Sat-bó-ní-kì Siōng-koàn 28

Sat-bó-ní-kì Siōng-koàn 28 - 現代台語譯本羅馬字版(TTVR)-闽南语

1Kè bô jōa kú, Hui-lī-sū-lâng tiàu-chi̍p kun-tūi beh kong-kek Í-sek-lia̍t-lâng. A-kiat-ông tùi Tāi-pi̍t kóng, “Lí eng-kai chai, lí kap lí ê pō͘-hā tio̍h kap góa tàu-tīn chok-chiàn.”

2 Tāi-pi̍t ìn kóng, “Bô būn-tôe, góa sī lí ê lô͘-po̍k, lí chai góa ōe ūi-tio̍h lí chòe sím-mi̍h.”

A-kiat-ông kā Tāi-pi̍t kóng, “Án-ni, góa beh phài lí chòe góa chiong-sin ê sī-ōe.”

Sò-lô Kiû-mn̄g Ang-î

3Hit-sî Sat-bó-ní í-keng sí, só͘-ū ê Í-sek-lia̍t-lâng ūi-tio̍h i ai-khàu, kā i bâi-chòng tī i ê kò͘-hiong La-má. Sò-lô bat chiong ang-î kap kiâⁿ siâ-su̍t--ê lóng kóaⁿ-chhut kok-kéng.

4 Hui-lī-sū-lâng chū-chi̍p, hêng-kun kàu Su-liām chat-iâⁿ; Sò-lô chū-chi̍p só͘-ū ê Í-sek-lia̍t-lâng tī Ki-lī-pho chat-iâⁿ.

5Sò-lô khòaⁿ-tio̍h Hui-lī-sū ê kun-peng, chiū chin kiaⁿ, sim-koaⁿ pho̍k-pho̍k-chhéng.

6Sò-lô mn̄g Siōng Chú; Siōng Chú lóng bô ēng bîn-bāng, bô ēng O͘-lêng, á-sī sian-ti, kā i ìn-tap.

7Sò-lô hoan-hù i ê po̍k-jîn kóng, “Kā góa chhē chi̍t ê ang-î, góa thang khì mn̄g i.”

Po̍k-jîn kóng, “Tī Ún To-ní ū chi̍t ê ang-î.”

8 Sò-lô chiū piàn-chong, chhēng pa̍t-khoán saⁿ; chhōa nn̄g ê lâng kap i chòe-hé khì. Tī mî--sî in khì hit-ê ang-î hia.

Sò-lô kā i kóng, “Chhiáⁿ lí ēng khan-bông ê hoat-su̍t, khan góa kā lí kóng hit-ê lâng chhut--lâi.”

9Ang-î tùi i kóng, “Lí chai Sò-lô ê só͘-chòe; i ū kā ang-î kap kiâⁿ siâ-su̍t--ê lóng kóaⁿ-chhut kok-kéng; lí sī-án-chóaⁿ siat-kè beh hāi góa ê sìⁿ-miā?”

10 Sò-lô kí Siōng Chú tùi i chiù-chōa, kóng, “Góa kí éng-oa̍h ê Siōng Chú chiù-chōa, lí bōe in-ūi chit-ê tāi-chì siū hêng-hoa̍t.”

11Ang-î kóng, “Lí ài góa kā lí khan siáⁿ-lâng chhut--lâi?”

I kóng, “Kā góa chhiáⁿ Sat-bó-ní chhut--lâi.”

12Ang-î khòaⁿ-tio̍h Sat-bó-ní chiū tōa-siaⁿ ki--chhut-lâi, kā Sò-lô kóng, “Lí sī-án-chóaⁿ phiàn góa? Lí sī Sò-lô!”

13Ông tùi i kóng, “Bián kiaⁿ, lí khòaⁿ-kìⁿ sím-mi̍h?”

Ang-î kā Sò-lô kóng, “Góa khòaⁿ-tio̍h sîn-hûn tùi tōe--ni̍h chhut--lâi.”

14 Sò-lô kóng, “I siⁿ-chòe siáⁿ-khoán?”

Ang-î kóng, “Ū chi̍t ê lāu-lâng chhut--lâi, seng-khu moa tn̂g-saⁿ.”

Sò-lô chai sī Sat-bó-ní, chiū phak tī thô͘-kha kā i pài.

15 Sat-bó-ní kā Sò-lô kóng, “Lí sī-án-chóaⁿ kiáu-jiáu góa, khan góa chhut--lâi?”

Sò-lô kóng, “Góa hui-siông thòng-khó͘, in-ūi Hui-lī-sū-lâng lâi kong-kek góa, Siōng-tè mā lī-khui góa, bô koh thong-kè sian-ti á-sī bîn-bāng ìn-tap góa. Só͘-í góa chhiáⁿ lí lâi, thang chí-sī góa tio̍h án-chóaⁿ chòe.”

16 Sat-bó-ní kóng, “Siōng Chú í-keng lī-khui lí, chòe lí ê tùi-te̍k; lí ná tio̍h mn̄g góa?

17Siōng Chú ōe chiàu I kau-tài góa tùi lí kóng--ê si̍t-hiān; I í-keng chiong lí ê ông-koân pak khí-lâi kau hō͘ lí ê tâng-phōaⁿ Tāi-pi̍t.

18In-ūi lí ûi-pōe Siōng Chú ê ōe, bô chiong A-má-le̍k-lâng kap in só͘-ū--ê lóng siau-bia̍t, só͘-í Siōng Chú kin-á-ji̍t tùi lí chòe chit-ê tāi-chì.

19Siōng Chú beh chiong lí kap Í-sek-lia̍t kau tī Hui-lī-sū-lâng ê chhiú. Bîn-á-chài lí kap lí ê kiáⁿ-jî ōe kap góa chòe-hé; Siōng Chú mā beh chiong Í-sek-lia̍t ê kun-tūi kau tī Hui-lī-sū-lâng ê chhiú.”

20 Sò-lô in-ūi Sat-bó-ní ê ōe hui-siông kiaⁿ-hiâⁿ, sûi-sî tó--lo̍h-khì, tó kah ti̍t-ti̍t-ti̍t; kui-mî kui-ji̍t bô chia̍h pòaⁿ-hāng, seng-khu lóng bô la̍t.

21Hit-ê ang-î kiâⁿ óa-khì Sò-lô hia, khòaⁿ-tio̍h i hiah-ni̍h kiaⁿ-hiâⁿ, chiū tùi i kóng, “Lí ê lú-pī thiaⁿ lí ê ōe, bô kò͘ ka-kī ê sìⁿ-miā, ū chiàu lí ê iau-kiû khì chòe.

22Taⁿ, chhiáⁿ lí thiaⁿ lú-pī ê ōe, ún-chún góa khoán tām-po̍h mi̍h-kiāⁿ hō͘ lí chia̍h, lí chiah ū khùi-la̍t chiūⁿ-lō͘.”

23 Sò-lô kū-choa̍t, kóng, “Góa m̄ chia̍h.” M̄-kú i ê po̍k-jîn kap ang-î kā i hó-chhùi khó͘-khǹg, i chiah thiaⁿ in ê ōe, tùi thô͘-kha khí--lâi, chē tī bîn-chhn̂g.

24Ang-î kóaⁿ-kín khan chhù--ni̍h hit-chiah pûi gû-á khì thâi, koh chhiau mī-hún, hang bô-kàⁿ-piáⁿ,

25pâi tī Sò-lô kap i ê po̍k-jîn bīn-chêng, in chiū chia̍h. Hit-mî in khí-sin tò--khì.

Sat-bó-ní-kì Siōng-koàn 28 - 現代台語譯本羅馬字版(TTVR)-闽南语

Learn More About Us