Sū-su-kì 6

Sū-su-kì 6 - 現代台語譯本羅馬字版(TTVR)-闽南语

Ki-tiân

1 Í-sek-lia̍t-lâng koh chòe Siōng Chú khòaⁿ-chòe pháiⁿ ê sū, Siōng Chú chiū chiong in kau tī Bí-tiân-lâng ê chhiú chhit nî.

2Bí-tiân-lâng pí Í-sek-lia̍t-lâng khah kiông; Í-sek-lia̍t-lâng ūi-tio̍h beh tô-pī Bí-tiân-lâng, chiū tī soaⁿ--ni̍h ó͘ soaⁿ-tōng, khí iàu-sài.

3Í-sek-lia̍t-lâng ta̍k-piàn iā-chéng liáu-āu, Bí-tiân-lâng, A-má-le̍k-lâng, kap tang-pêng ê pō͘-cho̍k lóng lâi kong-kek in,

4tī hia chat-iâⁿ, chiong hit só͘-chāi kàu Ka-sat kui-ê tōe-khu ê lông-chok-bu̍t lóng húi-hoāi, mā bô lâu gû, iûⁿ, lû, kap chia̍h-mi̍h hō͘ Í-sek-lia̍t-lâng.

5In tòa cheng-siⁿ kap pò͘-pîⁿ lâi, lâng-gia̍h kap lo̍k-tô sǹg bōe liáu; in chhin-chhiūⁿ kui-kûn chháu-meh húi-hoāi hit-ê tōe-khu.

6Í-sek-lia̍t-lâng in-ūi Bí-tiân-lâng ê iân-kò͘, chhiⁿ-chhám-lo̍k-phek, chiū kiû-kiò Siōng Chú.

7 Í-sek-lia̍t-lâng in-ūi Bí-tiân-lâng ê iân-kò͘ kiû-kiò Siōng Chú,

8Siōng Chú chiū chhe sian-ti khì in hia, tùi in kóng, “Siōng Chú — Í-sek-lia̍t ê Siōng-tè án-ni kóng, ‘Góa ū chhōa lín tùi Ai-ki̍p chòe lô͘-châi ê ke chhut--lâi.

9Góa kiù lín thoat-lī Ai-ki̍p-lâng kap só͘-ū ap-chè lín ê lâng ê chhiú, tī lín ê bīn-chêng kā in kóaⁿ-cháu, chiong in ê thó͘-tōe sù hō͘ lín.

10Góa mā bat tùi lín kóng: Góa sī Siōng Chú — lín ê Siōng-tè, só͘-í lín sui-jiân tòa tī A-mô͘-lī-lâng ê tōe, m̄-kú m̄-thang pài in ê sîn-bêng; chóng-sī lín m̄-khéng thiaⁿ góa ê ōe.’”

11Siōng Chú ê sù-chiá kàu Gô-hut-la, chē tī A-pí-í-siā chong-cho̍k ê lâng Iok-a-si ê siōng-chhiū kha; hit-sî Iok-a-si ê kiáⁿ Ki-tiân tī chiú-khut hia teh phah-be̍h, m̄-ài hō͘ Bí-tiân-lâng khòaⁿ--tio̍h.

12Siōng Chú ê sù-chiá tùi Ki-tiân hián-hiān, tùi i kóng, “Kiông-béng ê ióng-sū, Siōng Chú kap lí tông-chāi.”

13 Ki-tiân tùi i kóng, “Sian-siⁿ, Siōng Chú nā kap goán tông-chāi, sī-án-chóaⁿ goán ōe chiah-ni̍h chhiⁿ-chhám? Goán ê chó͘-sian só͘ kā goán kóng ‘Siōng Chú chhōa goán chhut Ai-ki̍p’ hiah-ê kî-sū tī tó-ūi? Taⁿ Siōng Chú í-keng pàng-sak goán, chiong goán kau hō͘ Bí-tiân-lâng.”

14Siōng Chú tùi Ki-tiân kóng, “Lí tio̍h ēng lí ê khùi-la̍t khì kái-kiù Í-sek-lia̍t-lâng thoat-lī Bí-tiân-lâng ê chhiú. Góa hiān-chāi chiū chhe-phài lí khì.”

15 Ki-tiân ìn I kóng, “Chú ah, góa ná ū hoat-tō͘ kái-kiù Í-sek-lia̍t? Goán ê chong-cho̍k sī Má-ná-se chi-cho̍k tiong siōng pi-bî--ê, góa sī goán tau siōng sòe--ê.”

16Siōng Chú tùi i kóng, “Góa beh kap lí tông-chāi; lí beh phah-pāi Bí-tiân-lâng, chhin-chhiūⁿ teh phah chi̍t ê lâng.”

17 Ki-tiân kóng, “Góa nā tùi lí tit-tio̍h un-tián, kiû lí hō͘ góa chi̍t ê chèng-kù, hō͘ góa chai kap góa kóng-ōe--ê chiū-sī Siōng Chú lí.

18Chhiáⁿ lí m̄-thang lī-khui chia, thèng-hāu góa tò--lâi, tòa lé-mi̍h hiàn hō͘ lí.”

Siōng Chú kóng, “Góa ōe thèng-hāu lí tò--lâi.”

19 Ki-tiân chiū khì chún-pī chi̍t chiah soaⁿ-iûⁿ-á, ēng cha̍p kong-kun mī-hún chòe bô-kàⁿ-piáⁿ; bah hē tī nâ-á, ēng e-á tóe thng, tòa kàu siōng-chhiū kha hiàn hō͘ Siōng Chú.

20Siōng-tè ê sù-chiá tùi i kóng, “Bah kap bô-kàⁿ-piáⁿ hē tī chit-ê chio̍h-pôaⁿ téng, thng tò--chhut-lâi.” I chiàu án-ni chòe.

21Siōng Chú ê sù-chiá chhun-chhut chhiú--ni̍h gia̍h ê koáiⁿ-á, ēng koáiⁿ-á-bé tu̍h bah kap bô-kàⁿ-piáⁿ, chiū ū hé tùi chio̍h-pôaⁿ to̍h--khí-lâi, chiong bah kap bô-kàⁿ-piáⁿ lóng sio--khì; Siōng Chú ê sù-chiá chiū tùi Ki-tiân ê ba̍k-chiu chêng siau-sit.

22 Ki-tiân chai i sī Siōng Chú ê sù-chiá, chiū kóng, “Chhám ah! Chì-koân ê Siōng Chú ah, góa tng-bīn khòaⁿ-tio̍h Siōng Chú ê sù-chiá.”

23Siōng Chú tùi i kóng, “An-sim, m̄-bián kiaⁿ; lí bōe sí.”

24Ki-tiân chiū tī hia kā Siōng Chú khí chi̍t chō chè-tôaⁿ, hō-miâ kiò-chòe “Siōng Chú Sa-liông”. Chit-ê tôaⁿ kàu kin-á-ji̍t iáu tī A-pí-í-siā-cho̍k ê Gô-hut-la.

25Hit-mî, Siōng Chú hoan-hù Ki-tiân, kóng, “Lí khan lín lāu-pē ê gû-káng, chiū-sī i lēng-gōa chi̍t chiah chhit-hè ê gû-káng lâi, koh thiah-húi lín lāu-pē ūi Pa-le̍k khí ê chè-tôaⁿ, chhò tôaⁿ-piⁿ ê A-sià-la thiāu-siōng,

26tī chit-ê iàu-sài téng-bīn, chiàu kui-tēng, ūi Siōng Chú — lí ê Siōng-tè khí chi̍t chō tôaⁿ, hiàn hit-chiah gû chòe sio-hòa-chè, ēng lí só͘ chhò ê A-sià-la thiāu-siōng chòe khí-hé ê chhâ-liāu.”

27Ki-tiân chiū chhōa cha̍p ê po̍k-jîn, chiàu Siōng Chú ê hoan-hù khì chòe; i in-ūi kiaⁿ ka-cho̍k kap siâⁿ-lāi ê lâng, m̄-káⁿ tī ji̍t--sî chòe chit-ê tāi-chì, chiū tī àm-sî chòe.

28Siâⁿ-lāi ê lâng thàu-chá khí--lâi, khòaⁿ-tio̍h Pa-le̍k ê tôaⁿ í-keng thiah-húi, tôaⁿ-piⁿ ê A-sià-la thiāu-siōng hō͘ lâng chhò-tiāu, tē-jī chiah gû hiàn tī sin-khí ê chè-tôaⁿ.

29In kóng-lâi-kóng-khì, “Che sím-mi̍h-lâng chòe--ê?” In chhâ-mn̄g liáu-āu, chiū kóng, “Che sī Iok-a-si ê kiáⁿ Ki-tiân chòe--ê.”

30Siâⁿ-lāi ê lâng tùi Iok-a-si kóng, “Kā lí ê kiáⁿ kau--chhut-lâi, hō͘ i sí, in-ūi i thiah-húi Pa-le̍k ê tôaⁿ, chhò tôaⁿ-piⁿ ê A-sià-la thiāu-siōng.”

31 Iok-a-si kā só͘-ū kong-kek i ê lâng kóng, “Lín beh ūi Pa-le̍k piān-hō͘ sī--bô? Lín beh kiù i sī--bô? Nā ū lâng ūi Pa-le̍k piān-hō͘, thiⁿ iáu-bē kng í-chêng tio̍h hō͘ hit-ê lâng sí. Pa-le̍k nā-sī sîn, tio̍h hō͘ i ka-kī ūi-tio̍h i ê tôaⁿ siū thiah-húi piān-hō͘.”

32Tùi hit-ji̍t khí, lâng kā Ki-tiân kiò-chòe Iâ-lō͘-pa-le̍k, ì-sù sī “Hō͘ Pa-le̍k kap i cheng-piān”, in-ūi i húi-hoāi Pa-le̍k ê tôaⁿ.

33Hit-sî Bí-tiân-lâng, A-má-le̍k-lâng, kap tang-pêng ê pō͘-cho̍k lóng chū-chi̍p, kè Iok-tàn-hô, tī Iâ-su-lia̍t Soaⁿ-kok chat-iâⁿ.

34Siōng Chú ê sîn lîm-kàu Ki-tiân, i chiū pûn sàu-kak; A-pí-í-siā chong-cho̍k ê lâng lóng chū-chi̍p kun-tè i.

35I phài sù-chiá khì Má-ná-se choân tōe-khu, Má-ná-se-lâng chiū chū-chi̍p lâi tè i. I koh lēng-gōa phài sù-chiá khì A-siat, Se-pò͘-lûn, Ná-hut-tha-lī tōe-khu, chiah-ê chi-cho̍k ê lâng mā lóng lâi hōe-ha̍p.

36 Ki-tiân tùi Siōng-tè kóng, “Lí nā chin-chiàⁿ èng-ún beh thong-kè góa kái-kiù Í-sek-lia̍t,

37góa ōe hē kui-niá iûⁿ-mn̂g tī ngó͘-kok-tiûⁿ; nā kan-ta iûⁿ-mn̂g ū lō͘-chúi, thô͘-kha lóng ta-ta, góa chiū chai lí beh chiàu lí ê èng-ún, ēng góa kái-kiù Í-sek-lia̍t.”

38Tāi-chì kó-jiân án-ni hoat-seng. Keh-ji̍t thàu-chá, Ki-tiân khí--lâi, chūn iûⁿ-mn̂g, tùi iûⁿ-mn̂g chūn chi̍t óaⁿ tīⁿ-tīⁿ ê lō͘-chúi chhut--lâi.

39Ki-tiân koh tùi Siōng-tè kóng, “Khún-kiû lí m̄-thang siū-khì, góa koh kiû chi̍t piàn chiū hó. Kiû lí hō͘ góa koh ēng iûⁿ-mn̂g chhì chi̍t piàn, chit-piàn chí-ū hō͘ iûⁿ-mn̂g ta-ta, thô͘-kha lóng ū lō͘-chúi.”

40Hit-mî Siōng-tè mā án-ni chòe, iûⁿ-mn̂g ta-ta, thô͘-kha lóng sī lō͘-chúi.

Sū-su-kì 6 - 現代台語譯本羅馬字版(TTVR)-闽南语

Learn More About Us