Si-phian 43 - 現代台語譯本羅馬字版(TTVR)-闽南语

Liû-bông-chiá ê Kî-tó

1Siōng-tè ah, kiû lí chú-chhî kong-tō,

tùi bô kèng-ùi lí ê kok thòe góa sin-oan;

kiû lí kiù góa thoat-lī kan-chà put-gī ê lâng.

2Lí sī góa ê Siōng-tè, góa ê pó-lúi;

lí sī-án-chóaⁿ pàng-sak góa?

Góa sī-án-chóaⁿ tio̍h in-ūi tùi-te̍k ê ap-pek pi-siong kiâⁿ-lâi-kiâⁿ-khì?

3Kiû lí hián-chhut lí ê kng kap chin-si̍t lâi ín-chhōa góa,

chhōa góa khì lí ê sèng-soaⁿ, kàu lí ê hōe-bō͘.

4Góa chiū lâi Siōng-tè ê chè-tôaⁿ,

kàu góa ke̍k-tōa hoaⁿ-hí ê Siōng-tè hia.

Siōng-tè, góa ê Siōng-tè ah, góa beh tôaⁿ-khîm chheng-chàn lí.

5Góa ê sim ah, lí sī-án-chóaⁿ ut-chut,

sī-án-chóaⁿ tī góa lāi-bīn haiⁿ-haiⁿ-chhan?

Tio̍h gióng-bōng Siōng-tè;

góa iáu-kú beh chheng-chàn I,

in-ūi I sī góa ê Chín-kiù-chiá, góa ê Siōng-tè.

Learn More About Us