Si-phian 9 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ; ēng ko-im chhiùⁿ.Kám-siā Siōng-tè ê Kong-gī

1Siōng Chú ah, góa beh choân-sim kám-siā lí;

góa beh pò-iông lí it-chhè kî-biāu ê chok-ûi.

2Góa beh in-ūi lí hoaⁿ-hí khoài-lo̍k;

Chì-koân ê Siōng-tè ah, góa beh chheng-chàn lí ê miâ.

3Góa ê tùi-te̍k oa̍t-tńg-sin thiat-thè poa̍h-tó,

lóng tī lí ê bīn-chêng bia̍t-bông.

4Lí ū thòe góa sin-oan, thòe góa piān-hō͘;

lí chē tī pó-chō, chiàu kong-gī sím-phòaⁿ.

5Lí chek-pī lia̍t-pang, hō͘ pháiⁿ-lâng bia̍t-bông;

lí éng-oán chhat-siau in ê miâ.

6Tùi-te̍k siū húi-bia̍t, éng-oán hong-hòe;

lí húi-hoāi in ê siâⁿ,

bô lâng koh ōe-kì-tit in.

7M̄-kú Siōng Chú chē-ūi choh-ông kàu éng-oán;

I í-keng an-tì I ê pó-chō beh sím-phòaⁿ.

8I beh chiàu kong-gī sím-phòaⁿ sè-kan,

chiàu chèng-ti̍t chhâi-phòaⁿ bān-bîn.

9Siōng Chú sī siū ap-pek ê lâng ê iàu-sài,

sī in hoān-lān ê sî ê pī-lān-só͘.

10Bat lí ê miâ ê lâng ōe óa-khò lí;

in-ūi Siōng Chú, lí m̄-bat khì-sak chhē-kiû lí ê lâng.

11Tio̍h chheng-chàn tī Sek-an choh-ông ê Siōng Chú,

chiong I ê chok-ûi pò-iông tī bān-bîn ê tiong-kan.

12In-ūi I bô bōe-kì-tit khùn-khó͘ ê lâng,

ūi lâng sin-oan ê Siōng-tè ōe thiaⁿ in ê ai-kiû.

13Siōng Chú ah, kiû lí lîn-bín góa,

lí ū tùi sí-bông ê mn̂g kiù góa chhut--lâi;

kiû lí kàm-chhat oàn-hūn góa ê lâng án-chóaⁿ teh khó͘-chhó͘ góa,

14hō͘ góa thang kóng-khí lí it-chhè thang o-ló ê tāi-chì.

Góa beh tī Sek-an ê siâⁿ-mn̂g ūi-tio̍h lí ê chín-kiù hoan-ho͘.

15Lia̍t-pang poa̍h-lo̍h ka-kī só͘ ku̍t ê hām-khiⁿ;

in ê kha tîⁿ tī in pì-bi̍t tiuⁿ ê lô-bāng.

16Siōng Chú í-keng hián-bêng ka-kī, si-hêng sím-phòaⁿ;

pháiⁿ-lâng hō͘ ka-kī chhiú ê só͘-chòe tîⁿ--tio̍h.

17Pháiⁿ-lâng lóng ōe lo̍h Im-hú;

m̄ jīn Siōng-tè ê lia̍t-pang mā ōe án-ni.

18Sàn-chhiah-lâng it-tēng bōe éng-oán hō͘ Siōng-tè bōe-kì--tit;

khùn-khó͘-lâng ê ǹg-bāng it-tēng bōe éng-oán bô--khì.

19Siōng Chú ah, kiû lí khí--lâi, m̄-thang hō͘ lâng khah iâⁿ;

kiû lí hō͘ lia̍t-pang tī lí ê bīn-chêng siū sím-phòaⁿ.

20Siōng Chú ah, kiû lí hō͘ in kiaⁿ-hiâⁿ,

hō͘ lia̍t-pang chai ka-kī put-kò sī ōe-sí ê lâng nā-tiāⁿ.

Learn More About Us