Iâ-lī-bí-su 14

Iâ-lī-bí-su 14 - 現代台語譯本羅馬字版(TTVR)-闽南语

Thang-kiaⁿ ê Khòng-hān

1Siōng Chú tùi Iâ-lī-bí kóng-khí iú-koan khòng-hān ê sū.

2 Iû-tāi ai-siong, i ê siâⁿ-tìn soe-bî,

jîn-bîn chē tī thô͘-kha thî-khàu;

Iâ-lō͘-sat-léng thî-khàu ê siaⁿ thàu kàu thiⁿ-téng.

3Hó-gia̍h-lâng chhe lô͘-po̍k khì chhiūⁿ-chúi;

in khì kàu chúi-tî chhē bô chúi,

tòa khang-khang ê khì-khū,

kiàn-siàu, sit-bāng, tà thâu-khak tò--lâi.

4Thiⁿ bô lo̍h-hō͘, thó͘-tōe pit-li̍h;

choh-sit-lâng mā sit-bāng tà thâu-khak.

5In-ūi bô chháu-liāu,

iá lo̍k-bú pàng-sak i siⁿ ê lo̍k-á-kiáⁿ.

6Iá-lû khiā tī bô chháu koân ê só͘-chāi,

chhin-chhiūⁿ chhâi-lông chhoán tōa-khùi,

in-ūi bô chháu thang chia̍h, ba̍k-chiu sit-sîn.

7Siōng Chú ah, goán ê chōe nā khòng-kò goán,

sui-jiân goán chōe-chōe piàn pōe-poān lí,

put-sî tek-chōe lí,

kiû lí in-ūi lí ê miâ ê iân-kò͘ chín-kiù goán.

8Lí sī Í-sek-lia̍t ê ǹg-bāng,

sī goán kan-lân ê sî ê kiù-chú.

Lí sī-án-chóaⁿ chhin-chhiūⁿ chhut-gōa-lâng,

kè chi̍t mî chiū lī-khui?

9Lí sī-án-chóaⁿ chhin-chhiūⁿ tio̍h-chhiⁿ-kiaⁿ,

bô khùi-la̍t kiù-lâng ê ióng-sū?

Siōng Chú, lí khak-si̍t tī goán tiong-kan,

goán sī lí ê,

kiû lí m̄-thang lī-khui goán.

10Koan-hē chiah-ê lâng, Siōng Chú án-ni kóng, “In chin ài chiàu ka-kī ê ì-sù sì-kòe cháu, bô beh iok-sok ka-kī ê kha-pō͘, só͘-í góa bōe chiap-la̍p in. Taⁿ, góa beh kā in ê chōe kì--teh, kā in hêng-hoa̍t.”

11Siōng Chú koh tùi góa kóng, “Lí m̄-bián ūi-tio̍h chiah-ê jîn-bîn tùi góa kiû-chêng.

12In chiū-sī kìm-chia̍h kî-tó, góa mā bô beh thiaⁿ; chiū-sī hiàn sio-hòa-chè kap sò͘-chè, góa mā m̄ chiap-la̍p. Góa tian-tò beh ēng to-kiàm, ki-hng, un-e̍k kā in châu-bia̍t.”

13Góa chiū kóng, “Chì-koân ê Siōng Chú ah, hiah-ê sian-ti bat tùi in kóng, ‘Lín bōe ū chiàn-loān, bōe ū ki-hng, in-ūi Siōng Chú ū èng-ún beh tī chit-ê só͘-chāi siúⁿ-sù lín éng-oán ê pêng-an.’”

14M̄-kú Siōng Chú tùi góa kóng, “Hiah-ê sian-ti ēng góa ê miâ kóng pe̍h-chha̍t. Góa bô chhe-phài in, mā bô bēng-lēng in, kun-pún to bô tùi in kóng-ōe. In tùi lín kóng ê ū-giân sī hu-ké ê īⁿ-siōng, sī bô lō͘-ēng ê pok-kòa, sī tùi in sim-lāi chhut--lâi khúi-chà ê ōe.

15Só͘-í, kóng-tio̍h hiah-ê ēng góa ê miâ kóng pe̍h-chha̍t ê sian-ti, góa bô chhe-phài in; in kóng chit-ê só͘-chāi bōe ū chiàn-cheng kap ki-hng, góa tian-tò beh ēng án-ni kā in siau-bia̍t.

16Hiah-ê thiaⁿ in kóng pe̍h-chha̍t-ōe ê jîn-bîn mā ōe ū siâng-khoán ê kiat-kio̍k; in kap in bó͘-kiáⁿ ê sin-si bô lâng tâi, ōe hō͘ lâng hiat tī Iâ-lō͘-sat-léng ê koe-lō͘. Góa beh in-ūi in ê siâ-ok kā in pò-èng.”

17Siōng Chú hoan-hù góa tio̍h tùi chiah-ê jîn-bîn kóng:

Goān góa ê ba̍k-sái mî-ji̍t lâu bô-soah,

in-ūi góa só͘ thiàⁿ ê jîn-bîn siū-siong chin giâm-tiōng.

18Góa chhut-khì chhân-iá,

khòaⁿ-tio̍h hō͘ to thâi-sí ê lâng;

kiâⁿ-ji̍p siâⁿ,

khòaⁿ-tio̍h in-ūi ki-hng soah phòa-pīⁿ ê lâng.

Chè-si kap sian-ti liû-bông,

khì kàu in m̄-chai ê só͘-chāi.Jîn-bîn Kiû Siōng Chú Lîn-bín

19Lí kiám oân-choân khì-sak Iû-tāi?

Lí kiám chin-chiàⁿ iàm-ò͘ⁿ Sek-an?

Lí sī-án-chóaⁿ kā goán phah kah

hō͘ goán bōe-i--tit?

Goán kî-thāi hēng-hok hoân-êng, m̄-kú bô chi̍t hāng hó;

goán kî-thāi i-tī ê ki-hōe, m̄-kú kiaⁿ-hiâⁿ hut-jiân lâi kàu.

20Siōng Chú ah, goán sêng-jīn ka-kī ê chōe,

sêng-jīn goán chó͘-sian ê chōe-kò;

goán ū tek-chōe lí.

21Kiû lí in-ūi lí ê miâ ê iân-kò͘, bô khì-sak goán,

bô hō͘ lí êng-kng ê pó-chō siū bú-jio̍k;

kiû lí ōe-kì-tit lí kap goán só͘ li̍p ê iok.

22Gōa-cho̍k hu-ké ê sîn-bêng, tó chi̍t ê ōe hō͘ thiⁿ lo̍h-hō͘?

Thiⁿ kiám ōe ka-kī lo̍h-hō͘?

Kiám m̄-sī chí-ū lí Siōng Chú — goán ê Siōng-tè chiah ōe!

Goán ê ǹg-bāng chāi-tī lí,

in-ūi chiah-ê it-chhè lóng sī lí chō--ê.

Iâ-lī-bí-su 14 - 現代台語譯本羅馬字版(TTVR)-闽南语

Learn More About Us