Í-sài-a-su 44

Í-sài-a-su 44 - 現代台語譯本羅馬字版(TTVR)-闽南语

Siōng Chú Sī Î-it ê Siōng-tè

1Siōng Chú kóng:

Ngá-kok — góa ê po̍k-jîn, taⁿ tio̍h thiaⁿ;

góa só͘ kéng-soán ê Í-sek-lia̍t, thiaⁿ leh!

2Lia̍p-chō lí, tùi bú-thai chiū sok-chō lí,

beh pang-chān lí hit-ūi Siōng Chú án-ni kóng:

Góa ê po̍k-jîn Í-sek-lia̍t, m̄-bián kiaⁿ!

Lí sī góa só͘ thiàⁿ, só͘ kéng-soán--ê.

3Góa beh piàⁿ-lo̍h chúi hō͘ chhùi-ta ê tōe;

góa beh hō͘ ta-sò ê tōe ū khoe-chúi teh lâu.

Góa beh chiong góa ê sîn piàⁿ hō͘ lí ê hō͘-tāi,

beh sù hok-khì hō͘ lí ê kiáⁿ-sun.

4In ōe chhin-chhiūⁿ chháu tī chúi chhiong-chiok ê só͘-chāi tōa-châng,

chhin-chhiūⁿ liú-chhiū tī chúi ti̍t-ti̍t-lâu ê khoe-piⁿ seng-tióng.

5Ū lâng ōe kóng “Góa sio̍k Siōng Chú”;

lēng-gōa chi̍t ê kā ka-kī hō-miâ kiò Ngá-kok;

koh chi̍t ê tī chhiú ê téng-bīn siá “Siōng Chú ê”,

chū-chheng chòe Í-sek-lia̍t.

6Siōng Chú — thóng-tī Í-sek-lia̍t ê Kiù-sio̍k-chú,

Siōng Chú — Bān-kun ê Thóng-sòe án-ni kóng:

Góa sī khai-sí, góa sī kiat-sok;

góa í-gōa bô Siōng-tè.

7Siáⁿ-lâng ōe-tàng kap góa pí? Tio̍h chhut-lâi kóng!

Góa bat tùi kó͘-chá ê chú-bîn ū-kò beh hoat-seng ê tāi-chì,

i mā thang án-ni soan-kò chiong-lâi ê sū.

8Lín m̄-bián kiaⁿ, mā m̄-bián chhoah!

Góa kiám bô chá chiū tùi lín soan-kò?

Lín sī góa ê kiàn-chèng-jîn.

Góa í-gōa kiám ū Siōng-tè,

kiám ū hō͘ lín thang siám-bih ê chio̍h-pôaⁿ?

Góa chai, liân chi̍t ê to bô.

Ngó͘-siōng Bô Lō͘-ēng

9Só͘-ū chè-chō ngó͘-siōng ê lâng lóng bô lō͘-ēng; in só͘ kah-ì--ê lóng bô lī-ek. Pài ngó͘-siōng ê lâng lóng chhiⁿ-mî, bû-ti; in lóng ōe sit-pāi kiàn-siàu.

10Siáⁿ-lâng chè-chō sîn-bêng, chù-chō bô lō͘-ēng ê ngó͘-siōng?

11Lí khòaⁿ, i ê tâng-phōaⁿ lóng ōe kiàn-siàu; sai-hū put-kò sī lâng. Hō͘ in lóng chū-chi̍p óa--lâi, chún-pī chiūⁿ hoat-têng; in ōe kiaⁿ-hiâⁿ, lóng ōe kiàn-siàu.

12Phah-thih sai-hū kā thih khǹg tī hé-thòaⁿ lāi pû hō͘ âng, ēng ióng ê chhiú-kut giâ kòng-thûi phah-chhut hêng-thé. I nā iau, chiū bô la̍t; chhùi-ta bô lim-chúi, chiū ià-siān.

13Ba̍k-chhiūⁿ ēng chîn-sòaⁿ niû, ēng hún-pit ōe sòaⁿ, ēng kok-chióng khì-khū tiau-khek, ēng îⁿ-chhioh ōe bô͘, chiàu lâng ê khoán-sit chòe súi ê lâng-hêng chō ngó͘-siōng, kā i chhāi tī biō-lāi.

14I chhò pek-hiuⁿ-chhiū; koh kéng chheng-tông-chhiū kap siōng-chhiū hō͘ in tī chhiū-nâ lāi sêng-tióng; i chai-chèng siông-chhiū, thèng-hāu hō͘-chúi lūn-te̍k hō͘ i tōa-châng.

15Jiân-āu, chhiū chhò--khí-lâi chòe hé-chhâ; ū-ê the̍h-lâi hō͘ chhù-lāi khah sio-lō, ū-ê tiám-to̍h thang hang-piáⁿ chí-ki. Koh chi̍t-kóa chòe sîn-siōng kā kūi kā pài.

16Chi̍t-pòaⁿ ê chhâ, i khí-hé hang-bah lâi chia̍h, chia̍h kah boán-chiok. I mā ka-kī ná hang ná kóng, “Chán! Góa khòaⁿ hé teh to̍h, kám-kak chin sio-lō.”

17I ēng só͘ chhun ê chhâ chòe chi̍t ê sîn-bêng, chòe ngó͘-siōng, kūi lo̍h-khì kā pài, tùi i kî-tó kóng, “Lí sī góa ê sîn-bêng, kiù góa!”

18Chit-khoán lâng m̄ bat koh bōe lí-kái, in-ūi Siōng Chú kā in ê ba̍k-chiu kô͘--teh, hō͘ in khòaⁿ bōe tio̍h, sim-tì that--teh, bōe-hiáu siūⁿ.

19In lóng bô teh siūⁿ, bô tì-sek bô chhong-bêng thang kóng, “Chi̍t-pòaⁿ ê chhâ, góa ēng chòe hé-thòaⁿ hang-piáⁿ, mā hang-bah lâi chia̍h. Só͘ chhun ê chhâ góa kiám thang ēng lâi chō chi̍t ê ngó͘-siōng? Góa kiám thang kūi lo̍h-khì pài chi̍t tè chhâ-thâu?”

20In ēng hé-hu chún pn̄g chia̍h, gōng kah hō͘ lâng koái--khì, bô hoat-tō͘ kiù ka-kī. In m̄ sêng-jīn chhiú--ni̍h phóng ê ngó͘-siōng kun-pún m̄-sī sîn-bêng.

Siōng Chú — Chhòng-chō-chú kap Kiù-sio̍k-chú

21Siōng Chú án-ni kóng:

Ngá-kok ah, tio̍h ōe-kì-tit chiah-ê tāi-chì;

Í-sek-lia̍t ah, lí sī góa ê po̍k-jîn.

Góa sok-chō lí, lí sī góa ê po̍k-jîn;

Í-sek-lia̍t ah, góa it-tēng bōe kā lí bōe-kì--tit.

22Góa í-keng kā lí ê chōe-kò sàu-tû, chhin-chhiūⁿ kā ba̍t-hûn chhe-sòaⁿ;

chhat-siau lí ê chōe-ok, chhin-chhiūⁿ hō͘ po̍h-bū siau-sòaⁿ.

Tio̍h kui-ǹg góa, in-ūi góa ū kiù-sio̍k lí.

23Chiah-ê thiⁿ ah, tio̍h hoaⁿ-hí chhiùⁿ-koa,

in-ūi Siōng Chú ū chòe chit-hāng tāi-chì!

Tōe ê chhim-khiⁿ ah, tio̍h tōa-siaⁿ hoah!

Tōa-soaⁿ sió-soaⁿ ah, tio̍h chhut-siaⁿ chhiùⁿ-koa!

Chhiū-nâ kap lāi-bīn só͘-ū ê chhiū ah, tio̍h chhiùⁿ!

In-ūi Siōng Chú ū kiù-sio̍k Ngá-kok,

I beh thong-kè Í-sek-lia̍t hián-sī I ê êng-iāu!

24Hō͘ lí tī bú-thai chiâⁿ-hêng, kiù-sio̍k lí ê Siōng Chú án-ni soan-pò͘:

Góa sī Siōng Chú, sī bān-mi̍h ê Chhòng-chō-chú.

Góa thí-khui thiⁿ ê sî, tan-to̍k chi̍t ê;

góa pho͘ tōe ê sî, chí-ū góa ka-kī chi̍t ê.

25Góa hō͘ ké sian-ti ê tiāu-thâu hūn-loān,

hō͘ pok-kòa ê lâng ū-chhek sit-hāu.

Góa hō͘ ū tì-hūi ê lâng kiàn-siàu thè-āu,

ū tì-sek ê lâng pìⁿ gû-gōng.

26Góa hō͘ góa po̍k-jîn ê ōe tit-tio̍h chèng-si̍t,

hō͘ góa sù-chiá ê kè-ōe si̍t-hiān.

Koan-hē Iâ-lō͘-sat-léng, góa kóng: Beh ū lâng tī hia khiā-khí;

koan-hē Iû-tāi ê siâⁿ-chhī, góa kóng: Góa beh kā in khí-chō;

í-keng pìⁿ hong-po͘ ê só͘-chāi, góa kā in tiông-kiàn.

27Góa tùi chhim-ian kóng: Tio̍h ta--khì!

Góa beh hō͘ lí ê hô-liû lóng ta-ta--khì.

28Góa tùi Sài-ló͘-sū kóng: Lí tio̍h thòe góa bo̍k-ióng;

lí tio̍h oân-sêng góa ê chí-ì.

I ōe hā-lēng tiông-kiàn Iâ-lō͘-sat-léng,

têng-sin hē sèng-tiān ê tōe-ki.

Í-sài-a-su 44 - 現代台語譯本羅馬字版(TTVR)-闽南语

Learn More About Us