Í-sài-a-su 57

Í-sài-a-su 57 - 現代台語譯本羅馬字版(TTVR)-闽南语

Í-sek-lia̍t Pài Ngó͘-siōng Siū Khiàn-chek

1Gī-lâng siū húi-bia̍t, bô lâng koan-sim;

kèng-khiân ê lâng sìⁿ-miā siū chhú-toa̍t, bô lâng chù-ì.

Gī-lâng siū chhú-toa̍t, thang thoat-lī chai-lān.

2Hêng-ûi chèng-ti̍t ê lâng ōe chìn-ji̍p an-lêng,

tī bîn-chhn̂g an-jiân kè-óng.

3Lín chiah-ê kiâⁿ siâ-su̍t ê cha-bó͘-lâng ê kiáⁿ-jî,

kan-hu kap ki-lú ê hō͘-tāi, lóng chìn-chêng lâi!

4Lín teh hì-lāng siáⁿ-lâng?

Teh tùi siáⁿ-lâng khui-chhùi thó͘-chi̍h?

Lín kiám m̄-sī pōe-ge̍k ê kiáⁿ-jî?

Kiám m̄-sī pe̍h-chha̍t ê hō͘-tāi?

5Lín tī siōng-chhiū tiong-kan,

tī chhiⁿ-chhùi ê chhiū ē-bīn, io̍k-hé-kong-sim;

lín tī soaⁿ-kok, tī chio̍h-hia̍t,

thâi lín ê gín-á chòe seng-lé hiàn hō͘ ngó͘-siōng.

6Lín tī soaⁿ-kok tiong the̍h kng-ku̍t ê chio̍h-thâu

chòe sîn-bêng pài,

tùi in tò chiú hiàn-chè,

lín siūⁿ chiah-ê tāi-chì góa kiám ōe iông-ún?

7Lín tī koân koh kiā ê soaⁿ-téng khǹg bîn-chhn̂g kiâⁿ-îm;

lín chiūⁿ-khì hia hiàn-chè.

8Lín tī mn̂g-āu, tī mn̂g-thiāu piⁿ, chhāi îm-hēng ê siōng;

lín pàng-sak góa, seng-khu thǹg-kng-kng,

kap ài-jîn peh-khí-khì tōa téng bîn-chhn̂g,

ēng iok-tēng ê kè-chîⁿ tàu-tīn khùn,

boán-chiok lín ê jio̍k-io̍k.

9Lín tòa iû kap chin chōe phang-chúi khì pài Mô͘-lo̍k.

Ūi-tio̍h beh chhē sîn-bêng lâi pài,

lín chhe sù-chiá khì thiⁿ-piⁿ-hái-kak, sīm-chì lo̍h kàu Im-hú.

10Lín kiâⁿ chin hn̄g ê lō͘, chin ià-siān, m̄-kú iáu bô sí-sim.

Lín siūⁿ-kóng ōe-tàng tùi lín ê sîn-bêng têng-sin tit-tio̍h goân-khì,

só͘-í bô kám-kak ià-siān.

11Lín teh kiaⁿ siáⁿ-lâng soah tio̍h kóng pe̍h-chha̍t?

Lín kèng-jiân bōe-kì-tit góa, bô kā góa khǹg tī sim-lāi!

Góa it-ti̍t bô kóng-ōe, ba̍k-chiu pàng-khoeh-khoeh,

lín chiū m̄ kiaⁿ góa sī--bô?

12Góa beh kong-khai lín chū-chheng sī chèng-gī hêng-ûi ê chin-siòng;

chiah-ê tùi lín lóng bô lī-ek.

13Lín ai-kiû ê sî, tio̍h kiò hiah-ê ngó͘-siōng lâi kiù lín.

Hong ōe kā in chhe-liáu-liáu;

khùi ōe kā in pûn sòaⁿ--khì.

M̄-kú tâu-khò góa ê lâng ōe tit-tio̍h èng-ún ê thó͘-tōe,

ōe-tàng sêng-chiap góa ê sèng-soaⁿ.

Siōng Chú Èng-ún Pang-chān kap I-tī

14Siōng Chú kóng,

“Tio̍h kiàn-chō, tio̍h kiàn-chō,

ūi-tio̍h beh tńg--lâi ê chú-bîn khui chi̍t tiâu tōa-lō͘,

sóa-khui lō͘--ni̍h só͘-ū ê chó͘-gāi.”

15Chì-ko-bû-siōng, éng-oán chûn-chāi,

chheng-chòe “Sîn-sèng ê Siōng-tè” Hit-ūi án-ni kóng,

“Góa tòa tī chì-koân chì-sèng ê só͘-chāi,

mā kap sim thòng-hóe khiam-pi ê lâng chòe-hé tòa;

góa beh hō͘ khiam-pi ê lâng sim-lêng chhíⁿ--khí-lâi,

hō͘ sim thòng-hóe ê lâng sim-sîn oa̍h--khí-lâi.

16Góa bōe kè-sio̍k khòng-kò in,

mā bōe éng-oán tùi in siū-khì;

góa hō͘ lâng ê sim-lêng soe-lám,

mā ōe-tàng hō͘ lâng ū oa̍h-miā.

17In-ūi in tham-loân ê chōe, góa ū tùi in siū-khì,

só͘-í góa chhú-hoa̍t in, khì-sak in.

M̄-kú in kè-sio̍k pōe-ge̍k, kiâⁿ ka-kī ê lō͘.

18“Góa ū khòaⁿ-tio̍h in ê só͘-kiâⁿ,

iáu-kú ōe kā in i-tī.

Góa ōe ín-chhōa in, pang-chān in,

hō͘ siong-sim ê lâng tit-tio̍h an-ùi,

19hō͘ iu-siong ê lâng hoaⁿ-hí chhiùⁿ-koa lâi o-ló.

Góa beh sù pêng-an hoân-êng hō͘ hn̄g kap kūn ê lâng.

Góa koh beh i-tī góa ê chú-bîn.”

Siōng Chú koh kóng,

20“M̄-kú siâ-ok ê lâng chhin-chhiūⁿ hái-éng péng-lâi-péng-khì,

lóng bōe pêng-chēng;

hái-chúi it-ti̍t chhèng-chhut lâ-sâm ê thô͘-bê.

21Siâ-ok ê lâng bô pêng-an!”

Góa ê Siōng-tè án-ni soan-kò.

Í-sài-a-su 57 - 現代台語譯本羅馬字版(TTVR)-闽南语

Learn More About Us