Si-phian 109

Si-phian 109 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Kî-kiû Pò-èng Pháiⁿ-lâng

1Góa só͘ chheng-chàn ê Siōng-tè ah, kiû lí m̄-thang chēng-chēng,

2in-ūi siâ-ok kan-chà ê lâng khui-chhùi kong-kek góa;

in ēng pe̍h-chha̍t ê chi̍h tùi góa kóng-ōe.

3In ēng oàn-hūn ê ōe pau-ûi góa,

bô-iân-bô-kò͘ kong-kek góa.

4Góa thiàⁿ in, in hoán-tńg chòe góa ê tùi-te̍k;

góa iáu-kú ūi in kî-tó.

5In tùi góa ēng pháiⁿ pò hó,

ēng oàn-hūn pò jîn-ài.

6Kiû lí phài chi̍t ê pháiⁿ-lâng koán-hat i,

phài chi̍t ê tùi-te̍k khiā tī i chiàⁿ-pêng khòng-kò i.

7Kiû lí hō͘ i tī sím-phòaⁿ ê sî siū tēng-chōe,

hō͘ i ê kî-tó mā sǹg-chòe chōe.

8Kiû lí hō͘ i ê sìⁿ-miā kín kiat-sok,

hō͘ pa̍t-lâng tāi-thòe i ê chit-ūi.

9Kiû lí hō͘ i ê kiáⁿ-jî pìⁿ-chòe ko͘-jî,

hō͘ i ê bó͘ pìⁿ-chòe kóaⁿ-hū.

10Kiû lí hō͘ i ê kiáⁿ-jî sì-kòe kiû-khit,

tùi in ê phòa-chhù hō͘ lâng kóaⁿ--chhut-khì.

11Kiû lí hō͘ chè-chú chhiúⁿ i it-chhè só͘-ū,

hō͘ siⁿ-hūn-lâng chhiúⁿ-toa̍t i lô-khó͘ tit--tio̍h ê châi-bu̍t.

12Kiû lí hō͘ i bô tit-tio̍h hó khoán-thāi,

bô lâng khó-lîn i ê ko͘-jî.

13Kiû lí hō͘ i ê hō͘-tāi toān-choa̍t,

in ê miâ-jī siū chhat-siau, bô thoân kàu ē chi̍t tāi.

14Kiû Siōng Chú ōe-kì-tit i chó͘-sian ê chōe-ok,

hō͘ i lāu-bú ê chōe-kò bô tit-tio̍h chhat-siau.

15Kiû Siōng Chú hō͘ in ê chōe-ok put-sî tī lí bīn-chêng,

hō͘ in ê miâ tùi sè-kan siau-bia̍t.

16In-ūi i bô siūⁿ-beh si lîn-bín,

hoán-tńg ap-pek sàn-chhiah khùn-khó͘ ê lâng,

hāi-sí siong-sim ê lâng.

17I ài chiù-chó͘, goān chiù-chó͘ lîm-kàu i;

I bô ài chiok-hok, goān chiok-hok lī-khui i hn̄g-hn̄g.

18I ēng chiù-chó͘ chòe saⁿ chhēng,

chiù-chó͘ chiū chhin-chhiūⁿ chúi ji̍p i ê pak-lāi,

chhin-chhiūⁿ iû ji̍p i ê kut.

19Goān chit-ê chiù-chó͘ chòe i-ho̍k chhēng tī i seng-khu,

chòe io-tòa put-sî kā i hâ-tiâu-tiâu.

20Che chiū-sī i tùi Siōng Chú só͘ siū ê pò-èng;

i sī góa ê tùi-te̍k, ēng pháiⁿ-ōe kong-kek góa ê sìⁿ-miā.

21Chì-koân ê Siōng Chú ah, kiû lí in-ūi lí ê miâ ê iân-kò͘ hó khoán-thāi góa,

chiàu lí chì-siān ê chû-ài khan-kiù góa.

22In-ūi góa sàn-chhiah khùn-khó͘,

góa ê lāi-sim siū-siong.

23Góa ê hè-siū chhin-chhiūⁿ ji̍t-iáⁿ chiām-chiām chhiâ;

góa chhin-chhiūⁿ chháu-meh hō͘ lâng pōaⁿ-tiāu.

24Góa in-ūi kìm-chia̍h kha-thâu-u sng-nńg;

góa siau-sán-lo̍h-bah.

25Góa siū in húi-pòng;

in khòaⁿ-tio̍h góa chiū hàiⁿ-thâu.

26Siōng Chú — góa ê Siōng-tè ah, kiû lí pang-chān góa,

chiàu lí ê chû-ài chín-kiù góa,

27hō͘ in chai che sī lí chhin-chhiú só͘ chòe,

sī Siōng Chú lí só͘ chòe--ê.

28In sui-jiân chiù-chó͘ góa, lí ōe sù-hok hō͘ góa;

in khí-lâi kong-kek góa ê sî ōe tú-tio̍h kiàn-siàu,

m̄-kú lí ê po̍k-jîn ōe hoaⁿ-hí.

29Kiû lí hō͘ góa ê tùi-te̍k ēng lêng-jio̍k chòe saⁿ chhēng,

ēng kiàn-siàu chòe phàu moa.

30Góa beh ēng góa ê chhùi tōa-tōa kám-siā Siōng Chú;

góa beh tī chèng-lâng ê tiong-kan chheng-chàn I.

31I beh khiā tī sàn-chhiah-lâng ê chiàⁿ-pêng,

kiù i thoat-lī phòaⁿ i sí-chōe ê lâng.

Si-phian 109 - 現代台語譯本羅馬字版(TTVR)-闽南语

Learn More About Us