Iok-pek-kì 14

Iok-pek-kì 14 - 現代台語譯本羅馬字版(TTVR)-闽南语

1Hū-jîn-lâng só͘ siⁿ--ê, ji̍t-chí té,

hoān-lān chōe.

2I chhin-chhiūⁿ hoe, khui-liáu chiū siā--khì,

chhin-chhiūⁿ iáⁿ, chin kín chiū siau-sit bô lâu sím-mi̍h.

3Chit-khoán ê lâng, lí kiám ōe kā i chù-ì,

koh kā i sím-phòaⁿ?

4Kiám ū lâng ōe-tàng hō͘ chheng-khì ê mi̍h tùi bô chheng-khì--ê chhut--lâi?

Bô lâng ōe.

5Lâng ê siū-miā í-keng chù-tiāⁿ;

i ê sòe-goa̍t, lí teh chi-phòe.

Lí siat ê kài-hān, bô lâng ōe-tàng pôaⁿ--kè.

6Kiû lí ba̍k-chiu oa̍t-cháu bô khòaⁿ, mài kā i koán,

hō͘ i chhin-chhiūⁿ chòe-kang-lâng kang chòe-liáu thang hoaⁿ-hí.

7Chhò--khí-lâi ê chhiū ū ǹg-bāng koh puh-íⁿ;

iù-nńg ê ki ōe kè-sio̍k hoat--chhut-lâi.

8Sui-jiân i ê kun tī thô͘-tóe it-ti̍t lāu--khì,

chhiū-thâu tī thô͘--ni̍h khai-sí nōa,

9chúi chi̍t-ē lūn-te̍k chiū koh hoat-íⁿ,

chhin-chhiūⁿ sin chai-chèng ê chhiū-á hoat-ki.

10M̄-kú lâng sí chiū tó-ti̍t-ti̍t;

khùi chi̍t-ē tn̄g, i tī tó-ūi?

11Ô͘ ê chúi ōe ta--khì,

kang-hô ê chúi ōe tn̄g--khì;

12lâng mā-sī án-ni, tó--lo̍h-khì bōe koh peh--khí-lâi,

kàu thiⁿ bô--khì, mā bōe cheng-sîn,

éng-oán khùn--khì kiò bōe chhíⁿ.

13Góa jōa-á-ni̍h ǹg-bāng lí kā góa khǹg tī Im-kan,

kā góa chhàng tī ún-ba̍t ê só͘-chāi, thèng-hāu lí ê siū-khì soah,

kā góa tēng kî-hān thang koh koàn-kò͘ góa.

14Lâng kiám ōe koh oa̍h--khí-lâi?

Chóng-sī tī lô-khó͘ ê ji̍t góa beh thèng-hāu,

ti̍t-kàu góa tit-tio̍h kái-kiù.

15Hit-sî, lí kiò góa, góa chiū ìn lí;

lí ōe chin ài khòaⁿ-tio̍h lí só͘ chō ê góa.

16Sui-jiân lí iáu-teh kàm-sī góa ê kiâⁿ-ta̍h,

m̄-kú bōe koh tui-kiù góa ê chōe.

17Góa ê kè-sit lí ōe hong-ba̍t tī tē-á lāi;

góa ê chōe-kò lí ōe chhat-siau.

18Soaⁿ pang, tó-hoāi;

tōa chio̍h lī-khui goân-ūi.

19Teh lâu ê chúi kā chio̍h-thâu bôa-sún,

tōa-chúi kā thô͘ chhiong-cháu;

lí mā án-ni choa̍t lâng ê ǹg-bāng.

20Lí éng-oán khah iâⁿ i, i chiū siau-sit;

lí hō͘ i sí--khì, bīn-māu kái-piàn.

21I ê kiáⁿ-jî tit-tio̍h êng-ū, i m̄ chai;

in sit-pāi kiàn-siàu, i mā m̄ chai.

22I chí-ū kám-kak ka-kī seng-khu ê thàng-thiàⁿ,

kan-ta ūi-tio̍h ka-kī iu-siong.

Iok-pek-kì 14 - 現代台語譯本羅馬字版(TTVR)-闽南语

Learn More About Us