Sat-ka-lī-a-su 3

Sat-ka-lī-a-su 3 - 現代台語譯本羅馬字版(TTVR)-闽南语

Tōa-chè-si ê Īⁿ-siōng

1Siōng Chú koh hō͘ góa khòaⁿ-tio̍h tōa-chè-si Iâ-su-a khiā tī Siōng Chú ê sù-chiá bīn-chêng, Sat-tàn khiā tī Iâ-su-a ê chiàⁿ-pêng beh kā i khòng-kò.

2Siōng Chú tùi Sat-tàn kóng, “Sat-tàn, Siōng Chú kā lí chek-pī! Kéng-soán Iâ-lō͘-sat-léng ê Siōng Chú chek-pī lí! Chit-ê lâng kiám m̄-sī tùi hé-tiong thiu--chhut-lâi ê chi̍t tè chhâ?”

3Iâ-su-a chhēng lah-sap ê saⁿ, khiā tī sù-chiá ê bīn-chêng.

4Sù-chiá kā hiah-ê teh sū-hāu--ê kóng, “Kā i ê lah-sap-saⁿ thǹg--khí-lâi.” Siōng Chú kā Iâ-su-a kóng, “Góa í-keng tû-khì lí ê chōe-ok, góa beh kā lí chhēng lé-ho̍k.”

5Siōng Chú hoan-hù tio̍h ēng chheng-khì ê lé-bō kā i tì tī thâu-khak. In chiū kā i chhēng lé-ho̍k, tì chheng-khì ê lé-bō; hit-sî Siōng Chú ê sù-chiá khiā tī piⁿ--á teh khòaⁿ.

6Siōng Chú ê sù-chiá kéng-kài Iâ-su-a kóng,

7“Siōng Chú — Bān-kun ê Thóng-sòe án-ni kóng, ‘Lí nā chun-hêng góa ê tō-lō͘, chun-siú góa ê bēng-lēng, chiū ōe-tàng koán-lí góa ê tiān, kò͘-siú góa ê tiâⁿ; góa mā beh hō͘ lí tī hiah-ê sū-hāu-chiá tiong-kan chū-iû chhut-ji̍p.

8Tōa-chè-si Iâ-su-a, lí kap chē tī lí bīn-chêng ê chè-si-phōaⁿ lóng tio̍h thiaⁿ; chiah-ê lâng sī chiong-lâi beh hoat-seng ê tāi-chì ê tiāu-thâu, góa beh hō͘ Sin-íⁿ, chiū-sī góa só͘ kéng-soán ê ông lâi-lîm.

9Lí khòaⁿ, góa tī Iâ-su-a bīn-chêng hē chi̍t tè ū chhit lúi ba̍k-chiu ê chio̍h.’ Siōng Chú — Bān-kun ê Thóng-sòe kóng, ‘Khòaⁿ leh, góa beh tī hit-tè chio̍h téng-bīn khek-jī choh-chèng, beh tī chi̍t ji̍t lāi chhat-siau chit-ê tōe ê chōe.

10Tī hit-ji̍t, lín ta̍k-ê lâng ōe chhiáⁿ chhù-piⁿ lâi phû-tô-chhiū kha kap bû-hoa-kó-chhiū kha chē.’ Siōng Chú — Bān-kun ê Thóng-sòe án-ni soan-pò͘.”

Sat-ka-lī-a-su 3 - 現代台語譯本羅馬字版(TTVR)-闽南语

Learn More About Us