Bí-ka-su 1

Bí-ka-su 1 - 現代台語譯本羅馬字版(TTVR)-闽南语

1Ē-bīn sī Siōng Chú tùi Mô͘-lī-siat-lâng Bí-ka khé-sī ê ōe; che sī Iû-tāi-ông Iok-thán, A-hap-su, Hi-se-ka sòa-chiap chip-chèng ê sî, Bí-ka só͘ khòaⁿ--kìⁿ iú-koan Sat-má-lī-a kap Iâ-lō͘-sat-léng ê īⁿ-siōng.

Sian-ti Chhiùⁿ Ai-ko

2Bān-bîn ah, tio̍h thiaⁿ!

Choân-tōe kap só͘-ū tiàm tī hit lāi-bīn--ê, lóng tio̍h chù-ì thiaⁿ.

Chì-koân ê Siōng Chú beh tùi I ê Sèng-tiān chí-chèng lín ê m̄-tio̍h.

3Khòaⁿ leh, Siōng Chú beh tùi I tòa ê só͘-chāi chhut--lâi,

kàng-lîm, kha ta̍h tī tōe koân ê só͘-chāi.

4Chèng-soaⁿ ōe tī I ê kha-ē iûⁿ--khì,

chhin-chhiūⁿ la̍h tú-tio̍h hé;

soaⁿ-kok ōe li̍h--khui,

chhin-chhiūⁿ tōa-chúi chhiong-lo̍h soaⁿ-phiâⁿ.

5Che lóng sī in-ūi Ngá-kok ê chōe-kò,

in-ūi Í-sek-lia̍t-ke ê chōe-ok;

Ngá-kok ê chōe-kò sī sím-mi̍h?

Kiám m̄-sī Sat-má-lī-a?

Iû-tāi ê chōe-ok sī sím-mi̍h?

Kiám m̄-sī Iâ-lō͘-sat-léng?

6Só͘-í, góa beh hō͘ Sat-má-lī-a pìⁿ-chòe hong-po͘, chiâⁿ-chòe thô͘-tui,

chòe chèng phû-tô ê só͘-chāi;

góa beh chiong i ê siâⁿ-chhiûⁿ chhia lo̍h-khì soaⁿ-kok,

hō͘ i lō͘-chhut tōe-ki.

7 Sat-má-lī-a tiau-khek ê ngó͘-siōng lóng ōe siū phah-chhùi,

i chòe chhiong-ki tit--tio̍h ê châi-bu̍t ōe hō͘ hé sio--khì;

góa beh hō͘ só͘-ū ê ngó͘-siōng pìⁿ-chòe hòe-bu̍t.

Sat-má-lī-a chòe chhiong-ki thàn ê chîⁿ,

ōe koh hō͘ lâng the̍h-khì khai tī chhiong-ki ê sin-chiūⁿ.

8 Bí-ka kóng: In-ūi án-ni, góa tōa-siaⁿ ai-khàu,

chhiah-sin-lō͘-thé kiâⁿ-lâi-kiâⁿ-khì;

góa beh âu-kiò chhin-chhiūⁿ chhâi-lông,

ai-khàu chhin-chhiūⁿ tô-chiáu.

9In-ūi Sat-má-lī-a ê siong bōe-i--tit,

í-keng thòaⁿ kàu Iû-tāi,

kàu góa chú-bîn ê siâⁿ-mn̂g-kháu,

sīm-chì thòaⁿ kàu Iâ-lō͘-sat-léng.

Tùi-te̍k Pek-kūn Iâ-lō͘-sat-léng

10M̄-thang tī Ka-te̍k soan-thoân chit-ê tāi-chì,

mā m̄-thang thî-khàu;

tio̍h tī Pek A-hut-la ê tîn-ai téng kō-lâi-kō-khì.

11 Sa-húi ê chū-bîn ah, lín ōe chhiah-sin-lō͘-thé kiàn-siàu,

Sat-lâm ê chū-bîn cháu bōe chhut--lâi;

Pek Í-siat-lâng ai-khàu, in-ūi in sit-khì in só͘ óa-khò--ê.

12 Má-lu̍t ê chū-bîn pek-chhiat kî-thāi kái-kiù,

in-ūi chai-hō í-keng tùi Siōng Chú hia lâi kàu Iâ-lō͘-sat-léng ê siâⁿ-mn̂g-kháu.

13 La-kiat ê chū-bîn ah, tio̍h chiong chiàn-chhia thò tī khoài-má chún-pī tô-lān;

in-ūi lí o̍h Í-sek-lia̍t pōe-poān Siōng-tè,

chhōa Sek-an ê chú-bîn hoān-chōe.

14Lí tio̍h ēng lé-mi̍h kā Mô͘-lī-siat Ka-te̍k sàng-pia̍t;

Í-sek-lia̍t ê kun-ông ōe hō͘ A-kek-sek-ke phiàn--khì.

15 Má-lī-sa ê chū-bîn ah, góa beh chhōa cheng-ho̍k-chiá kàu lí hia;

Í-sek-lia̍t ê kùi-cho̍k ōe tô-cháu khì A-tō͘-lân.

16 Iû-tāi-ke ah, tio̍h ūi só͘ thiàⁿ ê jî-lú thì ka-kī ê thâu,

thì kah chhin-chhiūⁿ thuh-thâu-eng kng-kng-kng;

in-ūi in lóng siū hòng-tio̍k lī-khui lín.

Bí-ka-su 1 - 現代台語譯本羅馬字版(TTVR)-闽南语

Learn More About Us