Iok-pek-kì 12 - 現代台語譯本羅馬字版(TTVR)-闽南语

1 Iok-pek ìn Só-hoat kóng:

2Ū-iáⁿ, lín chin-chiàⁿ sī gâu-lâng!

Lín sí, tì-hūi mā kap lín chòe-hé sí.

3Góa kap lín kâng-khoán ōe-hiáu siūⁿ;

góa bô khah su lín.

Lín kóng chiah-ê tāi-chì siáⁿ-lâng m̄ chai?

4Góa kiû-kiò Siōng-tè, I ū ìn góa,

m̄-kú góa siū tâng-phōaⁿ ki-chhì;

chèng-ti̍t bô thang chí-chek ê lâng mā ōe siū lâng ki-chhì.

5Seng-oa̍h hó-kè ê lâng thí-chhiò siū-tio̍h chai-lān ê lâng;

chai-hō teh tng-tán lâng poa̍h-tó sit-pāi.

6Kiông-tō ê ke heng-ōng;

jiá Siōng-tè siū-khì ê lâng pêng-an bô-sū;

in óa-khò--ê sī ka-kī ê khùi-la̍t.

7Khì mn̄g cháu-siù, in ōe kà lí;

khì mn̄g khong-tiong ê pe-chiáu, in ōe kā lí kóng;

8khì mn̄g tōe-chiūⁿ ê chhiū-ba̍k, in ōe kà lí;

hái-tiong ê hî mā ōe kā lí soat-bêng.

9Chiah-ê it-chhè, in lóng chai,

sī Siōng Chú ê chhiú só͘ chō.

10It-chhè tōng-bu̍t ê sìⁿ-miā kap só͘-ū jîn-lūi ê oa̍h-miā,

lóng tī I chhiú-lāi.

11Lán ēng hī-khang thiaⁿ ōe,

ēng chi̍h chhì chu-bī.

12Nî-hè chōe--ê ū tì-hūi;

hè-siū tn̂g--ê ū kiàn-sek.

13Tì-hūi kap lêng-le̍k lóng chāi-tī Siōng-tè;

I ū kè-chhek kap kiàn-sek.

14I thiah-húi--ê, lâng bōe-tàng koh khí-chō;

I koaiⁿ-kìm--ê, lâng bōe-tàng koh tháu-pàng.

15I bô lo̍h-hō͘, tōe chiū khòng-hān;

I lo̍h-hō͘, chúi chiū hoàn-lām.

16Koân-lêng kap tì-hūi lóng chāi-tī I;

siū bê-he̍k kap bê-he̍k lâng--ê, mā lóng sio̍k tī I.

17I hō͘ chham-bô͘ siū-lia̍h, thǹg-theh sī-chiòng,

hō͘ sím-phòaⁿ-koaⁿ pìⁿ-chòe gōng-lâng.

18I kái-tû kun-ông ê koân-le̍k,

ēng io-tòa kā in pa̍k--khí-lâi.

19I hō͘ chè-si siū-lia̍h, thǹg-theh sī-chiòng,

koh thui-hoan ū koân-le̍k ê lâng.

20I kìm-chí ū tōe-ūi ê lâng kóng-ōe,

chhiúⁿ-toa̍t tiúⁿ-ló ê chhâi-koat-koân.

21I hō͘ kùi-cho̍k siū lêng-jio̍k,

kái-tû koân-le̍k-chiá ê koân-pèng.

22I tùi o͘-àm hián-sī ò-pì,

tùi sí-ìm hoat-chhut kng-bêng.

23I hō͘ kok-ka heng-ōng, mā kā i húi-bia̍t;

I hō͘ kok-ka khok-tián, mā hō͘ i soe-bî.

24I hō͘ jîn-bîn ê léng-siù sit-khì kiàn-sek,

hō͘ in tī khòng-iá phiau-liû, kiâⁿ bô lō͘.

25In bô kng, tī o͘-àm tiong bong-lâi-bong-khì;

I hō͘ in chhin-chhiūⁿ chiú-chùi ê lâng tian-lâi-tian-khì.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help