Chhut-ai-ki̍p-kì 39

Chhut-ai-ki̍p-kì 39 - 現代台語譯本羅馬字版(TTVR)-闽南语

Chòe Chè-si Sèng ê Lé-ho̍k(Chhut 28.1-14)

1Chiah-ê sai-hū chiàu Siōng Chú tùi Mô͘-se ê hoan-hù, ēng nâ-sek, chí-sek, chu-âng-sek ê se, ēng iù-kang chòe A-lûn tī sèng-só͘ ho̍k-sāi beh chhēng ê sèng ê lé-ho̍k.

2In ēng kim-sòaⁿ, kap nâ-sek, chí-sek, chu-âng-sek ê se, í-ki̍p so--kè ê iù-môa chòe í-hut-tek;

3chiū-sī chiong kim-á phah hō͘ po̍h-po̍h-po̍h, chián chòe sòaⁿ, chham tī nâ-sek, chí-sek, chu-âng-sek ê se, kap iù-môa, ēng kî-khá ê chhiú-lō͘ chit chòe-hé.

4In koh chòe keng-tòa, kap í-hut-tek ê siang-pêng liân chòe-hé.

5Í-hut-tek ê io-tòa kap í-hut-tek kâng-khoán ēng kî-khá ê chhiú-lō͘, ēng kim-sòaⁿ kap nâ-sek, chí-sek, chu-âng-sek ê se, í-ki̍p so--kè ê iù-môa chit--khí-lâi, kap í-hut-tek liân-chòe chi̍t ê, lóng chiàu Siōng Chú tùi Mô͘-se ê hoan-hù chòe.

6In koh tok nn̄g tè âng-bé-ló, siuⁿ tī kim-kheng--ni̍h, ēng khek ìn-á ê chhiú-lō͘ chiong Ngá-kok ê kiáⁿ ê miâ khek tī hit téng-bīn;

7an tī í-hut-tek ê keng-tòa, chòe Í-sek-lia̍t-lâng ê kì-liām-chio̍h; lóng chiàu Siōng Chú tùi Mô͘-se ê hoan-hù chòe.

Chō Heng-tē(Chhut 28.15-30)

8In chòe chi̍t ê phòaⁿ-toàn ê heng-tē, ēng kap chòe í-hut-tek kâng-khoán kî-khá ê chhiú-lō͘, ēng kim-sòaⁿ kap nâ-sek, chí-sek, chu-âng-sek ê se, í-ki̍p so--kè ê iù-môa chòe.

9Heng-tē sī sù-hong--ê, áu siang-têng; tn̂g khoah lóng jī-cha̍p-jī kong-hun.

10Heng-tē téng-bīn siuⁿ sì chōa pó-chio̍h; tē-it chōa sī âng-pó-chio̍h, n̂g-ge̍k, chhiah-ge̍k;

11tē-jī chōa sī le̍k-pó-chio̍h, nâ-pó-chio̍h, kim-kong-chio̍h;

12tē-saⁿ chōa sī chí-bé-ló, pe̍h-bé-ló, chí-sek ê chúi-chiⁿ;

13tē-sì chōa sī chhiⁿ-ge̍k, âng-bé-ló, phek-ge̍k; chiah-ê lóng siuⁿ tī kim-kheng.

14Chiah-ê pó-chio̍h chiàu Ngá-kok ê kiáⁿ ê miâ, kiōng cha̍p-jī tè, ēng khek ìn-á ê chhiú-lō͘, ta̍k-tè khek chi̍t ê miâ, tāi-piáu cha̍p-jī chi-cho̍k.

15In ēng sûn-kim phah nn̄g tiâu liān-á, chhin-chhiūⁿ ká soh-á, an tī heng-tē.

16In koh chòe nn̄g ê kim ê kheng kap nn̄g ê kim-khoân, chiong chit nn̄g ê khoân an tī heng-tē ê siang-thâu,

17chiong hit nn̄g tiâu kim-liān-á liân tī heng-tē siang-thâu nn̄g ê khoân,

18ēng nn̄g tiâu liān-á ê siang-thâu liân tī nn̄g ê kheng, an tī í-hut-tek keng-tòa ê thâu-chêng.

19In chòe nn̄g ê kim-khoân, an tī heng-tē siang-thâu ê kîⁿ, kūn í-hut-tek ǹg lāi-bīn hit-pêng.

20Koh chòe nn̄g ê kim-khoân, an tī í-hut-tek thâu-chêng ê keng-tòa ē-bīn, óa-kūn saⁿ-liân ê só͘-chāi, ēng kî-khá ê chhiú-lō͘ chit ê í-hut-tek ê tòa téng-bīn.

21In ēng nâ-sek ê iù-tòa, chiong heng-tē ê khoân kap í-hut-tek ê khoân pa̍k chòe-hé, tah tī ēng kî-khá ê chhiú-lō͘ chit ê í-hut-tek ê tòa, chiong heng-tē kap í-hut-tek kò͘-tēng--teh. Chiah-ê lóng chiàu Siōng Chú tùi Mô͘-se ê hoan-hù chòe.

Chòe Chè-si Kî-tha ê Lé-ho̍k(Chhut 28.31-43)

22In ēng chit-pò͘ ê hong-hoat chòe chhēng tī í-hut-tek lāi-bīn ê gōa-phàu, kui-niá sī nâ-sek--ê.

23Phàu téng-bīn ê tùi-tiong, ūi-tio̍h thâu-khak lâu chi̍t ê khang, chiu-ûi chit niá-iân, chhin-chhiūⁿ chiàn-kah ê niá-khang, chiah bián phòa-li̍h.

24Phàu ê ē-kha-pô͘ ēng nâ-sek, chí-sek, chu-âng-sek ê se chòe sia̍h-liû.

25Koh ēng sûn-kim chòe giang-lêng-á, hē tī sia̍h-liû kap sia̍h-liû ê tiong-kan;

26phàu kui-ê ē-kha-pô͘, chi̍t ê giang-lêng-á chi̍t lia̍p sia̍h-liû, chi̍t ê giang-lêng-á chi̍t lia̍p sia̍h-liû, thang chhēng lâi ho̍k-sāi Siōng Chú. Chiah-ê lóng chiàu Siōng Chú tùi Mô͘-se ê hoan-hù chòe.

27In ēng chit-pò͘ ê hong-hoat ūi A-lûn kap i ê kiáⁿ chòe iù-môa ê lāi-phàu,

28lé-bō, kap thâu-kun, ēng so--kè ê iù-môa chòe lé-khò͘.

29Koh ēng so--kè ê iù-môa, kap nâ-sek, chí-sek, chu-âng-sek ê se, ēng chhiah-siù ê chhiú-lō͘ chòe io-tòa; chiah-ê lóng chiàu Siōng Chú tùi Mô͘-se ê hoan-hù chòe.

30In ēng sûn-kim chòe lé-bō ê pâi, ēng khek ìn-á ê chhiú-lō͘ khek “Sèng-hòa kui Siōng Chú”.

31Koh ēng chi̍t tiâu nâ-sek ê tòa, chiong hit-tè pâi pa̍k tī lé-bō ê thâu-chêng; chiah-ê lóng chiàu Siōng Chú tùi Mô͘-se ê hoan-hù chòe.

Hōe-bō͘ Oân-kang(Chhut 35.10-19)

32Án-ni, hōe-bō͘ ê pò͘-pîⁿ só͘-ū ê kang-thêng lóng oân-sêng. Siōng Chú bēng-lēng Mô͘-se só͘ tio̍h chòe--ê, Í-sek-lia̍t-lâng lóng chiàu án-ni chòe.

33In chiong hōe-bō͘, chiū-sī pò͘-phâng kap só͘-ū ê khì-khū sàng-khì Mô͘-se hia, ū kau-á, pán, hoâiⁿ-kông, thiāu, ū sún-khang ê chō,

34khàm pò͘-phâng ní-chòe âng-sek ê iûⁿ-káng ê phê kap siōng-téng ê phê, jia iok-kūi ê kòa ê tiùⁿ-lî,

35iok-kūi kap i ê kǹg, i ê kòa,

36pâi hiàn-chè ê piáⁿ ê toh kap i ê khì-khū, hiàn-chè ê piáⁿ,

37sûn-kim ê teng-tâi kap i ê teng-chóaⁿ, teng-tâi ê khì-khū kap tiám-teng ê iû,

38kim ê hiuⁿ-tôaⁿ, thang boah ê sèng-iû kap phang ê hiuⁿ-liāu, hōe-bō͘ ê mn̂g-lî,

39tâng ê chè-tôaⁿ kap tâng ê bāng-á, chè-tôaⁿ ê kǹg kap tôaⁿ só͘-ū ê khì-khū, sóe-tn̄g ê phûn kap phûn-chō,

40tiâⁿ sì-ûi ê ûi kap i ê thiāu, ū sún-khang ê chō kap tiâⁿ ê mn̂g-lî, khi̍t-á kap soh-á, pò͘-phâng kap hōe-bō͘ lāi-bīn só͘-ū ê khì-khū,

41í-ki̍p iù-kang chòe ê lé-ho̍k, chiū-sī chè-si A-lûn tī sèng-só͘ chhēng lâi ho̍k-sāi ê sèng ê lé-ho̍k, kap i ê kiáⁿ chòe chè-si teh chhēng ê lé-ho̍k.

42Siōng Chú bēng-lēng Mô͘-se só͘ tio̍h chòe--ê, Í-sek-lia̍t-lâng lóng chiàu án-ni chòe.

43Mô͘-se khòaⁿ-tio̍h só͘-ū ê kang-thêng, lóng ū chiàu Siōng Chú ê hoan-hù oân-sêng, chiū kā in chiok-hok.

Chhut-ai-ki̍p-kì 39 - 現代台語譯本羅馬字版(TTVR)-闽南语

Learn More About Us