Í-sài-a-su 21

Í-sài-a-su 21 - 現代台語譯本羅馬字版(TTVR)-闽南语

Pa-pí-lûn Tó-hoāi ê Īⁿ-siōng

1Che sī iú-koan iân-hái khòng-iá ê sìn-sit.

Kńg-lê-á-hong tùi lâm-pō͘ ê soa-bô͘ sàu--kè-lâi,

tùi khòng-iá, tùi khióng-pò͘ ê tōe lâi.

2Góa ū khòaⁿ-kìⁿ chhiⁿ-chhám ê īⁿ-siōng:

Pōe-poān ê lâng kè-sio̍k pōe-poān;

phò-hoāi ê lâng it-ti̍t phò-hoāi.

Í-lân, chiūⁿ-khì kong-kek!

Bí-tí-a, kā i pau-ûi!

Siōng Chú beh kiat-sok Pa-pí-lûn só͘ chō-sêng ê thòng-khó͘.

3Só͘-í, góa ê io ke̍k-lia̍t thàng-thiàⁿ,

chhin-chhiūⁿ sán-hū teh chhui-chūn.

Góa kiaⁿ kah sím-mi̍h to thiaⁿ bōe tio̍h;

góa chhoah kah sím-mi̍h to khòaⁿ bô.

4Góa ê sim hūn-loān,

khióng-pò͘ hō͘ góa phi̍h-phi̍h-chhoah;

góa só͘ ì-ài ê hông-hun hō͘ góa gi̍h-gi̍h-chùn.

5In pâi-siat iàn-se̍k,

tōe-thán pho͘ hó-sè,

ia̍h-chia̍h-ia̍h-lim.

“Léng-siù, khí--lâi!

Ēng iû chhat tún-pâi!”

6Chú kā góa kóng,

“Lí khì, khì an-pâi chi̍t ê siú-bōng--ê,

kiò i kā lí pò-kò i khòaⁿ--tio̍h ê sū.

7I ōe khòaⁿ-tio̍h kun-tūi,

bé-peng chi̍t-tùi chi̍t-tùi,

koh ū khiâ lû-á--ê,

khiâ lo̍k-tô--ê.

I tio̍h thiaⁿ,

tio̍h chù-ì thiaⁿ!”

8Jiân-āu siú-bōng--ê hoah kóng,

“Chú ah, góa ta̍k-ji̍t khiā-teh siú-bōng,

ta̍k-mî tī siú-bōng-tâi khàn-siú.

9Khòaⁿ leh, bé-peng lâi lah!

Chi̍t-tùi chi̍t-tùi teh lâi!”

Āu-lâi i koh hoah kóng,

“Pa-pí-lûn tó--lo̍h-khì lah, tó--lo̍h-khì lah!

It-chhè ê sîn-bêng ngó͘-siōng

lóng kòng-chhùi lak kah kui thô͘-kha.”

10O͘h, lín siū phah-chhùi, tó kah kui phah-be̍h-tiûⁿ, góa ê tông-pau ah,

góa tùi Siōng Chú — Bān-kun ê Thóng-sòe, Í-sek-lia̍t ê Siōng-tè thiaⁿ--tio̍h-ê, góa lóng kā lín kóng lah!

Iú-koan Í-tong ê Sìn-sit

11Che sī iú-koan Í-tong ê sìn-sit.

Ū lâng tùi Í-tong teh hoah, kóng,

“Siú-bōng--ê, hiān-chāi kúi kiⁿ?

Siú-bōng--ê, mî--sî koh jōa kú chiah ōe kè--khì?”

12Siú-bōng--ê ìn kóng,

“Chá-khí-sî teh-beh lâi ah, m̄-kú iáu-sī mî--sî.

Lí nā ài mn̄g, chòe lí mn̄g,

mā thang koh tńg-lâi mn̄g.”

Iú-koan A-la-pek ê Sìn-sit

13Che sī iú-koan A-la-pek ê sìn-sit.

Tī A-la-pek ê chhiū-nâ hioh-mî ê Tí-tān siong-tūi ah,

14tio̍h the̍h chúi lâi hō͘ chhùi-ta ê lâng lim.

Thê-má ê chū-bîn ah,

tio̍h tòa chia̍h-mi̍h hō͘ tô-lān ê lâng chia̍h.

15In-ūi in tô-pī to-kiàm,

teh tô-siám í-keng pu̍ih-chhut ê to-kiàm;

in siám-pī í-keng giú--khui ê keng,

teh tô-siám béng-lia̍t ê chiàn-cheng.

16Chú tùi góa kóng, “Tī chi̍t nî lāi, chiàu chhiàⁿ-kang chhiam-iok ê nî-hān, Ki-ta̍t só͘-ū ê êng-hôa lóng ōe bô--khì;

17gia̍h keng-chìⁿ ê Ki-ta̍t ióng-sū ōe chhun chin chió.” Siōng Chú — Í-sek-lia̍t ê Siōng-tè án-ni soan-kò.

Í-sài-a-su 21 - 現代台語譯本羅馬字版(TTVR)-闽南语

Learn More About Us