Sat-ka-lī-a-su 4

Sat-ka-lī-a-su 4 - 現代台語譯本羅馬字版(TTVR)-闽南语

Kim Teng-tâi ê Īⁿ-siōng

1Hit-ê kap góa kóng-ōe ê sù-chiá koh óa--lâi, kā góa kiò-chhíⁿ, chhin-chhiūⁿ kā teh khùn ê lâng kiò cheng-sîn.

2I mn̄g góa, “Lí khòaⁿ-tio̍h sím-mi̍h?”

Góa kóng, “Góa ū khòaⁿ-tio̍h chi̍t chō kim teng-tâi, tâi-téng ū chi̍t ê tóe iû ê phûn, phûn-téng ū chhit ki teng, ta̍k-ki teng ū chhit ê teng-sim.

3Teng-tâi piⁿ ū nn̄g châng kaⁿ-ná-chhiū, chi̍t châng tī iû-phûn ê chiàⁿ-pêng, chi̍t châng tī tò-pêng.”

4Góa mn̄g kap góa kóng-ōe ê thiⁿ-sài, “Sian-siⁿ, chiah-ê teh piáu-sī sím-mi̍h?”

5I ìn góa kóng, “Lí m̄ chai chiah-ê sī sím-mi̍h ì-sù o͘h?”

Góa kóng, “Sian-siⁿ, góa m̄ chai.”

6I kā góa kóe-seh, “Siōng Chú hoan-hù Só͘-lô-pa-pek ê ōe sī án-ni, ‘M̄-sī khò koân-le̍k, m̄-sī khò châi-lêng, tio̍h khò góa ê sîn.’ Siōng Chú — Bān-kun ê Thóng-sòe án-ni soan-pò͘.

7Tōa-soaⁿ ah, lí sǹg sím-mi̍h? Lí ōe tī Só͘-lô-pa-pek bīn-chêng pìⁿ-chòe pîⁿ-tōe. I kā siōng tiōng-iàu ê chio̍h poaⁿ--chhut-lâi ê sî, chèng-lâng ōe hoah kóng, ‘Siōng-tè sù-hok! Siōng-tè sù-hok!’”

8Siōng Chú ū koh tùi góa kóng,

9Só͘-lô-pa-pek ū kā chit-keng sèng-tiān hē tōe-ki, mā beh chhin-chhiú oân-sêng tiông-kiàn ê kang-chok. Hit-sî lín chiū chai Siōng Chú — Bān-kun ê Thóng-sòe ū chhe góa lâi lín chia.

10Siáⁿ-lâng káⁿ biáu-sī chit-ji̍t, khòaⁿ beh hoat-seng ê tāi-chì chòe sió-sū? In chi̍t-ē khòaⁿ-tio̍h Só͘-lô-pa-pek chhiú koh the̍h tūi-chîn ōe chin hoaⁿ-hí. Chit chhit ki teng sī Siōng Chú teh sûn-sī choân-tōe ê ba̍k-chiu.

11Góa koh mn̄g hit-ê sù-chiá, “Chit-ê teng-tâi siang-pêng ê nn̄g châng kaⁿ-ná-chhiū teh piáu-sī sím-mi̍h?

12Kaⁿ-ná-chhiū ê nn̄g ki chhiū-oe ê piⁿ--á, ū nn̄g tiâu kim ê kńg lâu-chhut kim-sek ê iû, teh piáu-sī sím-mi̍h?”

13I ìn kóng, “Lí m̄ chai chiah-ê sī sím-mi̍h ì-sù o͘h?”

Góa kóng, “Sian-siⁿ, góa m̄ chai.”

14I kóng, “Che sī nn̄g ê siū boah-iû kéng-soán ê po̍k-jîn, teh sū-hāu choân-tōe ê Chú.”

Sat-ka-lī-a-su 4 - 現代台語譯本羅馬字版(TTVR)-闽南语

Learn More About Us