Sin-bēng-kì 14

Sin-bēng-kì 14 - 現代台語譯本羅馬字版(TTVR)-闽南语

Kìm-chí Song-lé ê Khiàn-sńg

1Lín sī Siōng Chú — lín ê Siōng-tè ê chú-bîn, m̄-thang ūi-tio̍h sí-lâng koah-siong ka-kī ê seng-khu, á-sī thâu-hia̍h thì-kng-kng,

2in-ūi lín sī kui-sio̍k Siōng Chú — lín ê Siōng-tè sèng-kiat ê chú-bîn; Siōng Chú ū tùi tōe-chiūⁿ bān-bîn ê tiong-kan kéng-soán lín, chòe I te̍k-pia̍t ê chú-bîn.

Chheng-khì kap Bô Chheng-khì ê Tōng-bu̍t(Lī 11.1-47)

3Só͘-ū thang iàm-ò͘ⁿ ê mi̍h, lín lóng m̄-thang chia̍h.

4Ē-bīn sī lín thang chia̍h ê cheng-siⁿ: gû, mî-iûⁿ, soaⁿ-iûⁿ,

5lo̍k, lêng-iûⁿ, chhiah-lo̍k, iá-soaⁿ-iûⁿ, bî-lo̍k, chhiah-iûⁿ, kiuⁿ-á.

6Só͘-ū pun-tôe koh hoan-chháu ê cheng-siⁿ, lín lóng thang chia̍h.

7M̄-kú, kan-ta ū hoan-chháu, á-sī kan-ta ū pun-tôe ê cheng-siⁿ, lín m̄-thang chia̍h, chiū-sī: lo̍k-tô, thò͘-á, chio̍h-hoan, in-ūi in ū hoan-chháu bô pun-tôe, tùi lín sī bô chheng-khì.

8Ti, ū pun-tôe, m̄-kú bô hoan-chháu, tùi lín mā-sī bô chheng-khì. Chiah-ê tōng-bu̍t ê bah lín m̄-thang chia̍h; in ê si-thé mā m̄-thang bong.

9Chúi-tiong ū-kî ū-lân--ê, lín lóng thang chia̍h;

10só͘-ū bô-kî bô-lân--ê, lín m̄-thang chia̍h, in-ūi in tùi lín sī bô chheng-khì.

11Chheng-khì ê chiáu, lín lóng thang chia̍h.

12M̄-thang chia̍h--ê sī: eng, hiau, tiau,

13iân, sió-eng, bā-hio̍h kap i ê lūi,

14o͘-a kap i ê lūi,

15tô-chiáu, iā-eng, hî-eng, chhiok-eng kap i ê lūi,

16àm-kong-chiáu, ko͘-n̂g, niau-thâu-eng,

17thê-ô͘, chhàu-thâu-eng, lô͘-chî,

18ho̍h, pe̍h-lēng-si kap i ê lūi, tì-kè-chiáu, kap bi̍t-pô.

19Só͘-ū ū-si̍t koh ōe-sô--ê, tùi lín sī bô chheng-khì, lín m̄-thang chia̍h;

20m̄-kú ōe pe koh chheng-khì--ê, lín lóng thang chia̍h.

21Chū-jiân sí ê tōng-bu̍t, lín lóng m̄-thang chia̍h, m̄-kú thang hō͘ lín siâⁿ-lāi kià-ku ê lâng chia̍h, á-sī bōe hō͘ gōa-cho̍k-lâng; in-ūi lín sī kui hō͘ Siōng Chú — lín ê Siōng-tè sèng-kiat ê chú-bîn.

M̄-thang ēng soaⁿ-iûⁿ-bú ê lin chú i ê kiáⁿ.

Cha̍p-hūn-chi̍t Hōng-hiàn ê Kui-lē

22Ta̍k-nî, lín tio̍h tùi iā-chéng só͘ siu-sêng chhân-hn̂g ê chhut-sán, cha̍p hūn thiu chi̍t hūn.

23Lín tio̍h tī Siōng Chú — lín ê Siōng-tè kéng-soán hō͘ lín ho̍k-sāi I ê só͘-chāi, tī I ê bīn-chêng chia̍h só͘ hōng-hiàn cha̍p-hūn-chi̍t ê ngó͘-kok, chiú, iû, kap thâu-chiūⁿ-siⁿ ê gû iûⁿ; án-ni lín thang ha̍k-si̍p siông-siông kèng-ùi Siōng Chú — lín ê Siōng-tè.

24Siōng Chú — lín ê Siōng-tè sù-hok lín, I só͘ kéng-soán ê só͘-chāi nā lī lín siuⁿ hn̄g, lín bōe-tàng tòa beh hōng-hiàn ê chè-mi̍h khì hia,

25lín thang ōaⁿ chòe gûn, kā i pau--khí-lâi, the̍h tī chhiú--ni̍h, khì Siōng Chú — lín ê Siōng-tè kéng-soán hō͘ lín kèng-pài I ê só͘-chāi.

26Lín thang chiàu lín ê ì-sù ēng chiah-ê gûn bóe gû, iûⁿ, po̍h-chiú, kāu-chiú, á-sī kî-tha lín khòaⁿ-chòe hó ê mi̍h; tī hia, lín kap lín ê ka-koàn tio̍h tī Siōng Chú — lín ê Siōng-tè bīn-chêng chòe-hé lim-chia̍h hoaⁿ-hí.

27Lín tio̍h chiàu-kò͘ tòa tī lín tiong-kan ê Lī-bī-lâng, in-ūi in tī lín tiong-kan bô pun-tio̍h sán-gia̍p.

28Múi saⁿ nî, tio̍h chiong tē-saⁿ nî siu-sêng ê cha̍p-hūn-chi̍t, ūn-lâi khǹg tī siâⁿ-lāi;

29lín tiong-kan bô pun-tio̍h sán-gia̍p ê Lī-bī-lâng, í-ki̍p tòa tī lín tiong-kan ê chhut-gōa-lâng, ko͘-jî, kap kóaⁿ-hū, lóng thang lâi chia̍h kàu pá; án-ni, Siōng Chú — lín ê Siōng-tè ōe in-ūi lín só͘ chòe chiah-ê it-chhè ê sū, sù hok-khì hō͘ lín.

Sin-bēng-kì 14 - 現代台語譯本羅馬字版(TTVR)-闽南语

Learn More About Us