Khé-sī-lio̍k 17

Khé-sī-lio̍k 17 - 現代台語譯本羅馬字版(TTVR)-闽南语

Tōa Îm-hū kap Siù

1Hiah-ê the̍h chhit tè óaⁿ ê chhit ê thiⁿ-sài ê chi̍t ê lâi kap góa kóng-ōe, kóng, “Lâi, góa beh hō͘ lí khòaⁿ chē tī hô-liû téng-bīn hit-ê tōa îm-hū só͘ tio̍h siū ê sím-phòaⁿ.

2Tōe-chiūⁿ ê kun-ông bat kap i kiâⁿ-îm; tōe-chiūⁿ ê chū-bîn mā bat lim i îm-loān ê chiú lim kàu chiú-chùi.”

3Góa siū Sèng Sîn kám-tōng, hō͘ thiⁿ-sài chhōa-khì khòng-iá. Góa ū khòaⁿ-kìⁿ chi̍t ê hū-jîn-lâng chē tī chi̍t chiah chu-âng-sek, koh chhiong-móa siat-to̍k ê miâ-hō ê siù téng-bīn; chit-chiah siù ū chhit ê thâu, cha̍p ki kak.

4Chit-ê hū-jîn-lâng chhēng chí-sek kap chu-âng-sek ê saⁿ, ēng kim, pó-chio̍h, kap chin-chu chng-thāⁿ, chhiú the̍h kim-poe, tóe-móa khó-ò͘ⁿ ê mi̍h kap îm-loān ê ù-òe.

5I ê thâu-hia̍h ū siá chi̍t ê miâ, ū ún-ba̍t ê ì-sù, chiū-sī “Tōa Pa-pí-lûn, tōe-chiūⁿ îm-hū kap khó-ò͘ⁿ ê mi̍h ê lāu-bú”.

6Góa khòaⁿ-kìⁿ hit-ê hū-jîn-lâng lim sìn-tô͘ ê huih kap ūi-tio̍h Iâ-so͘ chòe kiàn-chèng ê sûn-tō-chiá ê huih, lim kàu chùi.

Góa khòaⁿ-tio̍h i ê sî tōa tio̍h-kiaⁿ.

7Thiⁿ-sài chiū kā góa kóng, “Sī-án-chóaⁿ tio̍h-kiaⁿ? Góa beh chiong chit-ê hū-jîn-lâng kap i só͘ khiâ hit-chiah ū chhit ê thâu cha̍p ki kak ê siù ê pì-bi̍t kā lí kóng.

8Lí só͘ khòaⁿ--tio̍h hit-chiah siù, kè-khì ū, hiān-chāi bô, teh-beh koh tùi bô-tóe-chhim-khiⁿ khí--lâi, chòe-āu bia̍t-bông. Tōe-chiūⁿ ê chū-bîn, tùi chhòng-sè í-lâi, in ê miâ bô kì tī oa̍h-miā-chheh--ê, khòaⁿ-tio̍h hit-chiah siù ōe tio̍h-kiaⁿ kî-koài, in-ūi hit-chiah siù kè-khì ū, hiān-chāi bô, āu-lâi ōe koh chhut-hiān.

9“Chit-ê tāi-chì tio̍h ēng tì-hūi lâi lí-kái. Hit chhit ê thâu chiū-sī hū-jîn-lâng só͘ chē ê chhit chō soaⁿ, in mā-sī chhit ê ông.

10Kî-tiong gō͘ ê í-keng tó--lo̍h-khì, chi̍t ê iáu tī--teh, lēng-gōa chi̍t ê iáu-bē lâi, nā lâi i it-tēng chiām-sî lâu--teh nā-tiāⁿ.

11Kè-khì ū, hiān-chāi bô hit-chiah siù chiū-sī tē-poeh ê ông, sī chhit ê ông tiong-kan ê chi̍t ê, i mā ōe bia̍t-bông.

12“Lí só͘ khòaⁿ--tio̍h ê cha̍p ki kak chiū-sī hit cha̍p ê iáu m̄-bat thóng-tī ê ông; m̄-kú in ōe tit-tio̍h koân choh-ông kap siù chòe-hé thóng-tī chi̍t tiám-cheng kú.

13Chit cha̍p ê ông tông-ì chiong in ê lêng-le̍k kap koân-pèng kau hō͘ hit-chiah siù.

14In beh kap Iûⁿ-ko kau-chiàn, m̄-kú Iûⁿ-ko ōe thâi-iâⁿ chiah-ê ông, in-ūi I sī bān-chú ê Chú, bān-ông ê Ông; kap I chòe-hé hiah-ê siū ho͘-tiàu, siū kéng-soán, tiong-si̍t ê lâng mā ōe tek-sèng.”

15Thiⁿ-sài koh kā góa kóng, “Lí só͘ khòaⁿ--tio̍h hit-ê îm-hū chē--teh ê hô-liû chiū-sī ta̍k-ê bîn-cho̍k, ta̍k-ê cho̍k-kûn, ta̍k-ê pang-kok, kap kóng ta̍k-khoán gú-giân ê lâng.

16Lí só͘ khòaⁿ--tio̍h hit cha̍p ki kak kap hit-chiah siù ōe oàn-hūn hit-ê îm-hū, mā ōe hō͘ i bô i-óa, chhiah-sin-lō͘-thé; in ōe thun-chia̍h i ê bah, koh ēng hé kā i sio-bia̍t.

17In-ūi Siōng-tè chiong chip-hêng I ê chí-ì ê ì-liām hē tī hit cha̍p ê ông ê sim, hō͘ in tâng-sim chiong in ê kok kau hō͘ hit-chiah siù, ti̍t-kàu Siōng-tè ê ōe èng-giām.

18Lí só͘ khòaⁿ--tio̍h hit-ê hū-jîn-lâng chiū-sī teh chiáng-koán tōe-chiūⁿ hiah-ê kun-ông ê hit-chō tōa-siâⁿ.”

Khé-sī-lio̍k 17 - 現代台語譯本羅馬字版(TTVR)-闽南语

Learn More About Us