Iâ-lī-bí-su 27

Iâ-lī-bí-su 27 - 現代台語譯本羅馬字版(TTVR)-闽南语

Iâ-lī-bí Taⁿ Gû-taⁿ

1 Iok-se-a ê kiáⁿ Se-tí-ka

khai-sí choh-ông thóng-tī Iû-tāi-kok ê sî, Siōng Chú ê ōe lîm-kàu Iâ-lī-bí.

2Siōng Chú tùi góa kóng, “Lí tio̍h ēng soh kap chhâ-kông chòe taⁿ, hē tī lí ê ām-kún,

3jiân-āu chiong ē-bīn ê sìn-sit úi-thok lâi Iâ-lō͘-sat-léng kìⁿ Iû-tāi-ông Se-tí-ka hiah-ê gōa-kok sù-chiá, thoân-ta̍t hō͘ Í-tong-ông, Mô͘-ap-ông, A-bûn-ông, Thài-ní-ông, Se-tùn-ông;

4chhiáⁿ in kā in ê ông kóng, ‘Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Lín tio̍h tùi lín ê chú-lâng kóng:

5Góa ēng tōa koân-lêng, ēng tōa khùi-la̍t chhòng-chō tāi-tōe í-ki̍p tōe-chiūⁿ ê lâng kap tōng-bu̍t; góa khòaⁿ sím-mi̍h-lâng khah sek-ha̍p chiū chiong tāi-tōe kau hō͘ i.

6Hiān-chāi góa chiong chiah-ê kok kau hō͘ góa ê po̍k-jîn Pa-pí-lûn-ông Nî-pò͘-kah-nî-sat, mā chiong iá-gōa ê tōng-bu̍t kau hō͘ i koán-lí.

7Lia̍t-kok lóng beh ho̍k-sāi i, i ê kiáⁿ, kap i ê sun, ti̍t-kàu i ê kok-ka soe-pāi; hit-sî, ōaⁿ i tio̍h ho̍k-sāi chiah-ê kok kap kun-ông.

8“‘Nā ū tó chi̍t cho̍k, tó chi̍t kok m̄-khéng ho̍k-sāi Pa-pí-lûn-ông Nî-pò͘-kah-nî-sat, ām-kún m̄-khéng taⁿ i ê taⁿ, góa it-tēng beh ēng chiàn-loān, ki-hng, un-e̍k hêng-hoa̍t hiah-ê kok-ka, ti̍t-kàu góa thong-kè Pa-pí-lûn-ông ê chhiú kā in siau-bia̍t. Siōng Chú án-ni soan-kò.’

9M̄-kú lín Iû-tāi jîn-bîn m̄-thang thiaⁿ lín ê sian-ti, pok-kòa--ê, kái-bāng--ê, khòaⁿ thian-siōng--ê, kiâⁿ siâ-su̍t--ê ê ōe; in kā lín kóng, ‘Lín it-tēng bōe ho̍k-sāi Pa-pí-lûn-ông.’

10Kî-si̍t in kóng ê ū-giân sī ké--ê, tian-tò ōe hō͘ lín liû-bông khì chin hn̄g ê só͘-chāi; góa beh kā lín kóaⁿ--chhut-khì, hō͘ lín bia̍t-bông.

11Nā ū tó chi̍t kok khéng taⁿ Pa-pí-lûn-ông ê taⁿ, ho̍k-sāi i, góa it-tēng beh hō͘ hit-ê cho̍k lâu tī i pún-kok chèng-choh, khiā-khí. Siōng Chú án-ni soan-kò.”

12Góa mā chiong chiah-ê ōe lóng tùi Iû-tāi-ông Se-tí-ka kóng, “Lín ê ām-kún tio̍h taⁿ Pa-pí-lûn-ông hō͘ lín ê taⁿ, ho̍k-sāi i kap i ê jîn-bîn, chiah ōe-tàng seng-chûn.

13Lí kap lí ê jîn-bîn ná tio̍h in-ūi chiàn-loān, ki-hng, un-e̍k bia̍t-bông, chhin-chhiūⁿ Siōng Chú tùi hiah-ê m̄-khéng ho̍k-sāi Pa-pí-lûn-ông ê kok-ka só͘ kóng--ê án-ni.

14M̄-thang thiaⁿ hiah-ê sian-ti tùi lín kóng ê ōe, in kóng ‘Lín bōe ho̍k-sāi Pa-pí-lûn-ông’, kî-si̍t in ê ū-giân lóng sī pe̍h-chha̍t.

15Siōng Chú kóng, ‘Góa bô chhe-phài in, in kèng-jiân lī-iōng góa ê miâ kóng ké ū-giân. Lín nā thiaⁿ in ê ōe, góa chiū beh chiong lín kap hiah-ê kā lín kóng ké ū-giân ê sian-ti kóaⁿ--chhut-khì, hō͘ lín chòe-hé bia̍t-bông.’”

16Góa koh tùi chè-si kap chiah-ê jîn-bîn kóng, “Siōng Chú án-ni kóng, ‘Lín m̄-thang thiaⁿ hiah-ê sian-ti kā lín kóng ê ōe, in kóng: Khòaⁿ leh, Siōng Chú sèng-tiān ê khì-khū bô-jōa-kú lóng ōe tùi Pa-pí-lûn poaⁿ--tò-lâi. Kî-si̍t in kóng--ê sī pe̍h-chha̍t-ōe.

17M̄-thang sìn in ê ōe. Tio̍h ho̍k-sāi Pa-pí-lûn-ông, án-ni chiah ōe-tàng seng-chûn. Ná tio̍h hō͘ chit-ê siâⁿ pìⁿ-chòe hong-po͘?

18In nā sī chin ê sian-ti, chin-chiàⁿ ū Siōng Chú ê ōe thoân hō͘ in, in eng-kai tio̍h kî-kiû Siōng Chú — Bān-kun ê Thóng-sòe, hō͘ sèng-tiān, Iû-tāi ông-kiong, kap Iâ-lō͘-sat-léng lāi-bīn chhun--lo̍h-lâi ê khì-khū, bōe hō͘ lâng chhiúⁿ-khì Pa-pí-lûn.’”

19Siōng Chú — Bān-kun ê Thóng-sòe kóng-tio̍h koan-hē tâng-thiāu, tâng-hái, phûn-chō, í-ki̍p iáu lâu tī chit-ê siâⁿ ê khì-khū;

20chiū-sī Pa-pí-lûn-ông Nî-pò͘-kah-nî-sat lia̍h Iok-ngá-kèng ê kiáⁿ Iû-tāi-ông Iok-ngá-kun, í-ki̍p Iû-tāi kap Iâ-lō͘-sat-léng ê koaⁿ-oân ê sî, bô poaⁿ-khì Pa-pí-lûn ê khì-khū;

21koan-hē sèng-tiān kap Iû-tāi ông-kiong lāi-bīn, í-ki̍p Iâ-lō͘-sat-léng chhun--lo̍h-lâi ê khì-khū, Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng,

22“Chiah-ê khì-khū it-tēng ōe hō͘ lâng poaⁿ-khì Pa-pí-lûn, khǹg tī hia, ti̍t-kàu góa koh-chài koàn-kò͘ in hit-ji̍t. Góa Siōng Chú án-ni soan-pò͘. Kàu hit-sî, góa it-tēng ōe chiong chiah-ê khì-khū tòa tńg-lâi chit-tè thó͘-tōe.”

Iâ-lī-bí-su 27 - 現代台語譯本羅馬字版(TTVR)-闽南语

Learn More About Us