Hô-se-a-su 13

Hô-se-a-su 13 - 現代台語譯本羅馬字版(TTVR)-闽南语

Í-sek-lia̍t Chòe-āu ê Sím-phòaⁿ

1Chá-chêng Í-hoat-liân chi-cho̍k chi̍t-ē kóng-ōe, lâng lóng phi̍h-phi̍h-chhoah;

i tī Í-sek-lia̍t tiong siū chun-tiōng.

M̄-kú i pài Pa-le̍k, hoān-chōe tì-kàu sí.

2In hoān-chōe, ná hoān ná chōe;

in ēng gûn ūi-tio̍h ka-kī chō ngó͘-siōng;

sai-hū chiàu in ê siūⁿ-hoat chù-chō.

Ngó͘-siōng lóng sī lâng chō--ê.

In kóng, “Lán lâi tùi gû-á-siōng hiàn-chè,

koh kā in chim.”

3Án-ni, in ōe chhin-chhiūⁿ chá-khí-sî ê bū,

chhin-chhiūⁿ chheng-chá ê lō͘-chúi, chin kín chiū ta--khì;

chhin-chhiūⁿ ngó͘-kok-tiûⁿ ê chho͘-khng,

chhin-chhiūⁿ tùi thang-á chhèng--chhut-lâi ê ian,

hong chi̍t-ē chhe chiū siau-sit.

4Tùi lí chhut Ai-ki̍p-tōe ê sî,

góa chiū-sī Siōng Chú — lí ê Siōng-tè;

góa í-gōa lí m̄-thang jīn pa̍t-ê chòe Siōng-tè;

góa í-gōa bô Kiù-chú.

5Tī khòng-iá ta-sò ê tōe,

góa chiū bat lí, chiàu-kò͘ lí.

6Góa iúⁿ-chhī chiah-ê jîn-bîn, hō͘ in chia̍h-pá;

in chi̍t-ē chia̍h-pá chiū chū-ko,

soah bōe-kì-tit góa.

7Só͘-í, góa beh chhin-chhiūⁿ sai kong-kek in,

chhin-chhiūⁿ pà bih tī lō͘-piⁿ tng-tán in.

8Góa beh kā in kong-kek:

chhin-chhiūⁿ sit-lo̍h kiáⁿ ê hîm-bú thiah-li̍h in ê heng-khám;

chhin-chhiūⁿ sai-bú kā in thun-chia̍h;

chhin-chhiūⁿ iá-siù kā in thiah-chhùi.

9 Í-sek-lia̍t ah, góa beh kā lí húi-bia̍t;

siáⁿ-lâng ōe-tàng pang-chān lí?

10Lí thó beh ài ū ông kap léng-siù lâi kiù lí.

Taⁿ ông tī tó-ūi?

Hiah-ê siâⁿ ê léng-siù tī tó-ūi?

11Góa tī siū-khì tiong thòe lín siat-li̍p ông,

mā tī tōa siū-khì tiong kā i hòe-tû.

12 Í-hoat-liân ê chōe-kò lóng ū kì-lio̍k,

i ê chōe-ok lóng ū pó-chûn.

13I ōe siū chhui-chūn ê thàng-thiàⁿ;

i chhin-chhiūⁿ gōng-kiáⁿ,

chhut-sì ê sî í-keng kàu, iáu bih tī chú-kiong kháu m̄ chhut--lâi.

14Góa kiám tio̍h kiù in thoat-lī Im-hú ê koân-sè?

Góa kiám tio̍h sio̍k-hôe in thoat-lī Sí-bông?

Sí-bông ah, lí ê chai-hāi tī tó-ūi?

Im-hú ah, lí ê húi-bia̍t tī tó-ūi?

Góa it-tēng bô beh lîn-bín in.

15Sui-jiân Í-hoat-liân pí pa̍t-ê chi-cho̍k khah hoân-êng,

m̄-kú Siōng Chú ōe hō͘ kiông-lia̍t ê tang-hong tùi khòng-iá chhe--lâi.

I ê chúi-chôaⁿ ōe ta--khì,

chúi-goân ōe tn̄g--khì.

I só͘ chek-chū it-chhè ê châi-pó lóng ōe siū chhiúⁿ-toa̍t.

16 Sat-má-lī-a-lâng tio̍h tam-tng pōe-ge̍k Siōng-tè ê chōe;

in ōe tó tī to-ē;

in ê eⁿ-á ōe hō͘ lâng siak-sí;

ū-sin ê hū-jîn-lâng ê pak-tó͘ mā ōe hō͘ lâng phòa-khui.

Hô-se-a-su 13 - 現代台語譯本羅馬字版(TTVR)-闽南语

Learn More About Us