Í-se-kiat-su 22

Í-se-kiat-su 22 - 現代台語譯本羅馬字版(TTVR)-闽南语

Iâ-lō͘-sat-léng ê Chōe-ok

1Siōng Chú tùi góa kóng,

2“Jîn-chú ah, lí tio̍h giâm-giâm sím-phòaⁿ chit-ê lâu lâng ê huih ê siâⁿ! Tio̍h hō͘ i chheng-chhó chai ka-kī só͘ chòe it-chhè khó-ò͘ⁿ ê sū.

3Lí tio̍h kóng, Chì-koân ê Siōng Chú án-ni kóng, ‘Lí ū sat-hāi chin chōe lâng ê sìⁿ-miā, koh pài ngó͘-siōng phah lâ-sâm ka-kī; lí siū hêng-hoa̍t ê sî kàu lah.

4Lí hoān thâi-lâng ê chōe, koh hō͘ ka-kī chō ê ngó͘-siōng phah lâ-sâm; lí ê sî-ji̍t kàu lah, lí ê hè-sò͘ móa lah. Só͘-í, góa beh hō͘ lí siū lia̍t-kok lêng-jio̍k, siū bān-cho̍k thí-chhiò.

5Lí chit-ê hūn-loān koh chhàu-miâ móa thiⁿ-ē ê siâⁿ, bô-lūn sī hn̄g á-sī kūn ê kok-ka lóng beh thí-chhiò lí.

6“‘Lí khòaⁿ, Í-sek-lia̍t ê siú-léng lām-iōng koân-le̍k, sat-hāi jîn-bîn.

7Lín ū lâng ngó͘-ge̍k pē-bú, khi-ap kià-ku--ê, pháiⁿ khoán-thāi ko͘-jî kóaⁿ-hū.

8Lín biáu-sī góa ê sèng-só͘, bô siú An-hioh-ji̍t.

9Lín ū lâng chō-iâu hāi-sí lâng; ū lâng chia̍h soaⁿ-téng sîn-biō ê chè-mi̍h, kiâⁿ îm-loān.

10Lín ū lâng kap lāu-pē ê bó͘ ū sèng-koan-hē, kap keng-kî tiong ê hū-jîn-lâng chòe-hé khùn;

11ū lâng kap pa̍t-lâng ê bó͘ su-thong; ū lâng kiâⁿ îm-loān bú-jio̍k sin-pū; ū lâng kā kâng-pē ê chí-bē phah lâ-sâm.

12Lín ū lâng the̍h chîⁿ thâi-lâng; ū lâng m̄-nā chioh lâng chîⁿ the̍h lī-sek, koh pàng tāng-lī; ū lâng pak-siah chhù-piⁿ thàn put-gī-chi-châi. Lín í-keng kā góa bōe-kì--tit lah. Chì-koân ê Siōng Chú án-ni soan-kò.

13“‘In-ūi lín the̍h put-gī-chi-châi kap hoān thâi-lâng ê chōe, góa siū-khì tǹg toh-á.

14Tng góa hêng-hoa̍t lín ê sî, lín kiám chih-chài ōe tiâu? Lín ê chhiú kiám iáu ū khùi-la̍t? Góa Siōng Chú án-ni kóng, it-tēng án-ni chòe.

15Góa beh kā lí ê chū-bîn kóaⁿ-sòaⁿ khì lia̍t-kok, sì-sòaⁿ tī lia̍t-pang. Góa beh siau-tû lí ê ù-òe.

16Lín beh siū lia̍t-kok bú-jio̍k, án-ni lín chiū chai góa sī Siōng Chú.’”

Siōng-tè Thê-liān ê Tōa Hé-lô͘

17Siōng Chú tùi góa kóng,

18“Jîn-chú ah, góa khòaⁿ Í-sek-lia̍t-lâng sī chi̍t tui che-tái. In chhin-chhiūⁿ thê-liān gûn chhun--lo̍h-lâi ê tâng, thih, siah, iân ê che-tái.

19Só͘-í, Chì-koân ê Siōng Chú án-ni kóng, ‘In-ūi lín chiâⁿ-chòe bô lō͘-ēng ê che-tái, góa beh kā lín chū-chi̍p tī Iâ-lō͘-sat-léng.

20Chhin-chhiūⁿ lâng siu-chi̍p gûn, tâng, thih, siah, iân tī tōa hé-lô͘ thê-liān, góa beh tī góa ê tōa siū-khì tiong kā lín chū-chi̍p tī chit-ê siâⁿ-lāi sio-iûⁿ.

21Góa it-tēng beh chū-chi̍p lín, ēng góa tōa siū-khì ê iām-hé kā lín sio, lín beh tī hé-tiong siau-iûⁿ.

22Gûn án-chóaⁿ tī thê-liān ê hé-lô͘ lāi-bīn iûⁿ--khì, lín mā beh án-ni tī Iâ-lō͘-sat-léng siâⁿ-lāi siau-iûⁿ. Án-ni, lín chiū chai góa Siōng Chú ǹg lín piàⁿ tōa siū-khì lah.’”

Í-sek-lia̍t Léng-siù ê Chōe-ok

23Siōng Chú tùi góa kóng,

24“Jîn-chú ah, lí tio̍h kā Í-sek-lia̍t-lâng kóng, ‘Lín ê thó͘-tōe sī bô chheng-khì ê tōe. Só͘-í, tī góa tōa siū-khì hêng-hoa̍t lín ê sî, bô beh lo̍h-hō͘ hō͘ lín.’

25In ê sian-ti kè-bô͘ pháiⁿ-sū, chhin-chhiūⁿ hm̄-hm̄-háu ê sai thiah-li̍h la̍h-bu̍t. In sat-hāi jîn-bîn, chhiúⁿ-toa̍t châi-pó, hō͘ chin chōe hū-lú chiâⁿ-chòe kóaⁿ-hū.

26Chè-si khiok-kái góa ê lu̍t-hoat, siat-to̍k góa ê sèng-mi̍h. In bô hun-pia̍t sím-mi̍h sī sîn-sèng kap bô sîn-sèng ê mi̍h, mā bô kà lâng hun-piān sím-mi̍h sī chheng-khì á-sī bô chheng-khì ê mi̍h, koh khin-sī góa ê An-hioh-ji̍t. Kiat-kó, góa tī in tiong-kan siū siat-to̍k.

27In ê léng-siù chhin-chhiūⁿ chhâi-lông lia̍h la̍h-bu̍t thiah-li̍h in; in ūi-tio̍h beh tit-tio̍h put-gī-chi-châi thâi-lâng chhú lâng ê sìⁿ-miā.

28Sian-ti kā hiah-ê léng-siù am-khàm chōe-ok, chhin-chhiūⁿ lâng ēng pe̍h-he boah piah. In khòaⁿ ê īⁿ-siōng sī ké--ê, kóng ê ū-giân sī pe̍h-chha̍t. In kóng ‘Chì-koân ê Siōng Chú án-ni kóng’, kî-si̍t, góa Siōng Chú pèng bô kā in kóng sím-mi̍h.

29Tòa tī chia ê jîn-bîn koàn-sì ap-chè lâng, chhiúⁿ-toa̍t lâng ê mi̍h-kiāⁿ, khi-hū sàn-chhiah khùn-khó͘ ê lâng, pak-siah kià-ku ê lâng, lóng bô chiàu kong-tō.

30Góa tī in tiong-kan teh chhē, khòaⁿ sī m̄-sī ū lâng tī góa ê bīn-chêng ūi-tio̍h chit-ê kok-ka siu-kiàn siâⁿ-chhiûⁿ, khiā tī siâⁿ-chhiûⁿ phòa-khiah ê só͘-chāi, hō͘ góa bōe kā chit-ê kok-ka húi-bia̍t, m̄-kú chhē lóng bô.

31Só͘-í, góa tùi in piàⁿ-lo̍h góa ê hùn-lō͘; góa ê tōa siū-khì beh chhin-chhiūⁿ hé kā in sio. Góa beh chiàu in ê só͘-chòe kā in pò-èng.” Chì-koân ê Siōng Chú án-ni soan-kò.

Í-se-kiat-su 22 - 現代台語譯本羅馬字版(TTVR)-闽南语

Learn More About Us