Si-phian 20 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Kî-kiû Siōng-tè

1Goān Siōng Chú tī hoān-lān ê ji̍t ìn-tap lí;

goān Ngá-kok ê Siōng-tè kā lí khǹg tī koân ê só͘-chāi pó-hō͘ lí.

2Goān I tùi sèng-só͘ pang-chān lí,

tùi Sek-an hû-chhî lí.

3Goān I ōe-kì-tit lí it-chhè ê sò͘-chè,

chiap-la̍p lí ê sio-hòa-chè.

4Goān I chiàu lí ê sim só͘ ài sù hō͘ lí,

sêng-choân lí it-chhè ê kè-ōe.

5Goán beh in-ūi lí ê tek-sèng chhiùⁿ-koa;

goán beh hōng Siōng-tè ê miâ khèng-chiok lí ê sèng-lī.

Goān Siōng Chú sêng-choân lí it-chhè ê kî-kiû.

6Taⁿ góa chai Siōng Chú ōe kiù I soán-li̍p ê ông,

ōe tùi I sèng ê thiⁿ ìn-tap ông;

ēng I chiàⁿ-chhiú ê khùi-la̍t hō͘ i tōa sèng-lī.

7Ū lâng óa-khò chhia, ū lâng óa-khò bé;

m̄-kú goán chí-ū beh khoa-kháu Siōng Chú — goán ê Siōng-tè ê miâ.

8In ōe thâi-su tó--lo̍h-khì;

goán ōe thâi-iâⁿ khiā-chāi-chāi.

9Siōng Chú ah, kiû lí hō͘ goán ê ông sèng-lī;

goán kiû-kiò ê sî, kiû lí ìn-tap.

Learn More About Us