Hi-pek-lâi-su 8

Hi-pek-lâi-su 8 - 現代台語譯本羅馬字版(TTVR)-闽南语

Lán ê Tōa-chè-si Iâ-so͘

1Lán só͘ teh kóng siōng iàu-kín--ê sī án-ni: Lán ū chit-khoán ê Tōa-chè-si, I chē tī thiⁿ-téng Chì-tōa Siōng-tè pó-chō ê chiàⁿ-pêng.

2I tī Sèng-só͘, chiū-sī chin ê tiùⁿ-bō͘, teh sū-hōng; chit-ê tiùⁿ-bō͘ m̄-sī lâng, sī Chú só͘ tah--ê.

3Ta̍k-ê tōa-chè-si lóng sī ūi-tio̍h hiàn lé-mi̍h kap chè-phín jīm-bēng--ê; só͘-í chit-ūi Tōa-chè-si mā it-tēng tio̍h ū sím-mi̍h thang hiàn.

4I nā tī tōe-chiūⁿ chiū bô choh chè-si, in-ūi í-keng ū chè-si chiàu Lu̍t-hoat teh hiàn lé-mi̍h.

5In só͘ chòe ê ho̍k-sāi put-kò sī thiⁿ-téng tiùⁿ-bō͘ ê hù-pún kap iáⁿ-siōng, tú chiàu Mô͘-se beh khí-chō hōe-bō͘ ê sî, Siōng-tè ū kā i chí-sī, kóng, “Lí tio̍h kín-sīn, it-chhè tio̍h chiàu tī soaⁿ-téng kā lí chí-sī ê bô͘-sek lâi khí.”

6M̄-kú hiān-chāi Iâ-so͘ í-keng tit-tio̍h koh-khah chun-kùi ê sū-hōng, choh khah hó ê iok ê tiong-kan-jîn; chit-ê iok sī ēng khah hó ê èng-ún chè-tēng--ê.

7Thâu chi̍t ê iok nā bô khoat-tiám, chiū bô su-iàu li̍p tē-jī ê iok.

8M̄-kú Siōng-tè kā in chí-chek kóng:

Chú kóng: Khòaⁿ leh, ji̍t-chí teh-beh kàu,

góa beh kap Í-sek-lia̍t-ke kap Iû-tāi-ke li̍p sin ê iok.

9Chit-ê iok bô chhin-chhiūⁿ góa í-chêng kap in ê chó͘-sian só͘ li̍p--ê,

chiū-sī khan in ê chhiú, chhōa in chhut Ai-ki̍p ê sî só͘ li̍p--ê;

in-ūi in bô kè-sio̍k siú góa ê iok,

só͘-í góa m̄ chhap in.

10Chú koh kóng: Hiah-ê ji̍t í-āu,

góa kap Í-sek-lia̍t-lâng só͘ beh li̍p ê iok sī án-ni:

Góa beh chiong góa ê Lu̍t-hoat khǹg tī in ê náu-lāi,

siá tī in ê sim-lāi.

Góa beh chòe in ê Siōng-tè;

in beh chòe góa ê chú-bîn.

11In lóng bōe koh kà-sī in ê tông-pau,

á-sī ka-kī ê hiaⁿ-tī chí-bē kóng:

Tio̍h jīn-bat Chú,

in-ūi in tùi siōng-sòe kàu siōng-tōa--ê,

lóng ōe jīn-bat góa.

12Góa beh sià-bián in ê put-gī,

bōe koh kì-tit in ê chōe-ok.

13Kì-jiân kóng-kàu sin ê iok, Siōng-tè chiū hō͘ thâu chi̍t ê iok pìⁿ-chòe kū--ê. Hit-ê chiām-chiām kū teh soe-thè ê iok liâm-piⁿ chiū siau-sit.

Hi-pek-lâi-su 8 - 現代台語譯本羅馬字版(TTVR)-闽南语

Learn More About Us