Sin-bēng-kì 8

Sin-bēng-kì 8 - 現代台語譯本羅馬字版(TTVR)-闽南语

Sêng-chiap Hó ê Thó͘-tōe

1Kin-á-ji̍t góa só͘ bēng-lēng lín it-chhè ê kài-bēng, lín tio̍h chhiat-si̍t chun-hêng, hō͘ lín thang oa̍h, jîn-sò͘ ke-thiⁿ chin chōe, ji̍p-khì sêng-chiap Siōng Chú li̍p-sè èng-ún beh hō͘ lín lia̍t-chó͘ ê tōe.

2Lín mā tio̍h ōe-kì-tit Siōng Chú — lín ê Siōng-tè chit sì-cha̍p nî chhōa lín tī khòng-iá kiâⁿ--kè ê lō͘, hō͘ lín khiam-pi, kā lín khó-giām, beh chai lín ū tùi sim-tóe chun-siú I ê kài-bēng á bô.

3I kā lín bôa-liān, hō͘ lín iau-gō, ēng lín kap lín ê lia̍t-chó͘ lóng m̄-bat ê má-ná iúⁿ-chhī lín, sī beh hō͘ lín chai, lâng teh oa̍h m̄-nā óa-khò piáⁿ, sī óa-khò tùi Siōng Chú ê chhùi só͘ chhut ê ta̍k-kù ōe.

4Chit sì-cha̍p nî lín ê saⁿ-á-khò͘ bô phòa, lín ê kha mā bô phòng-phā.

5Lín tio̍h chai, Siōng Chú — lín ê Siōng-tè koán-kàu lín, chhin-chhiūⁿ lâng teh koán-kàu i ê kiáⁿ-jî.

6Só͘-í lín tio̍h chun-siú Siōng Chú — lín ê Siōng-tè ê kài-bēng, kiâⁿ I ê tō-lō͘, kèng-ùi I.

7In-ūi, Siōng Chú — lín ê Siōng-tè chhōa lín ji̍p-khì hit-ê súi ê tōe, hia ū khoe, ū chúi-chôaⁿ, koh ū tōe-hā-chúi tùi soaⁿ-kok kap soaⁿ-téng lâu--chhut-lâi;

8hia ū chhut-sán tōa-be̍h, sió-be̍h, phû-tô, bû-hoa-kó, sia̍h-liû, koh chhut-sán kaⁿ-ná-iû kap bi̍t.

9Lín tī hia chia̍h-mi̍h chhiong-chiok, liân chi̍t hāng to bô khiàm; tī hia ê chio̍h-thâu ū thih, soaⁿ-lāi ōe-tàng ó͘-tio̍h tâng.

10Lín ōe chia̍h kàu pá, tio̍h in-ūi Siōng Chú — lín ê Siōng-tè só͘ siúⁿ-sù lín hù-chiok ê tōe o-ló I.

M̄-thang Bōe-kì-tit Siōng Chú

11Lín tio̍h kín-sīn, chiah bián bōe-kì-tit Siōng Chú — lín ê Siōng-tè, bô chun-siú góa kin-á-ji̍t só͘ hoan-hù Siōng Chú ê kài-bēng, bēng-lēng, kap kui-lē.

12Lín chia̍h-pá, ū hó ê chhù thang khiā,

13gû, iûⁿ, kim, gûn, í-ki̍p lín só͘-ū--ê lóng ke-thiⁿ chin chōe ê sî,

14tio̍h kín-sīn, chiah bián lín chū-ko kiau-ngō͘, soah bōe-kì-tit kā lín tùi Ai-ki̍p-tōe chòe lô͘-châi ê ke chhōa--chhut-lâi ê Siōng Chú — lín ê Siōng-tè.

15I chhōa lín keng-kè hit-ê tōa koh thang-kiaⁿ ê khòng-iá, sī ta-sò bô chúi ê tōe; hia ū to̍k-chôa, giat-á-thâng. I ū ūi-tio̍h lín hō͘ chúi tùi tēng ê chio̍h-pôaⁿ lâu--chhut-lâi.

16I koh tī khòng-iá, ēng lín ê lia̍t-chó͘ m̄-bat ê má-ná iúⁿ-chhī lín, sī beh khó-giām lín, hō͘ lín khiam-pi, kàu-bé sī beh hō͘ lín tit-tio̍h hok-khì;

17chiah bián lín sim-lāi siūⁿ-kóng, “Góa khò ka-kī ê khùi-la̍t, lêng-le̍k tit-tio̍h chiah-ê sán-gia̍p.”

18Lín tio̍h ōe-kì-tit Siōng Chú — lín ê Siōng-tè, lín tit-tio̍h sán-gia̍p ê khùi-la̍t sī I hō͘ lín--ê, sī beh si̍t-hiān I tùi lín ê lia̍t-chó͘ li̍p-sè siat-li̍p ê iok, kap kin-á-ji̍t siâng-khoán.

19Lín nā chin-chiàⁿ bōe-kì-tit Siōng Chú — lín ê Siōng-tè, khì tè pa̍t-ê sîn-bêng, ho̍k-sāi kèng-pài in, góa kin-á-ji̍t giâm-giâm kā lín kéng-kò, lín it-tēng ōe bia̍t-bông.

20Siōng Chú hō͘ lín khòaⁿ-tio̍h I án-chóaⁿ siau-bia̍t hiah-ê bîn-cho̍k, lín mā ōe án-ni bia̍t-bông, in-ūi lín m̄ thiaⁿ-thàn Siōng Chú — lín ê Siōng-tè ê ōe.

Sin-bēng-kì 8 - 現代台語譯本羅馬字版(TTVR)-闽南语

Learn More About Us