Si-phian 91 - 現代台語譯本羅馬字版(TTVR)-闽南语

Siōng-tè Sī Lán ê Pó-hō͘-chiá

1Chhē Chì-koân ê Siōng-tè chòe pī-lān-só͘ ê lâng,

ōe khiā-khí tī Choân-lêng-chiá ê ìm-ńg-ē.

2I tùi Siōng Chú kóng, “Lí sī góa ê pī-lān-só͘, góa ê pó-lúi,

sī góa só͘ óa-khò ê Siōng-tè.”

3Siōng Chú beh kiù lí thoat-lī tng chiáu-á ê lô-bāng,

kap tì-miā ê un-e̍k.

4I beh ēng si̍t kā lí áⁿ--teh,

hō͘ lí bih tī I ê si̍t-kó͘-ē;

I ê sìn-si̍t chòe tōa-sòe ê tún-pâi pó-hō͘ lí.

5Lí bián kiaⁿ mî--sî ê khióng-pò͘,

á-sī ji̍t--sî siā--lâi ê chìⁿ;

6mā m̄-bián kiaⁿ o͘-àm tiong liû-hêng ê un-e̍k,

á-sī ji̍t tiong-tàu húi-bia̍t lâng ê to̍k-chèng.

7Ū kui-chheng lâng lek lo̍h-khì lí ê tò-pêng,

ū kui-bān lâng tó lo̍h-khì lí ê chiàⁿ-pêng,

chiah-ê chai-lān bōe lîm-kàu lí.

8M̄-kú lí ōe chhin-ba̍k khòaⁿ--kìⁿ,

ōe khòaⁿ-tio̍h pháiⁿ-lâng siū pò-èng.

9Lí chhē Siōng Chú chòe pī-lān-só͘,

ēng Chì-koân Siōng-tè chòe khiā-khí ê só͘-chāi;

10chai-hāi bōe lîm-kàu lí,

un-e̍k mā bōe óa-kūn lí ê pò͘-pîⁿ.

11In-ūi I beh ūi-tio̍h lí hoan-hù I ê sù-chiá,

tī lí só͘ kiâⁿ it-chhè ê lō͘ pó-hō͘ lí.

12In beh ēng chhiú hû lí,

hō͘ lí ê kha bōe tak-tio̍h chio̍h.

13Lí beh ēng kha chàm sai kap to̍k-chôa,

ta̍h-chhùi béng-sai kap tōa-bé chôa.

14Siōng-tè kóng, “In-ūi i chin thiàⁿ góa, góa beh kái-kiù i;

in-ūi i bat góa ê miâ, góa beh kā i an-tì tī an-choân ê só͘-chāi.

15I kiû-kiò góa, góa beh ìn i;

i tī gûi-kip ê sî, góa beh kap i tông-chāi;

góa beh kái-kiù i, hō͘ i ū chun-êng.

16Góa beh sù i tn̂g-hè-siū hō͘ i boán-chiok,

hō͘ i khòaⁿ-kìⁿ góa ê kiù-un.”

Learn More About Us