Lī-bī-kì 14

Lī-bī-kì 14 - 現代台語譯本羅馬字版(TTVR)-闽南语

Bâ-hong-pīⁿ Kiat-chēng ê Tiâu-lē

1Siōng Chú bēng-lēng Mô͘-se, kóng:

2Bâ-hong pīⁿ-lâng tit-tio̍h chheng-khì ê sî, tio̍h chiàu ē-bīn ê tiâu-lē chòe: Tio̍h kā i chhōa-khì kìⁿ chè-si.

3Chè-si tio̍h chhut-khì iâⁿ-gōa kā i kiám-cha; pīⁿ-lâng ê chèng-thâu nā í-keng hó,

4chè-si tio̍h hoan-hù lâng ūi-tio̍h hit-ê beh tit-tio̍h chheng-khì ê lâng, chhú nn̄g chiah lé-gî-siōng chheng-khì oa̍h-oa̍h ê chiáu, pek-hiuⁿ-chhâ, chu-âng-sek ê se, kap gû-chhek-chháu;

5koh hoan-hù lâng tī tóe oa̍h-chúi ê chho͘-hûi khì-khū téng-bīn thâi kî-tiong ê chi̍t chiah chiáu-á.

6Jiân-āu, chè-si tio̍h lia̍h hit-chiah oa̍h-chiáu, kap pek-hiuⁿ-chhâ, chu-âng-sek ê se, í-ki̍p gû-chhek-chháu, chìm tī hit-chiah tī oa̍h-chúi téng-bīn thâi ê chiáu-á ê huih lāi-bīn.

7I tio̍h chiong huih tī hit-ê beh tit-tio̍h chheng-khì ê lâng ê seng-khu téng hiù chhit piàn, chiū soan-pò͘ i sī chheng-khì, koh kā hit-chiah oa̍h-chiáu pàng-khì iá-gōa.

8Beh tit-tio̍h chheng-khì ê lâng tio̍h sóe ka-kī ê saⁿ, chiong mn̂g lóng thì--khí-lâi, sóe seng-khu, i chiū chheng-khì. Jiân-āu, i thang ji̍p iâⁿ, m̄-kú tio̍h seng tī ka-kī ê pò͘-pîⁿ gōa tòa chhit ji̍t.

9Kàu tē-chhit ji̍t, i tio̍h chiong kui seng-khu ê mn̂g thì--khí-lâi, pau-koat thâu-mn̂g, chhùi-chhiu, ba̍k-bâi, koh sóe-saⁿ, sóe seng-khu; án-ni i chiū oân-choân chheng-khì.

10Tē-poeh ji̍t, i tio̍h tòa nn̄g chiah bô hâ-chhû ê iûⁿ-káng-á, kap chi̍t chiah chi̍t hè bô hâ-chhû ê iûⁿ-bú-á, koh the̍h saⁿ kong-kun chhiau-iû ê iù mī-hún, kap saⁿ-hūn-chi-it kong-seng ê iû lâi.

11Chú-chhî kiat-chēng-lé ê chè-si tio̍h chhōa hit-ê beh tit-tio̍h chheng-khì ê lâng, tòa hiah-ê mi̍h-kiāⁿ lâi hōe-bō͘ mn̂g-kháu, khiā tī Siōng Chú bīn-chêng.

12Chè-si tio̍h hiàn chi̍t chiah iûⁿ-káng-á kap saⁿ-hūn-chi-it kong-seng ê iû chòe pê-chōe-chè, kā iô-iô--leh chòe chè-mi̍h hiàn hō͘ Siōng Chú.

13I tio̍h tī thâi sio̍k-chōe-chè kap sio-hòa-chè cheng-siⁿ ê só͘-chāi, thâi hit-chiah iûⁿ-káng-á. Pê-chōe-chè kap sio̍k-chōe-chè kâng-khoán tio̍h kui hō͘ chè-si; che sī chì-sèng--ê.

14Chè-si tio̍h the̍h chi̍t-kóa pê-chōe-chè ê huih, boah tī beh tit-tio̍h chheng-khì ê lâng chiàⁿ-pêng ê hī-chu, í-ki̍p chiàⁿ-kha kap chiàⁿ-chhiú ê tōa-thâu-bú;

15koh tùi hit saⁿ-hūn-chi-it kong-seng ê iû tò chi̍t-kóa tī ka-kī tò-chhiú ê chhiú-sim,

16ēng chiàⁿ-chhiú chi̍t ki chńg-thâu-á ùn tò-pêng chhiú-sim ê iû, tī Siōng Chú ê bīn-chêng hiù iû chhit piàn.

17Āu-lâi, i tio̍h koh ùn chhiú-sim ê iû, boah tī hit-ê beh tit-tio̍h chheng-khì ê lâng chiàⁿ-pêng ê hī-chu, í-ki̍p chiàⁿ-kha kap chiàⁿ-chhiú ê tōa-thâu-bú, chiū-sī boah tī tú-chiah boah-kè pê-chōe-chè ê huih ê téng-bīn.

18Chè-si tio̍h chiong chhiú-sim chhun ê iû, boah tī hit-ê beh tit-tio̍h chheng-khì ê lâng ê thâu-khak téng. Chè-si chiū án-ni tī Siōng Chú ê bīn-chêng kā hit-ê lâng sio̍k-chōe.

19Chè-si tio̍h ūi-tio̍h hit-ê beh tit-tio̍h chheng-khì ê lâng hiàn sio̍k-chōe-chè, kā i sio̍k-chōe, jiân-āu thâi hit-chiah sio-hòa-chè ê cheng-siⁿ.

20Chè-si tio̍h tī chè-tôaⁿ téng hiàn sio-hòa-chè kap sò͘-chè, ūi-tio̍h i sio̍k-chōe; i chiū chheng-khì.

21Nā ū lâng sàn-chhiah, bōe-tàng chún-pī hiah chōe, chiū tio̍h tòa chi̍t chiah iûⁿ-káng-á chòe pê-chōe-chè, tī Siōng Chú ê bīn-chêng iô-iô--leh ūi i sio̍k-chōe; koh tio̍h tòa chi̍t kong-kun chhiau-iû ê iù mī-hún kap saⁿ-hūn-chi-it kong-seng ê iû chòe sò͘-chè;

22koh chiàu ka-kī ê châi-le̍k chhú nn̄g chiah pan-kah á-sī hún-chiáu-á-kiáⁿ, chi̍t chiah chòe sio̍k-chōe-chè, chi̍t chiah chòe sio-hòa-chè.

23Tē-poeh ji̍t, i tio̍h chiong chiah-ê tòa-lâi hōe-bō͘ mn̂g-kháu, tī Siōng Chú ê bīn-chêng kau hō͘ chè-si, thang tit-tio̍h chheng-khì.

24Chè-si tio̍h the̍h pê-chōe-chè ê iûⁿ-á kap saⁿ-hūn-chi-it kong-seng ê iû, tī Siōng Chú ê bīn-chêng iô-iô--leh chòe chè-mi̍h.

25Chè-si tio̍h thâi pê-chōe-chè ê iûⁿ-á, the̍h chi̍t-kóa pê-chōe-chè ê huih, boah tī beh tit-tio̍h chheng-khì ê lâng chiàⁿ-pêng ê hī-chu, í-ki̍p chiàⁿ-kha kap chiàⁿ-chhiú ê tōa-thâu-bú;

26koh tò chi̍t-kóa iû tī ka-kī tò-chhiú ê chhiú-sim,

27ēng chiàⁿ-chhiú chi̍t ki chńg-thâu-á ùn tò-pêng chhiú-sim ê iû, tī Siōng Chú ê bīn-chêng hiù chhit piàn.

28Āu-lâi, i tio̍h koh ùn chhiú-sim ê iû, boah tī hit-ê beh tit-tio̍h chheng-khì ê lâng chiàⁿ-pêng ê hī-chu, í-ki̍p chiàⁿ-kha kap chiàⁿ-chhiú ê tōa-thâu-bú, chiū-sī boah tī tú-chiah boah-kè pê-chōe-chè ê huih ê téng-bīn.

29Chè-si tio̍h chiong chhiú-sim chhun ê iû, boah tī hit-ê beh tit-tio̍h chheng-khì ê lâng ê thâu-khak téng. I chiū án-ni tī Siōng Chú ê bīn-chêng kā hit-ê lâng sio̍k-chōe.

30Hit-ê lâng tio̍h chiàu ka-kī ê châi-le̍k hiàn chi̍t chiah pan-kah á-sī hún-chiáu-á-kiáⁿ,

31chiū-sī chiàu i ê khùi-la̍t, chi̍t chiah chòe sio̍k-chōe-chè, chi̍t chiah chòe sio-hòa-chè, kap sò͘-chè chòe-hé hiàn. Chè-si chiū án-ni tī Siōng Chú ê bīn-chêng kā hit-ê lâng sio̍k-chōe.

32Í-siōng sī ū lâng tì-tio̍h bâ-hong, ài tit-tio̍h chheng-khì, m̄-kú bô châi-le̍k chiàu kui-tēng hōng-hiàn lé-mi̍h só͘ tēng ê tiâu-lē.

Iú-koan Chhù Siⁿ-ko͘ ê Tiâu-lē

33Siōng Chú bēng-lēng Mô͘-se kap A-lûn, kóng:

34Lín khì kàu góa siúⁿ-sù lín chòe ke-gia̍p ê Ka-lâm-tōe ê sî, góa hō͘ lín tit-tio̍h chòe ke-gia̍p ê tōe ê chhù nā siⁿ-ko͘,

35chhù ê chú-lâng tio̍h khì kā chè-si pò-kò, kóng, “Goán chhù ká-ná ū siⁿ-ko͘.”

36Chè-si ji̍p-khì hit-keng chhù kiám-cha í-chêng, tio̍h hoan-hù lâng chiong chhù piàⁿ-khang, chiah bián chhù-lāi só͘-ū ê mi̍h-kiāⁿ pìⁿ-chòe bô chheng-khì; āu-lâi i chiah ji̍p-khì kiám-cha hit-keng chhù.

37Chè-si tio̍h kiám-cha hit-keng chhù siⁿ-ko͘ ê chêng-hêng; nā hoat-kiàn hit-keng chhù ê piah ū le̍k-sek á-sī âng-sek lap--lo̍h-khì ê hûn-jiah, chhim-ji̍p piah-lāi,

38i tio̍h chhut-khì mn̂g-gōa, kā hit-keng chhù hong chhit ji̍t.

39Tē-chhit ji̍t, chè-si tio̍h koh khì kiám-cha; nā hoat-kiàn siⁿ-ko͘ ê hûn-jiah ū thòaⁿ-khui,

40i tio̍h hoan-hù lâng chiong hiah-ê siⁿ-ko͘ ê chio̍h-thâu ó͘--khí-lâi, hiat tī siâⁿ-gōa bô chheng-khì ê só͘-chāi;

41koh hoan-hù lâng khau chhù-lāi sì-chiu-ûi ê piah; chiong khau--lo̍h-lâi ê he-thô͘ piàⁿ tī siâⁿ-gōa bô chheng-khì ê só͘-chāi;

42jiân-āu ēng pa̍t só͘-chāi ê chio̍h-thâu, tāi-thòe hiah-ê ó͘--chhut-lâi ê chio̍h-thâu, koh ēng he-thô͘ boah hit-keng chhù.

43Hit-keng chhù tī ó͘ chio̍h-thâu, khau piah, boah he-thô͘ liáu-āu, nā hoat-kiàn koh ū siⁿ-ko͘,

44chè-si tio̍h koh ji̍p-khì kiám-cha; siⁿ-ko͘ ê chêng-hêng nā thòaⁿ kàu kui-keng chhù, hit-keng chhù sī jiám-tio̍h ok-sèng ê ko͘, sī bô chheng-khì.

45Hit-keng chhù tio̍h thiah-tiāu, hiah-ê chio̍h-thâu, chhâ-liāu, kap só͘-ū ê he-thô͘ lóng tio̍h poaⁿ chhut-khì siâⁿ-gōa bô chheng-khì ê só͘-chāi.

46Hit-keng chhù hong-ba̍t ê kî-kan, nā ū lâng ji̍p--khì, i tī ji̍t lo̍h í-chêng sī bô chheng-khì.

47Tī hit-keng chhù khùn--kè, lim-chia̍h ê lâng lóng tio̍h sóe in ê saⁿ.

48Hit-keng chhù boah he-thô͘ liáu-āu, chè-si tio̍h ji̍p-khì kiám-cha; siⁿ-ko͘ ê chêng-hêng nā bô thòaⁿ-khui, chè-si chiū tio̍h soan-pò͘ hit-keng chhù sī chheng-khì, in-ūi siⁿ-ko͘ ê chêng-hêng í-keng siau-sit.

49Ūi-tio̍h beh hō͘ hit-keng chhù tit-tio̍h chheng-khì, tio̍h chhú nn̄g chiah chiáu-á, pek-hiuⁿ-chhâ, chu-âng-sek ê se, kap gû-chhek-chháu;

50tio̍h tī tóe oa̍h-chúi ê chho͘-hûi ê khì-khū téng-bīn thâi kî-tiong ê chi̍t chiah chiáu-á.

51Jiân-āu, chè-si tio̍h the̍h pek-hiuⁿ-chhâ, gû-chhek-chháu, chu-âng-sek ê se, kap hit-chiah oa̍h-chiáu, chìm tī hit-chiah thâi-sí ê chiáu-á ê huih kap oa̍h-chúi lāi-bīn, kā hit-keng chhù hiù chhit piàn.

52I tio̍h ēng hit-chiah chiáu-á ê huih, oa̍h-chúi, oa̍h-chiáu, pek-hiuⁿ-chhâ, gû-chhek-chháu, kap chu-âng-sek ê se, kiat-chēng hit-keng chhù.

53M̄-kú i tio̍h chiong hit-chiah oa̍h-chiáu pàng-khì siâⁿ-gōa ê iá-tōe; án-ni, i kā hit-keng chhù kiâⁿ kiat-chēng-lé, hit-keng chhù chiū chheng-khì.

54Í-siōng sī iú-koan bâ-hong-pīⁿ, lia̍p-á,

55saⁿ kap chhù siⁿ-ko͘,

56phê-hu chéng, siⁿ-sián, pe̍h-pan só͘ li̍p ê tiâu-lē,

57ēng lâi kàu-tō lâng chai sím-mi̍h sī chheng-khì, sím-mi̍h sī bô chheng-khì. Che sī koan-hē bâ-hong-pīⁿ ê tiâu-lē.

Lī-bī-kì 14 - 現代台語譯本羅馬字版(TTVR)-闽南语

Learn More About Us