Iâ-lī-bí-su 13

Iâ-lī-bí-su 13 - 現代台語譯本羅馬字版(TTVR)-闽南语

Io-tòa ê Phì-jū

1Siōng Chú tùi góa kóng, “Lí khì bóe chi̍t tiâu môa-pò͘ chòe ê io-tòa lâi hâ-io, m̄-thang kā i chìm tī chúi--ni̍h.”

2Góa chiū chiàu Siōng Chú ê ōe, bóe chi̍t tiâu io-tòa hâ-io.

3-4Siōng Chú ê ōe tē-jī piàn kā góa kóng, “Chiong lí bóe ê io-tòa hâ--teh. Khí--lâi, khì Iù-hoat-la-tí-hô, chiong hit-tiâu io-tòa chhàng tī chio̍h-thâu-phāng.”

5Góa chiàu Siōng Chú ê bēng-lēng, chiong hit-tiâu io-tòa chhàng tī Iù-hoat-la-tí-hô hia.

6Kè chin chōe ji̍t, Siōng Chú koh tùi góa kóng, “Lí kóaⁿ-kín khì Iù-hoat-la-tí-hô, chiong góa kiò lí chhàng tī hia ê io-tòa the̍h--lâi.”

7Góa chiū khì Iù-hoat-la-tí-hô hia, chiong góa chhàng ê io-tòa ó͘--chhut-lâi. Góa chi̍t-ē khòaⁿ, io-tòa í-keng nōa--khì, bô lō͘-ēng lah.

8-9Siōng Chú koh tùi góa kóng, “Góa beh chiàu án-ni phò-hoāi Iû-tāi ê kiau-ngō͘, í-ki̍p Iâ-lō͘-sat-léng koh-khah tōa ê kiau-ngō͘.

10Chiah-ê siâ-ok ê jîn-bîn m̄-khéng thiaⁿ góa ê ōe, tè in kò͘-chip ê sim khì pài pa̍t-ê sîn-bêng; in ōe chhin-chhiūⁿ chit-tiâu bô lō͘-ēng ê io-tòa.

11Góa ài Í-sek-lia̍t kap Iû-tāi choân-ke kap góa kiat-liân, chhin-chhiūⁿ io-tòa kap lâng ê seng-khu kiat-liân, chiâⁿ-chòe góa ê chú-bîn, hō͘ góa tit-tio̍h miâ-siaⁿ, chheng-chàn, kap êng-kng; m̄-kú in m̄ thiaⁿ-thàn. Siōng Chú án-ni soan-kò.”

Chiú-àng ê Phì-jū

12Lí khì tùi jîn-bîn kóng, “Siōng Chú — Í-sek-lia̍t ê Siōng-tè kā góa kóng: Tio̍h kiò Í-sek-lia̍t-lâng chiong chiú kā chiú-àng lóng tóe hō͘ tīⁿ. In ōe kóng, ‘Goán soah m̄-chai ta̍k-ê chiú-àng lóng tio̍h tóe hō͘ móa.’

13Lí tio̍h tùi in kóng, ‘Siōng Chú án-ni kóng: Góa beh ēng chiú hō͘ chē tī Tāi-pi̍t ông-ūi--ê, chè-si, sian-ti, kap Iâ-lō͘-sat-léng só͘-ū ê lâng lóng lim kah chùi.

14Góa beh hō͘ in chùi kah khí chhiong-tu̍t, liân pē-kiáⁿ mā án-ni. Góa bô beh tông-chêng, bô beh thiàⁿ-sioh, bô beh lîn-bín, it-tēng beh kā in thiat-tóe siau-bia̍t.’”

Tùi Kiau-ngō͘ ê Hêng-ûi ê Kéng-kò

15Lín Í-sek-lia̍t-lâng ah,

tio̍h chù-ì thiaⁿ, m̄-thang kiau-ngō͘.

Siōng Chú í-keng án-ni soan-pò͘.

16Tī Siōng Chú — lín ê Siōng-tè iáu-bē hō͘ o͘-àm lâi kàu,

tī o͘-àm ê soaⁿ--ni̍h lín ê kha iáu-bē poa̍h-tó í-chêng,

lín tio̍h chiong êng-kng kui hō͘ I.

Nā bô, I ōe hō͘ sí-ìm ê o͘-àm tāi-thòe lín kî-thāi ê kng-bêng.

17Lín nā m̄ thiaⁿ,

góa ōe in-ūi lín ê kiau-ngō͘ àm-tiong thî-khàu;

góa ōe ūi-tio̍h lín thòng-khó͘ lâu ba̍k-sái,

in-ūi Siōng Chú ê chú-bîn hō͘ lâng lia̍h--khì lah.

18Siōng Chú kiò góa tùi ông kap thài-hō͘ kóng, “Lín tio̍h khiam-pi chē tī ē-bīn, in-ūi lín thâu-khak téng súi ê ông-koan í-keng lak--lo̍h-khì.”

19Nî-kek-hu hiah-ê siâⁿ ê mn̂g koaiⁿ-tiâu-tiâu, bô lâng chhut-ji̍p; Iû-tāi jîn-bîn lóng siū-lia̍h lah.

20 Iâ-lō͘-sat-léng, tio̍h chù-ì khòaⁿ tùi pak-pêng lâi ê tùi-te̍k. Chá-chêng kau-tài lí chiàu-kò͘, lí só͘ khoa-kháu ê jîn-bîn, taⁿ tī tó-ūi?

21Lí í-chêng chai-pôe ê bêng-iú lâi thóng-tī lí, lí iáu ū sím-mi̍h ōe thang kóng? Lí ōe thòng-khó͘ chhin-chhiūⁿ sán-hū chhui-chūn.

22Lí siūⁿ-beh chai, “Sī-án-chóaⁿ góa ū chiah-ê chai-lān? Sī-án-chóaⁿ góa ê saⁿ hō͘ lâng thiah-phòa, góa hō͘ lâng kiông-pō?” Sī in-ūi lí hoān ê chōe chin tāng.

23Kó͘-si̍t-lâng nā ōe-tàng kái-piàn in ê phê-hu-sek, pà kái-piàn in ê hoe-tiám, lín chiah-ê koàn-sì chòe pháiⁿ ê lâng, mā ōe-tàng chòe hó.

24-25Siōng Chú kóng: Góa beh kā lín kóaⁿ-sòaⁿ, chhin-chhiūⁿ khòng-iá ê hong chhe-sòaⁿ chháu-iù. Che sī lín eng-kai tit--tio̍h ê pò-èng; in-ūi lín í-keng bōe-kì-tit góa, khì pài hu-ké ê sîn-bêng.

26Góa beh hian lí ê kûn khàm lí ê bīn, hō͘ lâng khòaⁿ-tio̍h lí ê kiàn-siàu.

27Lí tī soaⁿ-lûn-á, tī iá-gōa ho̍k-sāi hiah-ê sîn-bêng, chhin-chhiūⁿ chhut-siaⁿ kiâⁿ îm-loān khó-ò͘ⁿ ê kéng-siōng, góa lóng ū khòaⁿ--kìⁿ.

Iâ-lō͘-sat-léng ah, lí beh kàu tī-sî chiah ōe chheng-khì? Lí ū chai-hō lah!

Iâ-lī-bí-su 13 - 現代台語譯本羅馬字版(TTVR)-闽南语

Learn More About Us