Bîn-sò͘-kì 19

Bîn-sò͘-kì 19 - 現代台語譯本羅馬字版(TTVR)-闽南语

Chhiah-sek Gû-bú ê Hu

1Siōng Chú tùi Mô͘-se kap A-lûn kóng,

2“Siōng Chú só͘ bēng-lēng ê lu̍t-hoat ū chi̍t tiâu án-ni kóng: Lí tio̍h hoan-hù Í-sek-lia̍t-lâng khan chi̍t chiah kiān-khong, bô hâ-chhû, m̄-bat kòa taⁿ ê chhiah-sek gû-bú lâi lí chia.

3Tio̍h chiong i kau hō͘ chè-si Í-lī-a-sat, tòa chhut-khì iâⁿ-gōa, tī Í-lī-a-sat ê bīn-chêng kā i thâi-sí.

4Chè-si Í-lī-a-sat tio̍h ēng chńg-thâu-á ùn huih, ǹg hōe-bō͘ thâu-chêng hiù chhit piàn.

5Tio̍h ū chi̍t ê lâng tī chè-si ê ba̍k-chiu chêng sio chit-chiah gû-bú, mā chiong i ê phê, bah, huih, kap pùn sio-tiāu.

6Chè-si tio̍h chiong pek-hiuⁿ-chhâ, gû-chhek-chháu, chu-âng-sek ê se, lóng hiat tī sio gû ê hé-tiong.

7Āu-lâi chè-si tio̍h sóe i ê saⁿ, sóe seng-khu, chiah thang ji̍p iâⁿ-tōe; kàu ji̍t lo̍h í-āu chiah chheng-khì.

8Sio gû-bú ê lâng mā tio̍h sóe i ê saⁿ, sóe seng-khu; kàu ji̍t lo̍h í-āu chiah chheng-khì.

9Tio̍h ū chi̍t ê chheng-khì ê lâng siu-si̍p gû-bú ê hu, pó-chûn tī iâⁿ-gōa lé-gî-siōng chheng-khì ê só͘-chāi, lâu-teh chòe kiat-chēng ê chúi ê lō͘-ēng, thang kā Í-sek-lia̍t hōe-chiòng ê chōe tû--khì.

10Siu-si̍p gû-bú ê hu ê lâng tio̍h sóe i ê saⁿ; kàu ji̍t lo̍h í-āu chiah chheng-khì. Che beh chòe Í-sek-lia̍t-lâng kap kià-ku tī in tiong-kan ê gōa-cho̍k-lâng éng-oán ê kui-lē.”

Bong-tio̍h Si-thé ê Kiat-chēng-lé

11Nā ū lâng bong-tio̍h lâng ê si-thé, chiū ōe chhit ji̍t kú bô chheng-khì.

12Hit-ê lâng kàu tē-saⁿ ji̍t, tio̍h ēng hit-ê chham chhiah-sek gû-bú ê hu ê chúi kiat-chēng ka-kī, kàu tē-chhit ji̍t chiah chheng-khì; i nā tī tē-saⁿ ji̍t bô kiat-chēng ka-kī, kàu tē-chhit ji̍t iáu-sī bô chheng-khì.

13Nā ū lâng bong-tio̍h lâng ê si-thé, koh bô kiat-chēng ka-kī, chiū-sī phah lâ-sâm Siōng Chú ê hōe-bō͘, chit-ê lâng tio̍h kā i tùi Í-sek-lia̍t-lâng ê tiong-kan kek-chhut; in-ūi i ê seng-khu bô hiù kiat-chēng ê chúi, i iáu bô chheng-khì.

14Ē-bīn sī iú-koan lâng sí tī pò͘-pîⁿ lāi kiat-chēng ê tiâu-lē: Ji̍p-khì hit-ê pò͘-pîⁿ, í-ki̍p só͘-ū tī pò͘-pîⁿ lāi ê lâng, chhit ji̍t kú lóng bô chheng-khì.

15Pò͘-pîⁿ lāi bô khàm-kòa ê khì-khū mā-sī bô chheng-khì.

16Nā ū lâng tī iá-gōa bong-tio̍h hō͘ lâng thâi-sí á-sī chū-jiân sí ê si-thé, á-sī lâng ê kut-thâu, á-sī bōng, chhit ji̍t kú lóng bô chheng-khì.

17Tio̍h ūi bô chheng-khì ê lâng the̍h chi̍t-kóa chhiah-sek gû-bú ê hu, hē tī khì-khū lāi, tò oa̍h-chúi tī hit lāi-bīn.

18Tio̍h ū chi̍t ê lé-gî-siōng chheng-khì ê lâng the̍h gû-chhek-chháu ùn chit-ê chúi, hiù pò͘-pîⁿ, só͘-ū ê khì-khū, kap pò͘-pîⁿ lāi-bīn ê lâng, koh hiù hiah-ê bong-tio̍h bōng, kut-thâu, chū-jiân sí ê lâng, í-ki̍p bong-tio̍h si-thé ê lâng.

19Tē-saⁿ ji̍t kap tē-chhit ji̍t, chheng-khì ê lâng tio̍h kā hiah-ê bô chheng-khì ê lâng hiù chúi, hō͘ in kàu tē-chhit ji̍t tit-tio̍h chheng-khì. Hiah-ê lâng tio̍h sóe-saⁿ, sóe seng-khu; kàu ji̍t lo̍h í-āu chiah chheng-khì.

20Hit-ê bô chheng-khì koh bô khì kiat-chēng ka-kī ê lâng, tio̍h tùi hōe-chiòng ê tiong-kan kā i kek-chhut, in-ūi i phah lâ-sâm Siōng Chú ê sèng-só͘; kiat-chēng ê chúi bô hiù tī i ê seng-khu, i sī bô chheng-khì ê lâng.

21Che beh chòe Í-sek-lia̍t-lâng éng-oán ê kui-lē. Hit-ê kā lâng hiù kiat-chēng ê chúi ê lâng tio̍h sóe i ê saⁿ; nā ū lâng bong-tio̍h kiat-chēng ê chúi, ji̍t lo̍h í-chêng i sī bô chheng-khì.

22Hō͘ bô chheng-khì ê lâng bong--tio̍h ê mi̍h-kiāⁿ sī bô chheng-khì; bong-tio̍h hiah-ê mi̍h-kiāⁿ ê lâng, ji̍t lo̍h í-chêng lóng bô chheng-khì.

Bîn-sò͘-kì 19 - 現代台語譯本羅馬字版(TTVR)-闽南语

Learn More About Us