Ko-lîm-to Chiân-su 13

Ko-lîm-to Chiân-su 13 - 現代台語譯本羅馬字版(TTVR)-闽南语

1Góa nā ōe-hiáu kóng lâng ê gú-giân, sīm-chì thiⁿ-sài ê gú-giân, nā bô jîn-ài, góa chiū chhin-chhiūⁿ lô teh tân, poa̍h teh hiáng.

2Góa nā ū thoân-ta̍t Siōng-tè sìn-sit ê un-sù, ōe liáu-kái ta̍k-khoán ê ò-pì kap ta̍k-khoán ê tì-sek; góa nā ū kàu-gia̍h ê sìn-sim thang î-san-tó-hái, nā bô jîn-ài, góa chiū bô lō͘-ēng.

3Góa nā the̍h só͘-ū ê châi-sán khì kiù-chè, á-sī hiàn seng-khu hō͘ hé sio, nā bô jîn-ài, tùi góa lóng bô lī-ek.

4Jîn-ài sī khoan-iông; jîn-ài sī chû-pi; ū jîn-ài chiū bōe oàn-tò͘, bōe khoa-kháu, bōe kiau-ngō͘,

5bōe chòe kiàn-siàu ê tāi-chì, bōe kiû ka-kī ê lī-ek, bōe khoài siū-khì, bōe khioh-hūn,

6bōe ài put-gī, chí-ū ài chin-lí.

7Jîn-ài ōe pau-iông it-chhè, tùi it-chhè ū sìn-sim, tùi it-chhè ū ǹg-bāng, tùi it-chhè ū nāi-sim.

8Jîn-ài éng-oán chûn-chāi. Thoân-ta̍t Siōng-tè sìn-sit ê un-sù ōe kiat-sok; kóng lêng-gú ê un-sù ōe thêng-chí; tì-sek mā ōe siau-sit.

9Lán só͘ bat--ê iú-hān; lán thoân-ta̍t Siōng-tè sìn-sit ê un-sù mā iú-hān.

10M̄-kú hit-ê oân-choân--ê chi̍t-ē lâi, hit-ê iú-hān--ê chiū siau-sit.

11Góa choh gín-á ê sî, kóng-ōe chhin-chhiūⁿ gín-á, ì-kiàn chhin-chhiūⁿ gín-á, siūⁿ-hoat mā chhin-chhiūⁿ gín-á; góa kì-jiân sêng-jîn, chiū chiong gín-á ê sū lóng pàng-sak.

12Lán hiān-chāi chhin-chhiūⁿ chiò-kiàⁿ teh khòaⁿ, bū-bū bô-bêng, chiong-lâi ōe bīn-tùi-bīn khòaⁿ chheng-chhó. Góa hiān-chāi chí-ū chai chi̍t-pō͘-hūn, chiong-lâi ōe oân-choân liáu-kái, chhin-chhiūⁿ Siōng-tè oân-choân liáu-kái góa.

13Án-ni, sìn, ǹg-bāng, jîn-ài chit saⁿ hāng kè-sio̍k chûn-chāi, kî-tiong siōng tiōng-iàu--ê sī jîn-ài.

Ko-lîm-to Chiân-su 13 - 現代台語譯本羅馬字版(TTVR)-闽南语

Learn More About Us