Lī-bī-kì 17

Lī-bī-kì 17 - 現代台語譯本羅馬字版(TTVR)-闽南语

Thâi Cheng-siⁿ Hiàn-chè ê Tiâu-lē

1Siōng Chú hoan-hù Mô͘-se, kóng,

2“Lí tio̍h tùi A-lûn kap i ê kiáⁿ, í-ki̍p Í-sek-lia̍t chèng-lâng soan-pò͘ Siōng Chú bēng-lēng ê tiâu-lē:

3Só͘-ū Í-sek-lia̍t-ke ê lâng, bô-lūn tī iâⁿ-lāi iâⁿ-gōa thâi gû-káng, mî-iûⁿ á-sī soaⁿ-iûⁿ,

4nā bô seng khan-lâi hōe-bō͘ mn̂g-kháu, tī Siōng Chú hōe-bō͘ ê thâu-chêng hiàn hō͘ Siōng Chú chòe lé-mi̍h, thâi cheng-siⁿ ê chōe beh kui tī hit-ê lâng, in-ūi i ū lâu in ê huih; hit-ê lâng tio̍h tùi jîn-bîn tiong-kan kek-chhut.

5In-ūi Í-sek-lia̍t-lâng bat tī iá-gōa thâi cheng-siⁿ hiàn-chè; taⁿ tio̍h chiong cheng-siⁿ tòa-lâi hōe-bō͘ mn̂g-kháu, kau hō͘ chè-si, hiàn hō͘ Siōng Chú chòe pêng-an-chè.

6Chè-si tio̍h chiong huih hiù tī hōe-bō͘ mn̂g-kháu Siōng Chú ê chè-tôaⁿ, chiong iû sio chòe phang-phang ê chè hiàn hō͘ Siōng Chú.

7Í-sek-lia̍t-lâng m̄-thang koh hiàn-chè hō͘ in kiâⁿ siâ-îm kèng-pài ê soaⁿ-iûⁿ-kúi-mô͘. Che beh chòe lín sè-sè-tāi-tāi éng-oán ê kui-lē.

8“Lí tio̍h kā in hoan-hù, só͘-ū Í-sek-lia̍t-ke ê lâng, á-sī kià-ku tī in tiong-kan ê gōa-cho̍k-lâng, hiàn sio-hòa-chè á-sī chè-mi̍h,

9nā bô tòa-lâi hōe-bō͘ mn̂g-kháu hiàn hō͘ Siōng Chú, hit-ê lâng tio̍h tùi jîn-bîn ê tiong-kan kek-chhut.”

Kìm-chí Chia̍h Huih

10Siōng Chú kóng, “Só͘-ū sio̍k Í-sek-lia̍t-ke ê lâng, á-sī kià-ku tī lín tiong-kan ê gōa-cho̍k-lâng, nā chia̍h huih, góa beh tùi hit-ê lâng pìⁿ-bīn, kā i tùi jîn-bîn tiong-kan kek-chhut.

11Tōng-bu̍t ū huih chiah ū sìⁿ-miā; góa chiong huih hō͘ lín, sī beh ēng chit-ê huih tī chè-tôaⁿ téng ūi lín ê sìⁿ-miā sio̍k-chōe; in-ūi huih sī sìⁿ-miā, ōe-tàng sio̍k-chōe.

12Só͘-í góa tùi Í-sek-lia̍t-lâng kóng: Lín lóng bōe-ēng-tit chia̍h huih, kià-ku tī lín tiong-kan ê gōa-cho̍k-lâng mā bōe-ēng-tit chia̍h huih.

13“Só͘-ū ê Í-sek-lia̍t-lâng, á-sī kià-ku tī lín tiong-kan ê gōa-cho̍k-lâng, nā phah-la̍h tit-tio̍h ōe-chia̍h--tit ê pe-chiáu kap cháu-siù, tio̍h kā i pàng huih, ēng thô͘ kā huih khàm--khí-lâi.

14Só͘-ū ê tōng-bu̍t, huih sī i ê sìⁿ-miā, só͘-í góa tùi Í-sek-lia̍t-lâng kóng: Bô-lūn sím-mi̍h tōng-bu̍t ê huih, lín lóng bōe-ēng-tit chia̍h. In-ūi tōng-bu̍t ū huih chiah ū sìⁿ-miā; chia̍h huih ê lâng it-tēng tio̍h siū kek-chhut.

15“Nā ū lâng chia̍h chū-jiân sí á-sī hō͘ iá-siù thiah-li̍h ê tōng-bu̍t, bô-lūn sī chāi-tōe-lâng á-sī gōa-cho̍k-lâng lóng sī bô chheng-khì, tio̍h sóe i ê saⁿ, sóe seng-khu, kàu ji̍t lo̍h chiah chheng-khì.

16M̄-kú i nā bô sóe-saⁿ, bô sóe seng-khu, tio̍h tùi ka-kī ê chōe hū chek-jīm.”

Lī-bī-kì 17 - 現代台語譯本羅馬字版(TTVR)-闽南语

Learn More About Us