Í-sài-a-su 27

Í-sài-a-su 27 - 現代台語譯本羅馬字版(TTVR)-闽南语

1Tī hit-ji̍t, Siōng Chú beh ēng I tēng koh lāi ê tōa-ki kiàm hêng-hoa̍t hit-chiah hái-siù, chiū-sī soan-lâi-soan-khì sô chin kín ê chôa, koh beh thâi-sí hit-chiah hái-koài.

2Tī hit-ji̍t, tio̍h ūi-tio̍h chhut hó-chiú ê phû-tô-hn̂g lâi hoaⁿ-hí chhiùⁿ-koa:

3Góa Siōng Chú sī kò͘-siú phû-tô-hn̂g--ê;

góa put-sî kā i ak-chúi.

Góa mî-ji̍t lóng teh kò͘-siú,

chiah bián ū lâng kā i sún-hoāi.

4Góa bô koh tùi phû-tô-hn̂g siū-khì;

hn̂g-lāi nā ū chhì-phè iá-chháu,

góa ōe chìn-chêng kā in phut,

kā in sio-liáu-liáu.

5Hiah-ê tùi-te̍k nā bô ài án-ni, tio̍h kui-ǹg góa,

siū góa pó-hō͘, kap góa hô-hó;

in tio̍h kap góa hô-hó.

6Chiong-lâi, Í-sek-lia̍t ōe tèng-kun,

Ngá-kok ōe puh-gê khui-hoe,

in ê ké-chí ōe piàn-móa choân sè-kài.

7Siōng Chú phah Í-sek-lia̍t,

bô chhin-chhiūⁿ I phah hiah-ê kong-kek in--ê hiah-ni̍h giâm-tiōng;

I sat-hāi in,

bô chhin-chhiūⁿ I sat-hāi hiah-ê tô͘-sat in--ê hiah-ni̍h lī-hāi.

8Siōng Chú hòng-tio̍k in, kóaⁿ-sòaⁿ in,

ēng án-ni hêng-hoa̍t in;

I tī thàu tang-hong ê ji̍t,

ēng kiông-lia̍t ê hong chhe-sòaⁿ in.

9 Í-sek-lia̍t nā phah-chhùi gōa-pang sîn-bêng chè-tôaⁿ ê chio̍h,

bô koh ū A-sià-la lú-sîn ê thiāu-siōng kap hiuⁿ-tâi,

in ê chōe-kò chiū tit-tio̍h sià-bián,

in ê chōe tit-tio̍h kái-tû.

10Nā bô, kian-kò͘ ê siâⁿ-chhī ōe pìⁿ hong-po͘,

chhin-chhiūⁿ khòng-iá bô lâng khiā-khí;

tī hia chhun gû teh hioh-khùn, teh chia̍h-chháu,

ōe kā só͘-ū chhiū-ki ê hio̍h chia̍h-liáu-liáu.

11Chhiū-ki chi̍t-ē ko͘-tâ tn̄g--khì, cha-bó͘-lâng chiū khioh-khì hiâⁿ-hé.

In-ūi in sī oân-choân bû-ti ê chú-bîn,

só͘-í chō in--ê bô beh lîn-bín in,

in ê Chhòng-chō-chú bô beh si-un hō͘ in.

12Tī hit-ji̍t, tùi Iù-hoat-la-tí-hô kàu Ai-ki̍p ê khoe-kok, Siōng Chú ōe chhin-chhiūⁿ siu-sêng ké-chí án-ni, kā lín — Í-sek-lia̍t ê jîn-bîn chi̍t-ê chi̍t-ê chū-chi̍p--khí-lâi.

13Tī hit-ji̍t, tōa-ki sàu-kak ōe tân, hiah-ê liû-bông tī A-su̍t-tōe kap Ai-ki̍p-tōe ê Í-sek-lia̍t-lâng ōe tò-tńg--lâi. In lóng beh tī Iâ-lō͘-sat-léng ê sèng-soaⁿ kèng-pài Siōng Chú.

Í-sài-a-su 27 - 現代台語譯本羅馬字版(TTVR)-闽南语

Learn More About Us