Si-phian 12 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ; tiāu, kàng poeh tō͘.Kiû Pang-chān ê Kî-tó

1Siōng Chú ah, kiû lí chín-kiù.

Khiân-sêng ê lâng bô--khì lah;

sè-kan tiong-sìn ê lâng choa̍t-bia̍t lah.

2Lâng-lâng tùi chhù-piⁿ kóng pe̍h-chha̍t;

in kóng phô͘-tháⁿ ê ōe, chhùi kóng chi̍t khoán, sim siūⁿ chi̍t khoán.

3Kiû Siōng Chú hong-ba̍t phô͘-tháⁿ ê chhùi-tûn,

koah-tn̄g kóng tōa-ōe ê chi̍h.

4In kóng, “Goán beh khò chhùi-chi̍h khah iâⁿ;

chhùi-tûn sī goán ê, siáⁿ-lâng ōe-tàng kā goán khòng-chè?”

5Siōng Chú kóng, “Ūi-tio̍h khùn-khó͘-lâng ê óng-khut, kap sàn-chhiah-lâng ê thó͘-khùi,

taⁿ góa beh khí--lâi, kā in an-tì tī in chhiat-chhiat him-bō͘ an-choân ê só͘-chāi.”

6Siōng Chú ê ōe sûn-choân,

chhin-chhiūⁿ gûn tī thô͘ chō ê hé-lô͘ liān chhit piàn.

7-8Bô lō͘-ēng ê lâng hō͘ sè-kan-lâng khòaⁿ-tāng;

pháiⁿ-lâng ta̍k só͘-chāi ui-hong sáng-sè.

Siōng Chú ah, kiû lí pó-hō͘ goán,

pì-iū goán éng-oán thoat-lī chit sè-tāi ê lâng.

Learn More About Us