Se-hoan-ngá-su 3

Se-hoan-ngá-su 3 - 現代台語譯本羅馬字版(TTVR)-闽南语

Iâ-lō͘-sat-léng ê Chōe-ok kap Kiù-sio̍k

1Chit-ê pōe-ge̍k, ù-òe, khi-ap ê siâⁿ, chhám ah!

2I bô thiaⁿ ōe,

bô siū kà-sī,

bô óa-khò Siōng Chú,

bô chhin-kūn i ka-kī ê Siōng-tè.

3I ê kùi-cho̍k tī siâⁿ-lāi sī hm̄-hm̄-háu ê sai;

i ê sím-phòaⁿ-koaⁿ sī mî--sî ê chhâi-lông,

liân chi̍t-tè-á kut-thâu to bô lâu kàu thiⁿ-kng.

4I ê sian-ti kóng-ōe bô hū-chek, choh-lâng khúi-chà;

i ê chè-si phah lâ-sâm sèng-só͘, lām-iōng lu̍t-hoat.

5Tī in tiong-kan ê Siōng Chú sī kong-gī--ê,

bô chòe put-gī ê sū.

I ta̍k chá-khí si-hêng sím-phòaⁿ, mî-ji̍t bô-thêng;

m̄-kú put-gī ê lâng m̄-chai kiàn-siàu.

6Siōng Chú kóng,

“Góa í-keng siau-bia̍t lia̍t-kok,

húi-hoāi in siâⁿ-kak ê thah;

góa hō͘ in ê koe-lō͘ léng-léng-chheng-chheng,

bô lâng keng-kè;

in ê siâⁿ hong-hòe, bô lâng lâu tī hia,

lóng bô lâng khiā-khí.

7Góa kóng, ‘Lí eng-kai tio̍h kèng-ùi góa,

tio̍h siū kà-sī,

chiah bián siâⁿ-lāi ê chhù chiàu góa ê phòaⁿ-tēng siū châu-bia̍t.’

M̄-kú in tian-tò put-toān chòe pāi-hoāi ê tāi-chì.”

8Siōng Chú koh kóng,

“Só͘-í, lín tio̍h thèng-hāu góa,

kàu góa khí-lâi khòng-kò lia̍t-kok hit-ji̍t;

in-ūi góa í-keng koat-tēng beh tiàu-chi̍p lia̍t-kok,

chū-chi̍p lia̍t-pang,

chiong góa ê tōa siū-khì tùi in piàⁿ-lo̍h;

choân-tōe it-tēng ōe hō͘ góa béng-lia̍t siū-khì ê hé thun-bia̍t.

9“Hit-sî góa beh kiat-chēng bān-bîn ê chhùi-tûn,

hō͘ in thang kiû-kiò Siōng Chú ê miâ,

tâng-sim chi̍t-ì ho̍k-sāi góa.

10Góa phah-sòaⁿ ê chú-bîn ōe tùi Kó͘-si̍t ê hô hit-pêng tńg--lâi,

tùi góa kî-tó hiàn lé-mi̍h.

11“Tī hit-ji̍t, lín bōe koh in-ūi it-chhè tek-chōe góa ê sū kiàn-siàu;

hit-sî góa beh tùi lín tiong-kan tû-khì khoa-kháu kiau-ngō͘ ê lâng,

lín chiū bōe koh tī góa ê sèng-soaⁿ chū-ko.

12Góa ōe lâu sàn-chhiah pi-bî ê lâng tī lín tiong-kan,

in ōe óa-khò góa Siōng Chú tit-tio̍h pó-hō͘.

13 Í-sek-lia̍t só͘ chhun ê chú-bîn bōe koh chòe pháiⁿ,

bōe koh kóng pe̍h-chha̍t,

chhùi-lāi bô khúi-chà ê chi̍h;

in ōe hó-chia̍h hó-khùn,

bōe koh hō͘ lâng heh-kiaⁿ.”

Khoài-lo̍k ê Koa

14 Sek-an ah, tio̍h hoaⁿ-hí chhiùⁿ-koa!

Í-sek-lia̍t ah, tio̍h tōa-siaⁿ hoan-ho͘!

Iâ-lō͘-sat-léng ah, tio̍h móa-sim hoaⁿ-hí khoài-lo̍k!

15Siōng Chú í-keng thiat-siau tùi lí ê sím-phòaⁿ,

chiong lí ê tùi-te̍k kóaⁿ-cháu.

Siōng Chú — Í-sek-lia̍t ê Ông kap lí tông-chāi;

lí bián koh kiaⁿ chai-hāi.

16Tī hit-ji̍t, lâng ōe tùi Iâ-lō͘-sat-léng kóng,

“Sek-an ah, m̄-thang kiaⁿ!

M̄-bián kha-sng-chhiú-nńg.

17Siōng Chú — lí ê Siōng-tè kap lí tông-chāi;

I ū tōa khùi-la̍t si-hêng chín-kiù,

I ōe in-ūi lí hoaⁿ-hí khoài-lo̍k,

I ōe in-ūi thiàⁿ lí, hō͘ lí ê sìⁿ-miā ōaⁿ-sin,

koh in-ūi lí, hoaⁿ-hí chhiùⁿ-koa.”

18Siōng Chú kóng,

“Góa beh chū-chi̍p hiah-ê in-ūi bōe-tàng siú-choeh sim kan-khó͘ ê lâng,

hō͘ in bián koh taⁿ siū lêng-jio̍k ê tāng-tàⁿ.

19Hit-sî, góa beh hêng-hoa̍t khi-ap lín--ê,

kái-kiù kha-pái--ê,

chū-chi̍p siū hòng-tio̍k--ê.

Góa beh hō͘ hiah-ê tī ta̍k só͘-chāi siū lêng-jio̍k--ê,

tit-tio̍h chheng-chàn kap chun-êng.

20Hit-sî, góa beh kā lín chū-chi̍p, chhōa lín tńg--lâi.

Góa hō͘ lín chiah-ê siū-lia̍h ê lâng hôe-ho̍k hoân-êng ê sî,

lín ōe chhin-ba̍k khòaⁿ-tio̍h lín tī tōe-chiūⁿ bān-bîn ê tiong-kan

tit-tio̍h chheng-chàn kap chun-êng.”

Siōng Chú án-ni soan-pò͘.

Se-hoan-ngá-su 3 - 現代台語譯本羅馬字版(TTVR)-闽南语

Learn More About Us