Iok-su-a-kì 5

Iok-su-a-kì 5 - 現代台語譯本羅馬字版(TTVR)-闽南语

1 Iok-tàn-hô sai-pêng ê A-mô͘-lī chu-ông kap óa Tōe-tiong-hái ê Ka-lâm chu-ông, thiaⁿ-kìⁿ Siōng Chú tī Í-sek-lia̍t-lâng ê bīn-chêng hō͘ Iok-tàn-hô ê chúi ta--khì, koh thèng-hāu in kè--khì; chiah-ê ông ê sim lóng in-ūi Í-sek-lia̍t-lâng ê iân-kò͘ kiaⁿ kah sîn-put-hū-thé.

Tī Kiat-kah Kiâⁿ Kat-lé

2Hit-sî, Siōng Chú tùi Iok-su-a kóng, “Lí tio̍h ēng hé-chio̍h bôa-chòe to, tē-jī piàn kā Í-sek-lia̍t-lâng kiâⁿ kat-lé.”

3Iok-su-a chiū chè-chō hé-chio̍h-to, tī Kat-lé-soaⁿ kā Í-sek-lia̍t-lâng kiâⁿ kat-lé.

4Iok-su-a kā in kiâⁿ kat-lé ê goân-in sī án-ni: Tùi Ai-ki̍p chhut--lâi hiah-ê ōe kau-chiàn ê ta-po͘-lâng lóng sí tī khòng-iá ê lō͘--ni̍h,

5in lóng ū siū kat-lé; m̄-kú chhut Ai-ki̍p í-āu tī khòng-iá chhut-sì ê jîn-bîn lóng iáu-bē siū kat-lé.

6Í-sek-lia̍t-lâng tī khòng-iá kiâⁿ sì-cha̍p nî, chhut Ai-ki̍p ê chiàn-sū in-ūi bô thiaⁿ-thàn Siōng Chú ê ōe, lóng siū siau-bia̍t; Siōng Chú bat tùi in soan-sè, m̄ hō͘ in khòaⁿ-tio̍h Siōng Chú tùi in ê lia̍t-chó͘ li̍p-sè beh siúⁿ-sù in ê tōe, chiū-sī lâu lin kap bi̍t ê tōe.

7In ê kiáⁿ-sun, chiū-sī Siōng Chú só͘ heng-khí sin ê chi̍t tāi, lóng iáu-bē siū kat-lé, in-ūi tī lō͘--ni̍h bô lâng kā in kiâⁿ kat-lé, Iok-su-a chiah kā in kiâⁿ.

8Só͘-ū ê Í-sek-lia̍t-lâng lóng siū kat-lé liáu-āu, chiū lâu tī iâⁿ-lāi, thèng-hāu hôe-ho̍k.

9Siōng Chú tùi Iok-su-a kóng, “Góa kin-á-ji̍t í-keng tû-khì lín tī Ai-ki̍p só͘ siū ê kiàn-siàu.” Só͘-í, hit só͘-chāi chiū kiò-chòe Kiat-kah

, kàu kin-á-ji̍t.

10Hit-sî, Í-sek-lia̍t-lâng tī Kiat-kah chat-iâⁿ; hit-ge̍h cha̍p-sì àm, in tī Iâ-lī-ko pêng-goân siú Pôaⁿ-kè-choeh.

11Pôaⁿ-kè-choeh keh-ji̍t, in chiū chia̍h hit só͘-chāi ê thó͘-sán, chiū-sī bô-kàⁿ-piáⁿ kap hang ê ngó͘-kok.

12In chia̍h hit só͘-chāi ê thó͘-sán hit-ji̍t khí, má-ná bô koh kàng-lo̍h; Í-sek-lia̍t-lâng chiū bô koh ū má-ná. Hit-nî in khai-sí chia̍h Ka-lâm-tōe ê thó͘-sán.

Iok-su-a kap Siōng Chú Kun-tūi ê Thóng-sòe

13 Iok-su-a chiap-kūn Iâ-lī-ko ê sî, hut-jiân khòaⁿ-tio̍h ū chi̍t ê lâng gia̍h chi̍t ki pu̍ih--khí-lâi ê to, khiā tī i ê tùi-bīn; Iok-su-a kiâⁿ chìn-chêng, mn̄g i kóng, “Lí sī ūi goán chit-pêng--ê, á-sī ūi goán ê tùi-te̍k hit-pêng?”

14I ìn kóng, “Lóng m̄-sī. Góa sī Siōng Chú kun-tūi ê thóng-sòe. Taⁿ góa lâi lah!”

Iok-su-a chiū phak tī thô͘-kha pài i, kóng, “Góa ê Chú tùi lí ê po̍k-jîn ū sím-mi̍h hoan-hù?”

15Siōng Chú kun-tūi ê thóng-sòe tùi Iok-su-a kóng, “Chiong lí kha--ni̍h ê ôe thǹg--khí-lâi, in-ūi lí khiā ê só͘-chāi sī sèng--ê.” Iok-su-a chiū chiàu án-ni chòe.

Iok-su-a-kì 5 - 現代台語譯本羅馬字版(TTVR)-闽南语

Learn More About Us