Khé-sī-lio̍k 20

Khé-sī-lio̍k 20 - 現代台語譯本羅馬字版(TTVR)-闽南语

Chi̍t-chheng Nî

1Āu-lâi, góa ū khòaⁿ-kìⁿ chi̍t ê thiⁿ-sài tùi thiⁿ-téng lo̍h--lâi, chhiú the̍h bô-tóe-chhim-khiⁿ ê só-sî kap chi̍t tiâu tōa-tiâu thih-liān.

2I lia̍h hit-chiah ok-lêng, chiū-sī hit-bé lāu-chôa, sī Mô͘-kúi, sī Sat-tàn, kā i pa̍k chi̍t-chheng nî.

3Thiⁿ-sài kā i hiat-lo̍h bô-tóe-chhim-khiⁿ, jiân-āu kā bô-tóe-chhim-khiⁿ koaiⁿ-ba̍t, koh ēng ìn hong--khí-lâi, hō͘ i bōe-tàng koh khì bê-he̍k lia̍t-pang, it-ti̍t kàu chi̍t-chheng nî móa. Chit-ê kî-hān kè-liáu, i it-tēng tio̍h chiām-sî siū tháu-pàng.

4Góa ū koh khòaⁿ-kìⁿ kúi-nā ê pó-chō, chē tī pó-chō--ê ū tit-tio̍h sím-phòaⁿ ê koân-pèng. Góa mā ū khòaⁿ-kìⁿ hiah-ê ūi-tio̍h Iâ-so͘ ê kiàn-chèng kap Siōng-tè ê Tō hō͘ lâng chām-thâu ê lâng ê lêng-hûn. Chiah-ê lâng m̄-bat pài siù, mā m̄-bat pài siù ê siōng, in ê thâu-hia̍h á-sī chhiú bô chiap-siū siù ê kì-hō. In lóng koh-oa̍h kap Ki-tok chòe-hé thóng-tī chi̍t-chheng nî.

5Só͘ chhun ê sí-lâng kàu chi̍t-chheng nî móa ê sî chiah ōe koh-oa̍h. Che sī thâu chi̍t piàn ê koh-oa̍h.

6Ū-hūn tī thâu chi̍t piàn koh-oa̍h ê lâng chin ū hok-khì, in sī sèng-kiat ê lâng. Tē-jī piàn ê sí bô koân thang kā in koán-hat, in ōe chòe Siōng-tè kap Ki-tok ê chè-si, mā ōe kap Ki-tok chòe-hé thóng-tī chi̍t-chheng nî.

Sat-tàn Chiàn-pāi

7Chi̍t-chheng nî móa ê sî, Sat-tàn ōe siū tháu-pàng chhut-kaⁿ.

8I ōe chhut-khì bê-he̍k tōe-chiūⁿ sì-hng ê lia̍t-pang, chiū-sī Ko-kek kap Má-kok, chū-chi̍p in khì kau-chiàn; in ê sò͘-bo̍k chhin-chhiūⁿ hái-soa hiah-ni̍h chōe.

9In chìn-kun piàn-móa choân-tōe, ûi-khùn sìn-tô͘ ê iâⁿ kap Siōng-tè só͘ thiàⁿ ê siâⁿ. M̄-kú ū hé tùi thiⁿ kàng-lo̍h kā in sio-bia̍t.

10Hit-ê bê-he̍k in ê Mô͘-kúi siū hiat-lo̍h hé kap liû-hông ê ô͘; hit-chiah siù kap hit-ê ké sian-ti í-keng tī hia. In ōe mî-ji̍t siū khó͘-chhó͘, éng-oán bōe thêng.

Chòe-āu ê Sím-phòaⁿ

11Āu-lâi, góa ū khòaⁿ-kìⁿ chi̍t ê pe̍h-sek ê tōa pó-chō, kap chē tī hit téng-bīn Hit-ūi; thiⁿ kap tōe tùi I ê bīn-chêng tô-cháu, chiū bô koh khòaⁿ--kìⁿ.

12Góa koh ū khòaⁿ-kìⁿ sí--khì ê lâng, bô-lūn pi-chiān á-sī chun-kùi, lóng khiā tī pó-chō chêng. Kì-lio̍k ê chheh lóng thí-khui; lēng-gōa chi̍t pún oa̍h-miā-chheh mā thí-khui. Sí--khì ê lâng chiàu in ê hêng-ûi, kun-kù chiah-ê chheh só͘ kì-chài--ê siū sím-phòaⁿ.

13Hái chiong i lāi-bīn ê sí-lâng kau--chhut-lâi; Sí-bông kap Im-hú mā chiong in lāi-bīn ê sí-lâng lóng kau--chhut-lâi. Ta̍k-ê lâng lóng chiàu ka-kī ê hêng-ûi siū sím-phòaⁿ.

14Āu-lâi, Sí-bông kap Im-hú siū hiat-lo̍h hé-ô͘. Chit-ê hé-ô͘ chiū-sī tē-jī piàn ê sí.

15Miâ bô kì-chài tī oa̍h-miā-chheh ê lâng lóng siū hiat-lo̍h hé-ô͘.

Khé-sī-lio̍k 20 - 現代台語譯本羅馬字版(TTVR)-闽南语

Learn More About Us