Chhut-ai-ki̍p-kì 24

Chhut-ai-ki̍p-kì 24 - 現代台語譯本羅馬字版(TTVR)-闽南语

Li̍p-iok ê Huih

1Siōng Chú tùi Mô͘-se kóng, “Lí kap A-lûn, Ná-tap, A-pí-hō͘, í-ki̍p Í-sek-lia̍t chhit-cha̍p ê tiúⁿ-ló, tio̍h chiūⁿ-lâi góa chia, tùi hn̄g-hn̄g ê só͘-chāi phak lo̍h-khì pài góa.

2Chí-ū Mô͘-se thang chiū-kūn Siōng Chú, kî-tha ê lâng m̄-thang óa--lâi, jîn-bîn mā m̄-thang kap lí chòe-hé chiūⁿ-soaⁿ.”

3 Mô͘-se lo̍h-soaⁿ, chiong Siōng Chú só͘-ū ê bēng-lēng kap kui-lē lóng kóng hō͘ jîn-bîn thiaⁿ; jîn-bîn chôe-siaⁿ ìn kóng, “Siōng Chú kóng ê ōe, goán lóng beh chun-thàn.”

4Mô͘-se chiong Siōng Chú ê ōe lóng siá--khí-lâi. Keh-ji̍t thàu-chá, Mô͘-se tī soaⁿ-kha khí chi̍t chō chè-tôaⁿ, chiàu Í-sek-lia̍t cha̍p-jī chi-cho̍k, chhāi cha̍p-jī ki chio̍h-thiāu.

5I koh phài Í-sek-lia̍t ê siàu-liân-lâng khì hiàn sio-hòa-chè, mā hiàn gû hō͘ Siōng Chú chòe pêng-an-chè.

6Mô͘-se chiong huih ê chi̍t-pòaⁿ tóe tī phûn--ni̍h, lēng-gōa chi̍t-pòaⁿ hiù tī tôaⁿ-téng.

7Mô͘-se koh the̍h li̍p-iok ê chheh tha̍k hō͘ jîn-bîn thiaⁿ, jîn-bîn ìn kóng, “Siōng Chú kóng ê ōe, goán lóng beh chun-thàn.”

8 Mô͘-se chiong phûn--ni̍h ê huih hiù tī jîn-bîn ê sin-chiūⁿ, kóng, “Che chiū-sī li̍p-iok ê huih; chit-ê iok sī Siōng Chú chiàu I ê ōe kap lín kiàn-li̍p--ê.”

9 Mô͘-se, A-lûn, Ná-tap, A-pí-hō͘, í-ki̍p Í-sek-lia̍t chhit-cha̍p ê tiúⁿ-ló lóng chiūⁿ-khì soaⁿ--ni̍h.

10In khòaⁿ-kìⁿ Í-sek-lia̍t ê Siōng-tè; I ê kha-ē chhin-chhiūⁿ pho͘ nâ-pó-chio̍h, chhin-chhiūⁿ thiⁿ hiah-ni̍h kng-liāng thàu-bêng.

11Siōng-tè bô chhut-chhiú siong-hāi Í-sek-lia̍t ê léng-siù; in lóng khòaⁿ-kìⁿ Siōng-tè, tī hia ia̍h-chia̍h-ia̍h-lim.

Mô͘-se tī Se-nāi-soaⁿ

12Siōng Chú kā Mô͘-se kóng, “Lí chiūⁿ-soaⁿ lâi góa chia, lâu tiàm chia, góa beh chiong góa só͘ siá, beh kà-sī jîn-bîn ê lu̍t-hoat kap kài-bēng ê chio̍h-pán hō͘ lí.”

13Mô͘-se kap i ê chō͘-chhiú Iok-su-a chiū chhut-hoat; Mô͘-se

peh-chiūⁿ Siōng-tè ê soaⁿ.

14Mô͘-se kā hiah-ê tiúⁿ-ló kóng, “Lín tiàm chia tán goán, thèng-hāu goán tò-tńg--lâi. A-lûn kap Hō͘-ní ū kap lín chòe-hé; bîn-chiòng nā ū tāi-chì, thang khì chhē in.”

15 Mô͘-se chiūⁿ-soaⁿ; soaⁿ ū hûn khàm--teh.

16Siōng Chú ê êng-kng thêng tī Se-nāi-soaⁿ; hûn jia soaⁿ la̍k ji̍t kú. Tē-chhit ji̍t, Siōng Chú tùi hûn-tiong kiò Mô͘-se.

17Í-sek-lia̍t-lâng khòaⁿ-kìⁿ Siōng Chú ê êng-kng hián-hiān, chhin-chhiūⁿ hé tī soaⁿ-téng teh to̍h.

18Mô͘-se chiūⁿ-soaⁿ ji̍p hûn-tiong; i lâu tī soaⁿ-téng sì-cha̍p mî sì-cha̍p ji̍t.

Chhut-ai-ki̍p-kì 24 - 現代台語譯本羅馬字版(TTVR)-闽南语

Learn More About Us