Í-se-kiat-su 21

Í-se-kiat-su 21 - 現代台語譯本羅馬字版(TTVR)-闽南语

Siōng Chú ê To

1Siōng Chú tùi góa kóng,

2“Jîn-chú ah, lí tio̍h bīn ǹg Iâ-lō͘-sat-léng, thoân-káng kong-kek sèng-tiān ê ōe, kóng kéng-kò Í-sek-lia̍t ê ū-giân.

3Tio̍h tùi Í-sek-lia̍t-lâng kóng, góa Siōng Chú án-ni kóng, ‘Góa beh kap lí choh-tùi, beh pu̍ih to thâi lín, hó-lâng pháiⁿ-lâng lóng châu-bia̍t.

4Góa beh châu-bia̍t lín tiong-kan hó-lâng kap pháiⁿ-lâng, só͘-í góa beh pu̍ih to, tùi lâm thâi kàu pak, thâi-sí só͘-ū ê lâng.

5Ta̍k-ê lâng chiū ōe chai, góa Siōng Chú to chi̍t-ē pu̍ih-chhut, chiū bô koh siu-hôe.’

6“Jîn-chú ah, lí tio̍h tī in ê bīn-chêng thó͘-khùi, chhin-chhiūⁿ khó͘-thàng chhoeh-sim ê lâng.

7Nā ū lâng mn̄g lí, ‘Lí sī-án-chóaⁿ thó͘-khùi?’ Lí tio̍h kā in kóng, ‘In-ūi ū hong-siaⁿ thoân--lâi, jîn-sim-hông-hông, lâng-lâng kha-nńg chhiú-nńg, sit-chì phòa-táⁿ. Chai-hō kàu lah, it-tēng ōe hoat-seng.’” Chì-koân ê Siōng Chú án-ni soan-kò.

8Siōng Chú tùi góa kóng,

9“Jîn-chú ah, lí tio̍h kóng ū-giân, tio̍h kóng Siōng Chú án-ni kóng:

Ū chi̍t ki to, bôa-lāi-lāi koh chhit kah kim-sih-sih.

10Bôa-lāi-lāi sī beh thâi-lâng,

chhit kah kim-sih-sih sī beh hō͘ i chhin-chhiūⁿ sih-nà.

Góa ê chú-bîn m̄ thiaⁿ koáiⁿ-á ê kéng-kò, m̄ kiaⁿ chhê-á ê hêng-hoa̍t.

Án-ni, lán ū sím-mi̍h thang khoài-lo̍k?

11To í-keng chhit kah kim-sih-sih thang ēng lah;

to í-keng bôa-lāi, beh kau hō͘ sat-chhiú lah.

12“Jîn-chú ah, tio̍h pi-siong thî-khàu!

To-kiàm beh lîm-kàu góa ê chú-bîn,

beh lîm-kàu Í-sek-lia̍t ê léng-siù;

in beh kap góa ê chú-bîn chòe-hé siū thâi.

Lí tio̍h tûi-heng thó͘-khùi.

13Lín siūⁿ khòaⁿ-bāi,

to-kiàm liân ū koân-pèng ê koáiⁿ-á to m̄ kiaⁿ,

iáu ū sím-mi̍h bōe hoat-seng?

Chì-koân ê Siōng Chú án-ni soan-kò.

14“Só͘-í, jîn-chú ah, lí tio̍h siū-khì tǹg toh-á kóng ū-giân: Ū chi̍t ki to chi̍t-piàn koh chi̍t-piàn put-toān teh phut, thâi-sí lâng, kā lâng ûi-khùn tô͘-sat.

15Góa beh tī in só͘-ū ê siâⁿ-mn̂g piⁿ chí-phài chit-ki to khì tô͘-sat, hō͘ góa ê chú-bîn phòa-táⁿ, poa̍h-tó. Ài ah, chit-ki bôa-lāi-lāi chhit kah kim-sih-sih ê to teh tô͘-sat!

16To ah, lí tio̍h phut chiàⁿ-pêng, phut tò-pêng; to-mî ǹg tó chi̍t pêng chiū phut hit-pêng.

17Góa mā beh tǹg toh-á, góa ê siū-khì chiah ōe siau. Góa Siōng Chú án-ni soan-kò.”

Pa-pí-lûn-ông ê To

18Siōng Chú tùi góa kóng,

19“Jîn-chú ah, lí tio̍h chiong Pa-pí-lûn-ông tòa to-kiàm lâi chìn-kong ê nn̄g tiâu lō͘-sòaⁿ ōe--chhut-lâi; chit nn̄g tiâu lō͘-sòaⁿ lóng tio̍h tùi kâng chi̍t ê kok-ka choh khí-tiám, koh tī chit-tiâu lō͘ hun-chhe beh khì bô kâng-khoán siâⁿ-chhī ê só͘-chāi chhāi lō͘-phiau.

20To-kiàm beh keng-kè ê lō͘, chi̍t tiâu ǹg A-bûn ê La-pa-siâⁿ, chi̍t tiâu ǹg Iû-tāi kian-kò͘ ê siâⁿ Iâ-lō͘-sat-léng.

21Pa-pí-lûn-ông kàu hun-chhe-lō͘, tī lō͘-kháu iô-chìⁿ pok-kòa, chhâ-khòaⁿ hiàn-chòe seng-lé ê koaⁿ, kiû-mn̄g i ê ngó͘-siōng.

22I ê chiàⁿ-chhiú the̍h--tio̍h ê chìⁿ sī kí kong-táⁿ Iâ-lō͘-sat-léng ê chìⁿ, kà in chún-pī lòng-siâⁿ ê thûi, hā-lēng tô͘-sat, tōa-siaⁿ háng-hoah, chō thô͘-tui, khí koân-tâi, ēng lòng-siâⁿ ê thûi kong-táⁿ siâⁿ-mn̂g.

23Tùi hiah-ê chiù-chōa kap Pa-pí-lûn kiat-bêng ê Iû-tāi-lâng khòaⁿ--khí-lâi, pok-kòa ê chí-sī m̄-tio̍h; m̄-kú Pa-pí-lûn-ông beh hō͘ in ōe-kì-tit ka-kī só͘ hoān ê chōe, mā beh kā in lia̍h--khì.”

24Chì-koân ê Siōng Chú án-ni kóng, “Lín ê chōe-kò í-keng lō͘-hiān, chèng-lâng lóng chai lín ê kè-hoān; lín ê hêng-ûi hián-chhut lín ê chōe-ok. Lín it-tēng ōe siū hêng-hoa̍t, hō͘ lâng lia̍h--khì.

25“Lí chit-ê siâ-ok kai-sí ê Í-sek-lia̍t-ông, lí chōe-ok koàn-boán, siū hêng-hoa̍t ê sî-kan kàu lah.

26Góa — Chì-koân ê Siōng Chú án-ni kóng, ‘Kā ông-koan chhái--khí-lâi! Kā lé-bō the̍h--lo̍h-lâi! Chêng-hêng bô koh chhin-chhiūⁿ chá-chêng, tāi-chì beh kái-piàn, bô koân-le̍k ê lâng siū ko-seng, thóng-tī-chiá beh lo̍h-tâi.

27Góa beh kā chit-ê siâⁿ húi-hoāi, húi-hoāi, koh-chài húi-hoāi. Tán góa chí-phài lâi hêng-hoa̍t ê lâng kàu, chit-ê kok chiū bô koh chûn-chāi. Hit-sî góa beh chiong kok kau hō͘ i.’”

To kap A-bûn-lâng

28“Jîn-chú ah, lí tio̍h kóng ū-giân, kóng, ‘Koan-hē A-bûn-lâng kap in tùi Í-sek-lia̍t-lâng ê lêng-jio̍k, Chì-koân ê Siōng Chú án-ni kóng: Ū chi̍t ki bôa-lāi-lāi, chhit kah kim-sih-sih ê to, í-keng pu̍ih-chhut beh thâi-lâng.

29Lín khòaⁿ ê īⁿ-siōng sī hoàn-sióng, pok-kòa tit--tio̍h ê ū-giân sī pe̍h-chha̍t. To beh chām-tn̄g lín ê ām-kún. Lín ê chōe-ok koàn-boán, lín siū hêng-hoa̍t ê sî-kan kàu lah.

30“‘Siu to ji̍p siù! Góa beh tī lí ê kò͘-hiong, lí chhut-sì tōa-hàn ê só͘-chāi sím-phòaⁿ lí.

31Góa beh ǹg lí piàⁿ-lo̍h góa ê thòng-hūn, ēng góa tōa siū-khì ê hé kā lí sio. Góa beh kā lí kau hō͘ iá-bân chân-jím ê sat-chhiú.

32Lí beh chhin-chhiūⁿ chhâ hō͘ hé sio; lí ê huih beh lâu tī chit-tè thó͘-tōe, bô lâng koh ōe-kì-tit lí. Góa Siōng Chú án-ni soan-kò.’”

Í-se-kiat-su 21 - 現代台語譯本羅馬字版(TTVR)-闽南语

Learn More About Us