Si-phian 97 - 現代台語譯本羅馬字版(TTVR)-闽南语

Chì-koân ê Thóng-tī-chiá Siōng Chú

1Siōng Chú choh-ông, tāi-tōe tio̍h khoài-lo̍k;

chèng hái-tó tio̍h hoaⁿ-hí.

2Ba̍t-hûn kap o͘-àm tī I ê sì-ûi;

kong-gī kap chèng-ti̍t sī I pó-chō ê tōe-ki.

3Hé kiâⁿ tī I ê bīn-chêng,

sio I sì-ûi ê tùi-te̍k.

4I ê sih-nà chiò-kng sè-kài;

tāi-tōe khòaⁿ--kìⁿ chiū iô-choah.

5Tī Siōng Chú — choân-tōe ê Chú bīn-chêng,

chèng-soaⁿ chhin-chhiūⁿ la̍h siau-iûⁿ.

6Thiⁿ soan-pò͘ I ê kong-gī;

lia̍t-pang khòaⁿ-kìⁿ I ê êng-kng.

7Só͘-ū ho̍k-sāi tiau-khek ê ngó͘-siōng,

ēng hu-ké ê sîn-bêng lâi khoa-kháu ê lâng lóng ōe kiàn-siàu sit-pāi.

Chèng sîn-bêng ah, lín lóng tio̍h kèng-pài Siōng Chú.

8Siōng Chú ah, in-ūi lí ê sím-phòaⁿ,

Sek-an thiaⁿ--kìⁿ chiū hoaⁿ-hí,

Iû-tāi ê siâⁿ mā lóng khoài-lo̍k.

9In-ūi Siōng Chú lí chì-koân, pôaⁿ-kè choân-tōe;

lí chì-chun chhiau-oa̍t chèng sîn-bêng.

10Siōng Chú só͘ thiàⁿ ê lâng oàn-hūn pháiⁿ.

I pó-hō͘ I sèng ê chú-bîn ê sìⁿ-miā,

kiù in thoat-lī pháiⁿ-lâng ê chhiú.

11Kng ūi-tio̍h gī-lâng chhut-hiān;

hí-lo̍k ūi-tio̍h sim chèng-ti̍t ê lâng chún-pī.

12Gī-lâng ah, tio̍h in-ūi Siōng Chú hoaⁿ-hí,

chheng-chàn I ê sèng-miâ.

Learn More About Us