Pí-tek Hō͘-su 1

Pí-tek Hō͘-su 1 - 現代台語譯本羅馬字版(TTVR)-闽南语

Chhéng-an

1Góa Se-biān Pí-tek

sī Iâ-so͘ Ki-tok ê po̍k-jîn kap sù-tô͘, góa siá-phoe hō͘ hiah-ê khò lán ê Siōng-tè kap Kiù-chú Iâ-so͘ Ki-tok ê gī, kap goán chòe-hé niá-siū kâng-khoán pó-kùi sìn-gióng ê lâng.

2Goān lín thong-kè jīn-bat Siōng-tè kap lán ê Chú Iâ-so͘ tit-tio̍h Siōng-tè só͘ sù hong-hong-hù-hù ê un-tián kap pêng-an!

Siōng-tè ê Ho͘-tiàu kap Kéng-soán

3Siōng-tè ū ēng I ê lêng-le̍k chiong kèng-khiân ê seng-oa̍h só͘ su-iàu ê it-chhè sù hō͘ lán; che sī thong-kè lán jīn-bat tiàu lán lâi hun-hióng I ê êng-kng kap liông-siān hit-ūi Siōng-tè lâi--ê.

4Án-ni, I ū chiong ke̍k-tōa koh pó-kùi ê èng-ún sù hō͘ lán, hō͘ lín thong-kè chiah-ê èng-ún thang thoat-lī sè-chiūⁿ ê io̍k-bōng só͘ chō-sêng ê hú-pāi lâi hun-hióng Siōng-tè ê pún-sèng.

5Ūi-tio̍h chit-ê, lín tio̍h chīn-la̍t phah-piàⁿ, hō͘ lín ū sìn-sim koh ū tek-hēng, ū tek-hēng koh ū tì-sek,

6ū tì-sek koh ū chiat-chè, ū chiat-chè koh ū jím-nāi, ū jím-nāi koh ū kèng-khiân,

7ū kèng-khiân koh ū chhiú-chiok-chi-chêng, ū chhiú-chiok-chi-chêng koh ū jîn-ài.

8Chiah-ê sī lín só͘ su-iàu ê phín-tek. Chiah-ê lín nā lóng ū, koh ná chhiong-si̍t, ōe hō͘ lín koh-khah chek-ke̍k, koh-khah iú-hāu jīn-bat lán ê Chú Iâ-so͘ Ki-tok.

9Lâng nā bô chiah-ê tek-hēng, sī toán-sī, sī sit-bêng, bōe-kì-tit i í-chêng ê chōe í-keng ū sóe chheng-khì.

10Só͘-í, góa ê hiaⁿ-tī chí-bē, lín tio̍h koh-khah lô-le̍k lâi chèng-bêng Siōng-tè tùi lín ê ho͘-tiàu kap kéng-soán sī khak-si̍t--ê; lín nā án-ni chòe chiū bōe tūi-lo̍h.

11Án-ni, Siōng-tè ōe tōa-tōa sù-hok hō͘ lín thang chìn-ji̍p lán ê Chú — Kiù-chú Iâ-so͘ Ki-tok éng-oán ê Kok-tō͘.

12Só͘-í, sui-jiân lín í-keng chai chiah-ê tāi-chì, koh kian-tēng chip-siú lín só͘ niá-siū ê chin-lí, góa iáu-kú beh put-sî kā lín thê-chhíⁿ chiah-ê tāi-chì.

13Góa siūⁿ, góa iáu oa̍h--teh ê sî, tio̍h kā lín thê-chhíⁿ.

14Lán ê Chú Iâ-so͘ Ki-tok í-keng ū chheng-chhó kā góa chí-sī, hō͘ góa chai bô kú chiū ōe thoat-lī chit-ê ōe pāi-hoāi ê seng-khu.

15Góa beh chīn-la̍t siūⁿ pān-hoat, hō͘ lín tī góa lī-khui sè-kan í-āu put-sî ōe-kì-tit chiah-ê tāi-chì.

Kiàn-chèng Ki-tok ê Êng-kng

16Goán tùi lín só͘ kóng Chú Iâ-so͘ Ki-tok tōa koân-lêng lâi-lîm ê sū, m̄-sī kun-kù lâng lia̍p-chō--chhut-lâi hu-ké ê thoân-soat; goán ū chhin-ba̍k khòaⁿ-kìⁿ I ê chun-êng.

17I tùi Pē Siōng-tè niá-siū chun-kùi kap êng-iāu ê sî, hit-ūi Chun-giâm ê Êng-kng — Siōng-tè chhut-siaⁿ kóng, “Chit-ê sī góa só͘ thiàⁿ ê Kiáⁿ, I, góa chin ì-ài.”

18I tī sèng-soaⁿ ê sî goán mā tī hia, ū chhin-sin thiaⁿ-kìⁿ tùi thiⁿ-téng chhut--lâi chit-ê siaⁿ.

19Só͘-í goán tùi sian-ti só͘ soan-pò͘ ê sìn-sit koh-khah ū khak-sìn. Lín tio̍h chù-ì thiaⁿ, in-ūi chit-ê sìn-sit chhin-chhiūⁿ chi̍t pha teng tī o͘-àm ê só͘-chāi teh chiò, chiò kàu thiⁿ-kng, kàu khé-bêng-chhiⁿ chhut-hiān tī lín sim-lāi ê sî.

20Siōng iàu-kín--ê tio̍h chai, Sèng-keng só͘-ū ê ū-giân m̄-thang chiàu ka-kī ê ì-sù kóe-seh.

21In-ūi ū-giân m̄-sī chhut-tī lâng ê ì-sù, sī lâng siū Sèng Sîn kám-tōng kóng-chhut tùi Siōng-tè lâi ê sìn-sit.

Pí-tek Hō͘-su 1 - 現代台語譯本羅馬字版(TTVR)-闽南语

Learn More About Us