Chhòng-sè-kì 14

Chhòng-sè-kì 14 - 現代台語譯本羅馬字版(TTVR)-闽南语

A-pek-lân Kái-kiù Lô-tek

1Tī Àm-la-hui chòe Sī-ná-ông, A-lio̍k chòe Í-la-sat-ông, Ki-tāi-ló-má chòe Í-lân-ông, Thê-ta̍t chòe Ko-ìn-ông ê sî,

2in liân-ha̍p lâi kong-táⁿ Só͘-to-má-ông Pí-la, Gô-mô͘-la-ông Pí-sa, Ap-má-ông Sī-la̍p, Sé-pián-ông Siān-í-pia̍t, í-ki̍p Pí-la-ông (Pí-la chiū-sī Só-ní).

3Hit sì ê ông lóng lâi Se-tèng Soaⁿ-kok hōe-ha̍p; Se-tèng Soaⁿ-kok chiū-sī hiān-chāi ê Iâm-hái.

4In hō͘ Ki-tāi-ló-má thóng-tī cha̍p-jī nî kú; kàu tē-cha̍p-saⁿ nî pōe-poān.

5Tē-cha̍p-sì nî, Ki-tāi-ló-má chhōa hiah-ê kap i kiat-bêng ê ông, kàu A-su-tha-lio̍k Ka-lêng thâi-iâⁿ Lī-hoa̍t-im-lâng, tī Hap-be̍k thâi-iâⁿ So͘-se-lâng, tī Ki-lia̍t-têng Pêng-goân thâi-iâⁿ Í-bí-lâng,

6tī Í-tong soaⁿ-khu thâi-iâⁿ Hô-lī-lâng, it-ti̍t kàu óa-kūn khòng-iá ê I-le̍k Pa-lân.

7In tò-tńg kàu Ún Bi̍t-pa, chiū-sī Ka-te-su, kong-táⁿ A-má-le̍k choân tōe-khu, kap tòa tī Hap-sé-sùn Tha-má ê A-mô͘-lī-lâng.

8Tùi án-ni, Só͘-to-má-ông, Gô-mô͘-la-ông, Ap-má-ông, Sé-pián-ông, Pí-la-ông (Pí-la chiū-sī Só-ní), lóng lâi Se-tèng Soaⁿ-kok pâi-tīn, beh kap in kau-chiàn,

9chiū-sī kap Í-lân-ông Ki-tāi-ló-má, Ko-ìn-ông Thê-ta̍t, Sī-ná-ông Àm-la-hui, Í-la-sat-ông A-lio̍k kau-chiàn; sì ê ông tùi-khòng gō͘ ê ông.

10Se-tèng Soaⁿ-kok ū chin chōe táⁿ-má-ka-khiⁿ; Só͘-to-má kap Gô-mô͘-la chit nn̄g ê siâⁿ ê ông tô-cháu, poa̍h lo̍h-khì hit lāi-bīn; kî-tha ê lâng tô-cháu khì soaⁿ-téng.

11Hit sì ê ông chiong Só͘-to-má kap Gô-mô͘-la ê châi-bu̍t í-ki̍p niû-si̍t lóng chhiúⁿ-cháu, chòe in khì.

12Koh chiong A-pek-lân ê ti̍t-á Lô-tek kap i ê châi-bu̍t lóng chhiúⁿ--khì; hit-sî Lô-tek tòa tī Só͘-to-má.

13Ū chi̍t ê tô-cháu ê lâng lâi kā Hi-pek-lâi-lâng A-pek-lân pò-kò chit-ê siau-sit. Hit-sî, A-pek-lân tòa tī A-mô͘-lī-lâng Bān-lī ê siōng-chhiū hia; Bān-lī, Í-si̍t-kok, kap A-nái lóng sī chhin-cho̍k, ū kap A-pek-lân kiat-bêng.

14A-pek-lân thiaⁿ-tio̍h i ê ti̍t-á hō͘ lâng lia̍h--khì, chiū chhōa hiah-ê tī in tau chhut-sì, siū hùn-liān ê chòng-teng saⁿ-pah cha̍p-poeh lâng, tui-jip hit sì ê ông kàu Tān.

15Kàu àm-sî, i kap i ê po̍k-jîn hun-tūi kong-kek tùi-te̍k, kā in jip kàu Tāi-má-sū-kek pak-pêng ê Hô-pa.

16I chiong só͘-ū hō͘ in chhiúⁿ--khì ê châi-bu̍t chhiúⁿ tò-tńg, mā chiong i ê ti̍t-á Lô-tek kap Lô-tek ê châi-bu̍t, hū-lú, í-ki̍p kî-tha siū-lia̍h ê lâng lóng chhiúⁿ--tńg-lâi.

Be̍k-ki-sé-tek Chiok-hok A-pek-lân

17 A-pek-lân thâi-iâⁿ Ki-tāi-ló-má í-ki̍p kap i kiat-bêng ê ông tò--lâi ê sî, Só͘-to-má-ông lâi Sa-bî Soaⁿ-kok gêng-chiap i; Sa-bî Soaⁿ-kok chiū-sī Ông ê Soaⁿ-kok.

18Chì-koân Siōng-tè ê chè-si Sat-léng-ông Be̍k-ki-sé-tek mā tòa piáⁿ kap chiú lâi,

19kā A-pek-lân chiok-hok, kóng:

Goān chhòng-chō thiⁿ-tōe, Chì-koân ê Siōng-tè sù-hok hō͘ A-pek-lân!

20Goān hō͘ A-pek-lân thâi-iâⁿ tùi-te̍k ê Chì-koân Siōng-tè tit-tio̍h chheng-chàn!

A-pek-lân chiong lóng-chóng só͘ tit--tio̍h-ê ê cha̍p-hūn-chi̍t sàng hō͘ Be̍k-ki-sé-tek.

21 Só͘-to-má-ông kā A-pek-lân kóng, “Lâng kau hō͘ góa, châi-bu̍t lóng hō͘ lí.”

22 A-pek-lân kā Só͘-to-má-ông kóng, “Góa kí Siōng Chú — chhòng-chō thiⁿ-tōe, Chì-koân ê Siōng-tè chiù-chōa,

23lí só͘-ū ê mi̍h, liân chi̍t tiâu sòaⁿ, chi̍t tiâu ôe-tòa góa lóng m̄ the̍h, chiah bián lí kóng, ‘Góa hō͘ A-pek-lân hó-gia̍h.’

24M̄-kú, chòng-teng ê niû-si̍t lí tio̍h pó͘--góa; kap góa chòe-hé khì ê A-nái, Í-si̍t-kok, Bān-lī èng-tit ê hūn, tio̍h chhut-chāi in the̍h.”

Chhòng-sè-kì 14 - 現代台語譯本羅馬字版(TTVR)-闽南语

Learn More About Us