Í-sài-a-su 47

Í-sài-a-su 47 - 現代台語譯本羅馬字版(TTVR)-闽南语

Pa-pí-lûn Siū Sím-phòaⁿSiōng Chú kóng:

1Chāi-sek-lú Pa-pí-lûn ah,

lo̍h-lâi chē tiàm thô͘-hún!

Siàu-lú Ka-le̍k-tí ah,

tùi pó-chō lo̍h--lâi, chē tiàm thô͘-kha!

Bô lâng ōe koh kóng lí un-jiû á-sī iù-siù.

2Khì oe chio̍h-bō, bôa mī-hún!

Bīn-phè the̍h-tiāu!

Kûn cháng--khí-lâi,

lō͘-chhut tōa-thúi liâu-kè khoe!

3Lâng ōe khòaⁿ-tio̍h lí chhiah-sin-lō͘-thé;

lí ê kiàn-siàu ōe lō͘-hiān.

Góa beh pò-ho̍k,

chi̍t ê to bōe pàng i soah.

4Goán ê Kiù-sio̍k-chú sī Í-sek-lia̍t sîn-sèng ê Siōng-tè;

I ê chheng-ho͘ sī Siōng Chú — Bān-kun ê Thóng-sòe.

5Siàu-lú Ka-le̍k-tí ah,

ji̍p-khì o͘-àm ê só͘-chāi tiām-tiām-á chē;

lí bōe koh-chài hō͘ lâng chheng-chòe

“Lia̍t-kok ê lú-ông”.

6Góa ū tùi góa ê chú-bîn hoat siū-khì,

hō͘ ka-kī ê sán-gia̍p siū lêng-jio̍k,

kā in kau tī lí ê chhiú-tiong.

Lí bô tùi in si lîn-bín,

sīm-chì ēng chin tāng ê taⁿ hō͘ lāu-lâng phāiⁿ.

7Lí bat kóng “Góa beh éng-oán chòe lú-ông”,

só͘-í bô kā chiah-ê tāi-chì khǹg tī sim-lāi,

mā bô khó-lū tāi-chì ê kiat-kio̍k.

8Taⁿ, lí chit-ê ài iàn-lo̍k, an-ún chē tī pó-chō téng ê lâng,

tio̍h chù-ì thiaⁿ!

Lí ka-kī sim-lāi siūⁿ-kóng:

Chí-ū góa, góa í-gōa bô pa̍t-ê;

góa choa̍t-tùi bōe pìⁿ-chòe kóaⁿ-hū,

bōe keng-giām sòng-sit kiáⁿ-jî ê khó͘-thàng.

9M̄-kú, tī chi̍t ji̍t lāi, chi̍t-ba̍k-nih-kú,

chit nn̄g hāng tāi-chì lóng ōe hoat-seng tī lí sin-chiūⁿ,

sí-kiáⁿ kap chiú-kóaⁿ chòe-chi̍t-ē kàu!

Bô-lūn lí kiâⁿ jōa-chōe siâ-su̍t,

liām jōa-chōe hû-chiù to bô-chhái-kang.

10Lí chū-sìn chòe pháiⁿ bô tāi-chì,

kóng: Bô lâng ōe khòaⁿ--tio̍h.

Lí hō͘ ka-kī ê tì-hūi chhong-bêng chhōa-ji̍p phian-lō͘,

ka-kī sim-lāi siūⁿ-kóng:

Góa kap Siōng-tè pîⁿ tōa,

bô lâng ōe-tàng kap góa pí.

11M̄-kú chai-hō ōe jip-tio̍h lí,

lí m̄ chai tio̍h án-chóaⁿ chiah ōe-tàng kā i kóaⁿ-cháu.

Chai-hāi ōe kàng-lo̍h tī lí sin-chiūⁿ,

lí bô hoat-tō͘ kā i tû-tiāu.

Tī lí m̄-chai ê sî,

húi-bia̍t ōe hut-jiân lîm-kàu lí!

12Khí--lâi, chòe lí khì liām lí ê hû-chiù, kiâⁿ khah chōe siâ-su̍t;

lí tùi siàu-liân ê sî chiū phah-piàⁿ chòe chiah-ê sū.

Án-ni, lí khó-lêng ōe sêng-kong,

ōe hō͘ te̍k-jîn kiaⁿ kah beh sí.

13Lí in-ūi lâng hō͘ lí ê kè-chhek siuⁿ chōe soah ià-siān;

khì kiò hiah-ê koan thian-siōng--ê, khòaⁿ chhiⁿ-sîn--ê chhut-lâi kiù lí;

in ōe tī chhoe-it-cha̍p-gō͘ ū-giân chiong-lâi ê sū.

14Khòaⁿ leh, in ōe chhin-chhiūⁿ be̍h-kó hō͘ hé sio-húi;

in bōe-tàng kiù ka-kī thoat-lī hé-iām ê ui-le̍k,

hit-khoán hé m̄-sī ōe-tàng chē tī piⁿ--á hang-sio ê ûn-ûn-á hé.

15Tùi siàu-liân chiū kap lí kau-kiat, tàu-tīn phah-piàⁿ ê lâng,

tòa-lâi hō͘ lí--ê, chòe-āu lóng sī án-ni.

In lóng ōe tī ka-kī kéng ê lō͘ sit-bê,

bô lâng ōe-tàng kiù lí.

Í-sài-a-su 47 - 現代台語譯本羅馬字版(TTVR)-闽南语

Learn More About Us