Thoân-tō-su 4

Thoân-tō-su 4 - 現代台語譯本羅馬字版(TTVR)-闽南语

1Góa koh khòaⁿ-tio̍h tī ji̍t-kng ê ē-bīn só͘ hoat-seng it-chhè ap-pek ê tāi-chì: Siū ap-pek ê lâng lâu ba̍k-sái, bô lâng kā in an-ùi; in-ūi ap-pek in--ê ū sè-le̍k, siū ap-pek--ê bô lâng kā in an-ùi.

2In-ūi án-ni, góa kā hiah-ê í-keng sí--khì ê lâng kiong-hí, in pí iáu oa̍h--teh ê lâng khah hēng-hok.

3Koh hiah-ê iáu-bē chhut-sì, bē khòaⁿ-kìⁿ ji̍t-kng ē-bīn só͘ hoat-seng pháiⁿ ê tāi-chì--ê, góa khòaⁿ in pí chit nn̄g khoán lâng iáu khah hó.

4Góa koh khòaⁿ-tio̍h lâng it-chhè ê lô-khó͘ kap ta̍k-khoán kang-chok ê sêng-chiū, sī in-ūi lâng kap lâng tiong-kan ê oàn-tò͘ kèng-cheng chō-sêng--ê. Che mā-sī khang-hu, mā-sī lia̍h-hong.

5Gû-gōng ê lâng chhiú lám-heng m̄ chòe tāi-chì, iau kah gō-sí.

6Chi̍t chhiú móa-móa m̄-kú an-jiân chū-chāi, pí siang-chhiú móa-móa tio̍h lô-lo̍k koh lia̍h-hong khah hó.

7Góa koh khòaⁿ-tio̍h tī ji̍t-kng ê ē-bīn ū khang-hu ê sū:

8Ū lâng ko͘-toaⁿ bô-phōaⁿ, bô kiáⁿ mā bô hiaⁿ-tī, iáu-kú lô-lo̍k bô-soah, bô khòaⁿ só͘-ū ê châi-hù chòe kàu-gia̍h. I kóng: Góa lô-lo̍k khek-khó͘, bô hióng-hok, tàu-tóe sī ūi siáⁿ-lâng? Che mā-sī khang-hu, sī bô ì-gī ê kang-chok.

9Nn̄g ê lâng pí chi̍t ê khah hó, in-ūi nn̄g ê ha̍p-chok ōe tit-tio̍h khah-hó ê hāu-kó;

10nā chi̍t ê poa̍h-tó, iáu ū chi̍t ê ōe-tàng kā i hû--khí-lâi; nā ka-kī chi̍t ê, poa̍h-tó ê sî bô lâng thang kā i hû--khí-lâi, chit-ê lâng chiū chin put-hēng.

11Nn̄g ê lâng chòe-hé khùn khah sio-lō, ka-kī chi̍t ê ná ōe sio?

12Siū kong-kek ê sî, kan-ta chi̍t ê lâng phah bōe iâⁿ, nā ū nn̄g ê chiū ōe-tàng tí-khòng. Saⁿ kó͘ ê soh bô hiah hó chhoah-tn̄g.

13Sàn-chhiah ū tì-hūi ê siàu-liân-lâng pí nî-lāu m̄-khéng siū tiong-kò gû-gōng ê ông khah hó.

14Ū lâng tùi kaⁿ-ga̍k chhut--lâi, āu-lâi choh-ông; ū lâng chhut-sì tī ông-kiong, āu-lâi pìⁿ-chòe sàn-chhiah.

15Góa khòaⁿ tī ji̍t-kng ê ē-bīn teh seng-oa̍h ê jîn-bîn lóng kun-tè sòa-chiap choh-ông ê siàu-liân-lâng.

16I ū léng-tō chin chōe jîn-bîn, m̄-kú āu-lâi ê lâng tùi i bô kah-ì. Che mā-sī khang-hu, mā-sī lia̍h-hong.

Thoân-tō-su 4 - 現代台語譯本羅馬字版(TTVR)-闽南语

Learn More About Us