-pí-lûn-lâng chiū lâi kap i khùn, kā i bú-jio̍k phah lâ-sâm. I siū phah lâ-sâm liáu-āu, chiū kap in so͘-oán.

18I kong-jiân chhiah-sin-lō͘-thé, hián-lō͘ i ê îm-hēng. Só͘-í, góa kap i so͘-oán, chhin-chhiūⁿ khah-chá kap i ê tōa-chí so͘-oán siâng-khoán.

19I su-liām siàu-liân ê sî tī Ai-ki̍p chòe ki-lú ê ji̍t-chí, ke-thiⁿ ka-kī ê îm-hēng.

20I bê-loân thé-keh chhin-chhiūⁿ iá-lû hiah-ni̍h chòng, cheng-le̍k chhin-chhiūⁿ iá-bé hiah-ni̍h chiok ê ài-jîn.

21A-hô-lī-pa ah, lí khat-bō͘ lí siàu-liân ê sî ê îm-hēng. Lí siàu-liân ê sî tī Ai-ki̍p chiū chòe ki-lú, hō͘ lâng bong lí ê lin, sńg lí ê seng-khu.”

Sió-bē Eng-kai Siū Hêng-hoa̍t

22“Só͘-í, A-hô-lī-pa ah, góa — Chì-koân ê Siōng Chú án-ni tùi lí kóng, ‘Góa beh kek-tōng lí so͘-oán ê ài-jîn lâi kong-kek lí. Góa beh chhōa in lâi, tùi sì-bīn kong-kek lí.

23In ū Pa-pí-lûn-lâng, Ka-le̍k-tí-lâng, Pí-kat-lâng, Su-a-lâng, Ko-a-lâng, koh ū A-su̍t-lâng kap in chòe-hé lâi; in lóng sī phiau-phiat ê siàu-liân-lâng, sī khiâ-bé ê léng-siù, kun-koaⁿ, kap chiàn-sū.

24In beh chhōa tāi-kun, ēng kun-khì, chiàn-chhia, kap pó͘-kip-chhia lâi kong-kek lí. In giâ tōa sió tún-pâi, chhēng chiàn-kah, tì thâu-khoe, tùi sì-bīn ûi-kong lí. In beh thòe góa kā lí hêng-hoa̍t, chiàu in ê hoat-lu̍t sím-phòaⁿ lí.

25Góa in-ūi oàn-tò͘ kong-kek lí, hō͘ in hoat tōa siū-khì tùi-hù lí. In beh koah lí ê phīⁿ-á kap hī-á, thâi-sí lí chhun ê jîn-bîn. In beh lia̍h lí ê hāu-siⁿ cha-bó͘-kiáⁿ, kā chhun--lo̍h-lâi ê lâng sio-sí.

26In beh pak lí ê saⁿ, chhiúⁿ lí kùi-tiōng ê chu-pó.

27Góa beh hō͘ lí bô koh hoān tùi Ai-ki̍p chiū ū ê îm-hēng, hō͘ lí bô koh su-liām Ai-ki̍p, bô koh kî-thāi in ê pang-chān.’

28“Chì-koân ê Siōng Chú koh kóng, ‘Góa beh kā lí kau hō͘ lí oàn-hūn so͘-oán ê lâng.

29In beh ēng oàn-hūn tùi-thāi lí, chhiúⁿ-toa̍t lí lô-lo̍k tit--lâi ê châi-bu̍t, kā lí thǹg-kng-kng. Lí îm-loān ê seng-khu kap hêng-ûi lóng beh lō͘-hiān hō͘ lâng khòaⁿ--kìⁿ. Che sī lí ê io̍k-bōng kap îm-hēng jiá--lâi-ê.

30Lí choh lia̍t-kok ê chhiong-ki, pài in ê ngó͘-siōng phah lâ-sâm ka-kī.

31Lí kiâⁿ lín tōa-chí kiâⁿ--kè ê lō͘, só͘-í góa beh the̍h i lim--kè hêng-hoa̍t ê poe hō͘ lí lim.’

32“Chì-koân ê Siōng Chú án-ni kóng:

Lí beh lim lí ê tōa-chí ê poe;

chit-ê poe chhim koh tōa,

tóe-móa hêng-hoa̍t.

Lí beh hō͘ lâng thí-chhiò ki-chhì.

33Lí ê tōa-chí Sat-má-lī-a lim ê poe,

sī hō͘ lâng kiaⁿ-hiâⁿ, chhiⁿ-chhám ê chiú-poe;

lí beh chùi-bâng-bâng, tōa iu-khó͘.

34Lí beh lim chit-ê poe, lim kàu ta-ta;

lí beh siak-phòa chit-ê poe, koh koah-siong lí ê lin.

Chiah-ê sū góa í-keng kóng--kè,

Chì-koân ê Siōng Chú án-ni soan-kò.

35“Só͘-í, Chì-koân ê Siōng Chú án-ni kóng, ‘In-ūi lí bōe-kì-tit góa, chiong góa hiat tī ka-chiah-āu, lí beh sêng-siū lí ê io̍k-bōng kap îm-hēng chō-sêng ê hō͘-kó.’”

Siōng Chú Sím-phòaⁿ Nn̄g Ê Chí-bē

36Siōng Chú tùi góa kóng, “Jîn-chú ah, lí tio̍h sím-phòaⁿ A-hô-la kap A-hô-lī-pa! Lí tio̍h chí-chhut in só͘ chòe thang iàm-ò͘ⁿ ê sū.

37In hoān kan-îm kap thâi-lâng ê chōe. In pài ngó͘-siōng kiâⁿ kan-îm, chiong in kap góa siⁿ ê kiáⁿ-jî sio hō͘ ngó͘-siōng chòe chia̍h-mi̍h.

38M̄-nā án-ni, in kâng hit-ji̍t phah lâ-sâm góa ê sèng-tiān, kan-hoān góa ê An-hioh-ji̍t.

39In thâi in ê kiáⁿ-jî hiàn hō͘ ngó͘-siōng, kâng hit-ji̍t koh chìn-ji̍p góa ê sèng-tiān kā i siat-to̍k. Che chiū-sī in tī góa ê sèng-tiān só͘-chòe ê tāi-chì!

40“In koh phài sù-chiá khì chin hn̄g ê só͘-chāi chhiáⁿ ta-po͘-lâng lâi. Ta-po͘-lâng lâi, in nn̄g ê chí-bē chiū sóe seng-khu, boah hún, ōe ba̍k-chiu ba̍k-bâi, kòa chu-pó.

41In chē tī súi ê bîn-chhn̂g, chiong kèng-pài góa ê phang-iû hē tī bîn-chhn̂g thâu piⁿ--á ê toh-á téng.

42Ū kui-tīn tùi khòng-iá lâi ê lâng tī hia lim-chiú hi-hi-hōa-hōa; in chiong chhiú-khoân kòa tī nn̄g ê chí-bē ê chhiú--ni̍h, chiong hoa-koan tì tī in ê thâu-khak téng.

43Kóng-tio̍h chit-tùi chí-bē-á, in hòng-chhiòng îm-loān tì-kàu soe-ló, hiān-chāi lâng iáu lâi kap in kiâⁿ-îm, in mā kap lâng kiâⁿ-îm.

44Lâng it-chài lâi kap A-hô-la, A-hô-lī-pa nn̄g ê chí-bē-á kiâⁿ-îm, kā in tòng-chòe ki-lú; in chòe ki-lú kap ta̍k-ê lâng khùn.

45Kong-chèng ê lâng tio̍h phòaⁿ in hoān îm-loān kap thâi-lâng ê chōe; in-ūi in kiâⁿ-îm, chhiú bak thâi-lâng ê huih.”

46Chì-koân ê Siōng Chú án-ni kóng, “Góa beh tiàu-chi̍p chi̍t tōa-tīn kûn-chiòng lâi kong-kek in, hō͘ in kiaⁿ-hiâⁿ, kā in lia̍h--khì.

47Kûn-chiòng beh ēng chio̍h-thâu kā in tìm-sí, ēng to-kiàm thâi-sí in kap in ê kiáⁿ, cha-bó͘-kiáⁿ, pàng-hé sio in ê chhù.

48Góa beh hō͘ chit-ê kok-ka bô koh kiâⁿ-îm, thang kéng-kài só͘-ū ê hū-jîn-lâng, m̄-thang o̍h in ê îm-hēng.

49Lâng beh chiàu lín ê îm-hēng hêng-hoa̍t lín; lín beh sêng-tam pài ngó͘-siōng ê chōe. Án-ni, lín chiū chai góa sī Chì-koân ê Siōng Chú.”

Í-se-kiat-su 23 - 現代台語譯本羅馬字版(TTVR)-闽南语

Learn More About Us