Si-phian 104

Si-phian 104 - 現代台語譯本羅馬字版(TTVR)-闽南语

Siōng-chàn Chhòng-chō-chú

1Góa ê sim-sîn ah, tio̍h chheng-chàn Siōng Chú.

Siōng Chú — góa ê Siōng-tè ah, lí chì-tōa!

Lí ēng chun-êng ui-giâm chòe saⁿ chhēng;

2lí ēng kng chòe gōa-phàu moa.

Lí thí-khui thiⁿ chhin-chhiūⁿ teh tah pò͘-pîⁿ;

3lí tī chúi-téng an-tì kiong-tiān ê niû.

Lí ēng hûn chòe chhia chē,

ēng hong chòe si̍t pe.

4Lí ēng hong chòe sù-chiá,

ēng hé-iām chòe chhe-ēng.

5Lí chiong tōe hē tī tōe-ki téng,

hō͘ tōe éng-oán bōe iô-choah.

6Lí hō͘ chhim-chúi ná gōa-saⁿ jia-khàm tōe-bīn,

hō͘ chúi im-kè soaⁿ-niá.

7Lí chi̍t-ē hoah, chúi chiū kóaⁿ-kín cháu;

lí ê lûi chi̍t-ē tân, chúi chiū kín-kín lâu,

8chhèng kàu soaⁿ-thâu, lo̍h kàu soaⁿ-kok,

lâu kàu lí kā in tēng ê só͘-chāi.

9Lí tēng kài-hān hō͘ chúi bōe pôaⁿ--kè,

bōe koh tńg-lâi im tōe-bīn.

10Lí hō͘ chúi-chôaⁿ tùi soaⁿ-lāi chhèng-chhut,

lâu lo̍h soaⁿ-kok,

11hō͘ soaⁿ-lāi ê cháu-siù ū chúi thang lim,

hō͘ iá-lû chí chhùi-ta.

12Lí hō͘ khong-tiong ê pe-chiáu hioh tī chúi-piⁿ,

tī chhiū-ki téng chhiùⁿ-koa.

13Lí tùi thiⁿ-téng ê kiong-tiān ēng chúi koàn-ak soaⁿ-niá,

tùi lí só͘ chòe ê hāu-kó, tōe tit-tio̍h hù-chiok.

14Lí hō͘ chháu seng-tióng, thang hō͘ cheng-siⁿ chia̍h,

hō͘ chhài-soe tōa-châng, chòe lâng ê lō͘-ēng,

thang hō͘ lâng tùi tōe tit-tio̍h chia̍h-mi̍h;

15koh ū chiú hō͘ lâng ê sim hoaⁿ-hí;

ū iû hō͘ lâng ê bīn kong-chhái;

ū chia̍h-mi̍h hō͘ lâng ióng-chòng ū-la̍t.

16Siōng Chú só͘ chai-chèng Lê-pa-lūn ê pek-hiuⁿ-chhiū,

lóng tit-tio̍h chhiong-chiok ê lūn-te̍k;

17ū pe-chiáu choh-siū tī hia ê chhiū lāi-bīn;

ū ho̍h tī siông-chhiū ê chhiū-ki choh-siū.

18Ū koân-soaⁿ hō͘ iá-soaⁿ-iûⁿ tòa;

ū chio̍h-phāng chòe chio̍h-hoan bih ê só͘-chāi.

19I ēng ge̍h tēng kùi-choeh,

hō͘ ji̍t-thâu chai thang lo̍h-soaⁿ.

20Lí hō͘ ji̍t àm chòe mî--sî;

hit-sî chhiū-nâ lāi ê pah-siù chiū lóng pê--chhut-lâi.

21Sai-á-thûn háu beh chhē mi̍h chia̍h,

tùi Siōng-tè thó chia̍h-mi̍h.

22Ji̍t-thâu chi̍t-ē chhut, in chiū cháu-khì bih,

tī in ê tōng-lāi hioh-khùn.

23Lâng chhut-khì chòe kang,

lô-tōng kàu ē-hng-sî.

24Siōng Chú ah, lí só͘ chō--ê ná hiah-ni̍h chōe,

lóng sī lí ēng tì-hūi só͘ chō;

choân-tōe móa-móa lóng sī lí ê chhòng-chō.

25Tī hia ū hái, tōa koh khoah,

lāi-bīn ū sǹg bōe liáu ê tōng-bu̍t;

tōa-sòe ê oa̍h-mi̍h lóng ū.

26Tī hia ū chûn teh kiâⁿ,

ū lí só͘ chhòng-chō ê hái-siù siû-lâi-siû-khì.

27Chiah-ê lóng teh khò lí,

lí chiàu-sî hō͘ in chia̍h-mi̍h.

28Lí hiat hō͘ in, in chiū khioh--khí-lâi;

lí thí-khui chhiú, in chiū ū hó-mi̍h chia̍h kàu pá.

29Lí bīn oa̍t-cháu m̄ khòaⁿ in, in chiū hoân-ló kiaⁿ-hiâⁿ;

lí chiong in ê khùi siu-hôe, in chiū sí--khì kui-hôe thô͘-hún.

30Lí chi̍t-ē pûn-khùi, in chiū siū chhòng-chō;

lí hō͘ tōe-bīn lóng ōaⁿ-sin.

31Goān Siōng Chú ê êng-kng éng-oán chûn-sio̍k;

goān Siōng Chú in-ūi ka-kī ê chhòng-chō hoaⁿ-hí.

32I khòaⁿ tōe, tōe chiū tín-tāng;

I bong soaⁿ, soaⁿ chiū chhèng-ian.

33Góa beh chi̍t-sì-lâng tùi Siōng Chú gîm-si;

góa iáu oa̍h--teh ê sî beh tùi góa ê Siōng-tè chhiùⁿ-koa o-ló.

34Goān I hoaⁿ-hí chiap-la̍p góa ê be̍k-sióng.

Góa beh in-ūi Siōng Chú hoaⁿ-hí khoài-lo̍k.

35Goān chōe-jîn tùi sè-chiūⁿ siau-bia̍t;

goān pháiⁿ-lâng lóng bô--khì.

Góa ê sim-sîn ah, tio̍h chheng-chàn Siōng Chú.

Ha-lé-lú-iah, chheng-chàn Siōng Chú!

Si-phian 104 - 現代台語譯本羅馬字版(TTVR)-闽南语

Learn More About Us