Si-phian 71

Si-phian 71 - 現代台語譯本羅馬字版(TTVR)-闽南语

Lāu-lâng ê Kî-tó

1Siōng Chú ah, góa óa-khò lí;

kiû lí hō͘ góa éng-oán bōe tú-tio̍h kiàn-siàu.

2Kiû lí chiàu lí ê kong-gī chín-kiù góa, tháu-pàng góa;

kiû lí àⁿ hī-khang thiaⁿ góa, kiù góa.

3Kiû lí chòe góa khiā-khí ê chio̍h-pôaⁿ, hō͘ góa thang sî-siông tiàm hia.

Lí í-keng koat-tēng beh kiù góa;

lí sī góa ê pī-lān-só͘, góa ê pó-lúi.

4Góa ê Siōng-tè ah, kiû lí kiù góa thoat-lī pháiⁿ-lâng ê chhiú,

thoat-lī put-gī kap chân-jím ê lâng ê chhiú-thâu.

5Chì-koân ê Siōng Chú ah, lí sī góa ê ǹg-bāng;

tùi góa siàu-liân ê sî, lí it-ti̍t sī góa ê óa-khò.

6Góa tùi thai--ni̍h chiū siū lí hû-chhî;

hō͘ góa chhut lāu-bú ê pak-tó͘--ê, sī lí;

góa beh put-sî chheng-chàn lí.

7Chin chōe lâng khòaⁿ góa chòe kî-koài;

m̄-kú lí sī góa kian-kò͘ ê pī-lān-só͘.

8Góa ê chhùi chhiong-móa tùi lí ê chheng-chàn,

kui-ji̍t kui êng-kng hō͘ lí.

9Góa nî-lāu ê sî, kiû lí m̄-thang pàng-sak góa;

góa khùi-la̍t soe-lám ê sî, kiû lí m̄-thang lī-khui góa.

10Góa ê tùi-te̍k gī-lūn góa;

tng-tán beh hāi góa sìⁿ-miā ê lâng teh chham-siông,

11kóng, “Siōng-tè í-keng kā i pàng-sak;

taⁿ lâi tui i, lâi lia̍h i; in-ūi bô lâng beh kiù i.”

12Siōng-tè ah, kiû lí m̄-thang pàng góa hn̄g-hn̄g m̄ chhap góa;

góa ê Siōng-tè ah, kiû lí kóaⁿ-kín lâi pang-chān góa.

13Goān khòng-kò góa ê lâng tú-tio̍h kiàn-siàu bia̍t-bông;

goān kè-bô͘ beh hāi góa ê lâng siū lêng-jio̍k làu-khùi.

14M̄-kú góa beh sî-siông gióng-bōng lí,

beh it-ti̍t chheng-chàn lí.

15Sui-jiân lí kong-gī ê só͘-chòe kap chín-kiù ê chok-ûi sǹg bōe liáu,

iáu-kú góa ê chhùi kui-ji̍t beh soan-iông.

16Góa beh kóng-khí Chì-koân Siōng Chú tōa koân-lêng ê sū,

kan-ta beh soan-iông lí ê kong-gī.

17Siōng-tè ah, tùi góa siàu-liân ê sî lí chiū kà-sī góa,

hiān-chāi góa iáu-teh pò-iông lí kî-biāu ê chok-ûi.

18Siōng-tè ah, kàu góa nî-lāu, thâu-mn̂g pe̍h ê sî, kiû lí m̄-thang pàng-sak góa,

hō͘ góa thang chiong lí ê khùi-la̍t thoân hō͘ ē chi̍t tāi,

chiong lí ê tōa koân-lêng chí-sī chiong-lâi ê lâng.

19Siōng-tè ah, lí ê kong-gī koân kàu tú-thiⁿ;

Siōng-tè ah, lí ū kiâⁿ úi-tāi ê sū,

siáⁿ-lâng ōe-tàng kap lí pí?

20Lí hō͘ góa keng-le̍k chin chōe tōa chai-lān,

iáu-kú beh hō͘ góa koh oa̍h--khí-lâi,

tùi tōe-ē siōng-chhim ê só͘-chāi koh khí--lâi.

21Lí ōe chiong chun-êng ke-thiⁿ hō͘ góa,

koh-chài an-ùi góa.

22Góa ê Siōng-tè, góa beh tôaⁿ-sek chheng-chàn lí,

chheng-chàn lí ê sìn-si̍t.

Í-sek-lia̍t sîn-sèng ê Siōng-tè,

góa beh tôaⁿ-khîm chheng-chàn lí.

23Góa sī lí só͘ kiù-sio̍k--ê,

góa beh ēng choân sìⁿ-miā tōa-siaⁿ chhiùⁿ-koa chheng-chàn lí.

24Góa ê chi̍h beh kui-ji̍t kóng-khí lí ê kong-gī,

in-ūi kè-bô͘ beh hāi góa ê lâng í-keng siū lêng-jio̍k kiàn-siàu.

Si-phian 71 - 現代台語譯本羅馬字版(TTVR)-闽南语

Learn More About Us