Si-phian 48 - 現代台語譯本羅馬字版(TTVR)-闽南语

Khó-la hō͘-tāi ê si-koa.Sek-an — Siōng-tè ê Siâⁿ

1Siōng Chú chì-tōa,

tī lán Siōng-tè ê siâⁿ,

tī I sèng ê soaⁿ,

eng-kai tōa-tōa siū chheng-chàn.

2 Sek-an-soaⁿ tī pak-bīn, koân koh hó-khòaⁿ,

choân-tōe só͘ hoaⁿ-hí, tōa Kun-ông ê siâⁿ.

3Siōng-tè tī siâⁿ ê iàu-sài teh kò͘-siú,

hō͘ lâng chai I sī pī-lān-só͘.

4Khòaⁿ ah, lia̍t-ông chū-chi̍p,

tàu-tīn chìn-kun beh kong-siâⁿ.

5In chi̍t-ē khòaⁿ-tio̍h chit-ê siâⁿ chiū gông-ngia̍h,

kiaⁿ-hiâⁿ, kóaⁿ-kín tô-cháu.

6In tī hia ngia̍uh-ngia̍uh-chhoah,

chhin-chhiūⁿ chhui-chūn ê hū-jîn-lâng thàng-thiàⁿ,

7chhin-chhiūⁿ Tha-si ê chûn hō͘ tang-hong phah-phòa.

8Tī Siōng Chú — Bān-kun ê Thóng-sòe ê siâⁿ-lāi,

tī lán Siōng-tè ê siâⁿ-tiong,

lán bat thiaⁿ--tio̍h, hiān-chāi chhin-ba̍k khòaⁿ--tio̍h,

Siōng-tè beh kò͘-siú chit-ê siâⁿ kàu éng-oán.

9Siōng-tè ah, tī lí ê tiān-lāi,

goán siàu-liām lí ê chû-ài.

10Siōng-tè ah, lí ê miâ thoân kàu choân-tōe,

o-ló ê siaⁿ thàu kàu thiⁿ-piⁿ-hái-kak.

Lí ê thóng-tī chhiong-móa kong-gī,

11lí ê phòaⁿ-toàn chèng-khak,

Sek-an-soaⁿ tio̍h hoaⁿ-hí,

Iû-tāi ê siâⁿ-chhī tio̍h khoài-lo̍k.

12Lín tio̍h se̍h Sek-an, chiu-ûi se̍h chi̍t lìn,

tiám-sǹg siâⁿ-thah,

13koan-chhat siâⁿ-chhiûⁿ, him-sióng pó-lúi,

thang hō͘ lín tùi hō͘-tāi soan-kò:

14Chit-ūi Siōng-tè sī lán éng-éng-oán-oán ê Siōng-tè,

I ōe éng-oán ín-chhōa lán.

Learn More About Us