Í-su-la-kì 1

Í-su-la-kì 1 - 現代台語譯本羅馬字版(TTVR)-闽南语

Sài-ló͘-sū-ông Chún Iû-tāi-lâng Hôe-hiong(2 Tāi 36.22-23)

1 Pho-su hông-tè Sài-ló͘-sū

goân-nî, Siōng Chú ūi-tio̍h beh si̍t-hiān I thong-kè Iâ-lī-bí ê chhùi só͘ kóng ê ōe, kám-tōng Pho-su hông-tè Sài-ló͘-sū, hō͘ i tùi choân-kok pan-pò͘ kóng,

2“Pho-su hông-tè Sài-ló͘-sū án-ni kóng, ‘Siōng Chú — Thiⁿ-téng ê Siōng-tè chiong thian-hā bān-kok siúⁿ-sù góa, koh chí-phài góa tī Iû-tāi ê Iâ-lō͘-sat-léng ūi-tio̍h I khí sèng-tiān.

3Lín tiong-kan só͘-ū chòe I chú-bîn--ê, thang tńg-khì Iû-tāi ê Iâ-lō͘-sat-léng, khí Siōng Chú — Í-sek-lia̍t Siōng-tè ê sèng-tiān; I sī tī Iâ-lō͘-sat-léng siū kèng-pài ê Siōng-tè. Goān Siōng-tè kap in tông-chāi.

4Só͘-ū chhun--lo̍h-lâi ê lâng, bô-lūn tòa tī sím-mi̍h só͘-chāi, hit só͘-chāi ê lâng tio̍h ēng kim, gûn, châi-bu̍t, cheng-siⁿ pang-chān in; mā tio̍h ūi Iâ-lō͘-sat-léng Siōng-tè ê sèng-tiān, kam-sim hōng-hiàn.’”

5Tùi án-ni, Iû-tāi kap Piān-ngá-bín ê cho̍k-tiúⁿ, chè-si, Lī-bī-lâng, só͘-ū siū Siōng-tè kám-tōng ê lâng lóng chún-pī hó-sè, beh chiūⁿ-khì Iâ-lō͘-sat-léng khí-chō Siōng Chú ê tiān.

6In ê chhù-piⁿ chiū ēng gûn-khì, kim, châi-bu̍t, cheng-siⁿ, pó-pòe, pang-chān in; lēng-gōa koh ūi sèng-tiān kam-sim hōng-hiàn.

7Sài-ló͘-sū-ông mā chiong í-chêng Nî-pò͘-kah-nî-sat tùi Iâ-lō͘-sat-léng chhiúⁿ--lâi, hē tī i ê sîn-biō hiah-ê Siōng Chú tiān-lāi ê khì-khū, the̍h chhut-lâi hêng in.

8Pho-su hông-tè Sài-ló͘-sū chí-phài koán-lí hú-khò͘ ê Bí-thê-lī-ta̍t chiong chiah-ê khì-khū the̍h--chhut-lâi, tiám-sǹg, kau hō͘ Iû-tāi ê siú-léng Siat-pa-sat.

9In ê sò͘-bo̍k kì tī ē-bīn:

kim-pôaⁿ saⁿ-cha̍p tè

gûn-pôaⁿ chi̍t-chheng tè

to jī-cha̍p-káu ki

10kim-óaⁿ saⁿ-cha̍p tè

gûn-óaⁿ nn̄g-chheng sì-pah cha̍p tè

kî-tha ê khì-khū chi̍t-chheng kiāⁿ

11kim gûn ê khì-khū kiōng gō͘-chheng sì-pah kiāⁿ. Siū-lia̍h ê lâng tùi Pa-pí-lûn chiūⁿ-lâi Iâ-lō͘-sat-léng ê sî, Siat-pa-sat chiong chiah-ê khì-khū lóng chòe-hé tòa--lâi.

Í-su-la-kì 1 - 現代台語譯本羅馬字版(TTVR)-闽南语

Learn More About Us