Í-sài-a-su 39

Í-sài-a-su 39 - 現代台語譯本羅馬字版(TTVR)-闽南语

Pa-pí-lûn Lâi ê Sù-chiá(2 Ông 20.12-19)

1Hit-sî, Pa-la-tān ê kiáⁿ Pa-pí-lûn-ông Bí-lô-ta̍t Pa-la-tān thiaⁿ-tio̍h Hi-se-ka phòa-pīⁿ, mā í-keng hó--khí-lâi, chiū chhe sù-chiá the̍h phoe kap lé-mi̍h khì thàm-hóng Hi-se-ka.

2Hi-se-ka chin hoaⁿ-hí chiap-thāi in, chiong i ê châi-pó-khò͘ lāi-bīn ê kim, gûn, hiuⁿ-liāu, kùi-khì ê iû, kap i só͘-ū ê kun-khì, í-ki̍p hú-khò͘ lāi ê it-chhè lóng hō͘ in khòaⁿ. I ê ông-kiong kap choân-kok só͘-ū ê mi̍h-kiāⁿ bô chi̍t hāng bô hō͘ in khòaⁿ.

3Āu-lâi sian-ti Í-sài-a lâi kìⁿ Hi-se-ka-ông, mn̄g i kóng, “Chiah-ê lâng tùi lí kóng sím-mi̍h? In tùi tó-ūi lâi kìⁿ lí?”

Hi-se-ka kóng, “In tùi chi̍t ê chin hn̄g ê kok-ka Pa-pí-lûn lâi thàm góa.”

4 Í-sài-a kóng, “In tī lí ê ông-kiong ū khòaⁿ-tio̍h sím-mi̍h?”

Hi-se-ka hôe-tap, “In ū khòaⁿ-tio̍h góa ông-kiong lāi ta̍k-hāng mi̍h. Góa só͘-ū ê châi-pó bô chi̍t hāng bô hō͘ in khòaⁿ.”

5 Í-sài-a kā Hi-se-ka kóng, “Tio̍h thiaⁿ Siōng Chú — Bān-kun ê Thóng-sòe ê ōe:

6Ji̍t-chí teh-beh kàu, ông-kiong lāi it-chhè lí ê chó͘-sian chek-chū kàu kin-á-ji̍t ê mi̍h-kiāⁿ, lóng ōe hō͘ lâng poaⁿ-khì Pa-pí-lûn, bô lâu kah pòaⁿ-hāng. Siōng Chú án-ni soan-kò.

7Koh lí chhin-siⁿ--ê, lí ê kiáⁿ-sun, ū-ê ōe hō͘ lâng lia̍h-khì Pa-pí-lûn-ông ê ông-kiong chòe thài-kàm.”

8 Hi-se-ka sim-lāi siūⁿ-kóng “Góa chāi-siⁿ ê sî ū thài-pêng an-choân chiū hó”, chiū tùi Í-sài-a kóng, “Lí só͘ thoân-ta̍t Siōng Chú ê ōe chin hó.”

Í-sài-a-su 39 - 現代台語譯本羅馬字版(TTVR)-闽南语

Learn More About Us