Hi-pek-lâi-su 1

Hi-pek-lâi-su 1 - 現代台語譯本羅馬字版(TTVR)-闽南语

Siōng-tè Thong-kè I ê Kiáⁿ tùi Lán Kóng-ōe

1Siōng-tè tī kó͘-chá ū thong-kè I ê chèng sian-ti, chin chōe piàn, ēng chin chōe hong-sek tùi lán ê chó͘-sian kóng-ōe,

2m̄-kú tī chiong-boa̍t ê ji̍t-chí, thong-kè I ê Kiáⁿ tùi lán kóng-ōe. Siōng-tè ū chí-tēng I choh bān-iú ê kè-sêng-jîn, koh ū thong-kè I chhòng-chō ú-tiū.

3I hoán-siā Siōng-tè ê êng-iāu, sī Siōng-tè pún-chit ê chin-siōng. I ēng I koân-lêng ê ōe hû-chhî bān-iú, sóe-tû lâng ê chōe liáu-āu, chē tī Chì-chun Chì-koân Siōng-tè ê chiàⁿ-pêng.

Kiáⁿ Pí Thiⁿ-sài khah Úi-tāi

4Siōng-tè ū sù Kiáⁿ pí chèng thiⁿ-sài khah chun-kùi ê miâ, hō͘ I chiâⁿ-chòe pí thiⁿ-sài khah úi-tāi.

5Siōng-tè m̄-bat tùi jīm-hô chi̍t ê thiⁿ-sài kóng:

Lí sī góa ê Kiáⁿ,

góa kin-á-ji̍t siⁿ lí.

I mā m̄-bat tùi jīm-hô chi̍t ê thiⁿ-sài kóng:

Góa beh chòe i ê Pē,

i beh chòe góa ê Kiáⁿ.

6Koh Siōng-tè chhe-khián I ê Tōa-kiáⁿ ji̍p sè-kan ê sî, I kóng:

Siōng-tè só͘-ū ê thiⁿ-sài lóng tio̍h pài I.

7Koan-hē thiⁿ-sài, I kóng:

Siōng-tè ēng hong chòe I ê thiⁿ-sài,

ēng hé-iām chòe I ê chhe-ēng.

8M̄-kú koan-hē Kiáⁿ, I kóng:

Siōng-tè ah, lí ê pó-chō éng-éng-oán-oán chûn-chāi;

lí ê Kok ê koân-pèng sī chèng-ti̍t ê koân-pèng.

9Lí ì-ài kong-gī, oàn-hūn put-hoat.

Só͘-í, Siōng-tè — lí ê Siōng-tè kéng-soán lí,

ēng hoaⁿ-hí ê iû boah lí, chhiau-kè boah lí ê tâng-phōaⁿ.

10I koh kóng:

Chú ah, lí tī khí-thâu kā tōe hē tōe-ki;

thiⁿ mā-sī lí chhin-chhiú chhòng-chō.

11Thiⁿ-tōe lóng ōe siau-sit,

m̄-kú lí éng-oán chûn-chāi.

Thiⁿ-tōe lóng ōe chhin-chhiūⁿ

i-ho̍k chiām-chiām kū,

12lí ōe chhin-chhiūⁿ kńg gōa-saⁿ kā in kńg--khí-lâi;

in ōe chhin-chhiūⁿ i-ho̍k kái-piàn.

M̄-kú lí éng-oán bōe kái-piàn;

lí ê hè-siū bû-kiông-chīn.

13Siōng-tè kiám bat tùi tó chi̍t ê thiⁿ-sài kóng:

Lí chē góa ê chiàⁿ-pêng,

thèng-hāu góa hō͘ lí ê tùi-te̍k khut-ho̍k tī lí kha-ē?

14Thiⁿ-sài lóng sī teh ho̍k-sāi ê sîn, siū chhe-phài khì ho̍k-bū teh-beh niá-siū chín-kiù ê lâng.

Hi-pek-lâi-su 1 - 現代台語譯本羅馬字版(TTVR)-闽南语

Learn More About Us